الماتى تۇرعىندارى مەن قوناقتارى «كوك-توبە» ساياباعىنداعى جاڭا جاياۋ جۇرگىنشىلەر جولىن باعالادى. الماتى تۇرعىندارىنىڭ «كوك-توبەگە» وتىنىشتەرىن ەسكەرە وتىرىپ، قالا اكىمىنىڭ تاپسىرماسى بويىنشا 2023 جىلدىڭ قازان ايىندا جەكە ينۆەستيسيالار ەسەبىنەن ۇزىندىعى 1،2 كم جاياۋ جۇرگىنشىلەرگە ارنالعان دەنساۋلىق جولىنىڭ قۇرىلىسى باستالدى. بۇرىن ساياباققا جاياۋ بارۋ قيىندىق تۋعىزاتىن ءارى ءقاۋىپتى بولاتى. دەنساۋلىق جولىنىڭ ىسكە قوسىلۋىمەن بۇل ماسەلە شەشىمىن تاپتى. بۇگىنگى تاڭدا وتكىزۋ قابىلەتى كۇنىنە 10 مىڭ ادامعا جەتەدى، - دەپ حابارلايدى alnews الماتى قالاسى اكىمدىگىنىڭ باسپا ءسوز قىزمەتىنە سىلتەمە جاساپ.
«الماتى تۇرعىندارى مەن قوناقتارى ءۇشىن دەنساۋلىق جولدارىن جاساۋ-ۇلكەن جەتىستىك. ەندى بارلىعى «كوك-توبەگە» جاياۋ بارىپ، تاۋلار مەن اينالانىڭ تاڭعاجايىپ كورىنىستەرىن تاماشالاي الادى. بۇرىن جۇرگىنشى جولى اۆتوموبيلدەر ۇنەمى قوزعالاتىن جولدا بولاتىن، بۇل ىڭعايسىز ءارى ءقاۋىپتى. جاڭا سوقپاق جولدار - ىڭعايلى ءارى دەنساۋلىققا دا پايدالى»، - دەدى الماتى تۇرعىنى ەلدوس ساپۋنوۆ.
«مەن مۇندا ءجيى كەلەمىن. مۇندا سكانديناۆيالىق سەرۋەندەۋ الدەقايدا ىڭعايلى بولدى. الاڭدا ورنالاسقان ورىندىقتار مەن ۋرنالار دا پايدالى. ءبىزدىڭ قاۋىپسىزدىگىمىز ءۇشىن بەينەباقىلاۋ كامەرالارى ورناتىلعان. وسىنداي جايلى جانە ءقاۋىپسىز كەڭىستىك قۇرعانى ءۇشىن ۇلكەن العىسىمدى بىلدىرەمىن»، - دەدى الماتى تۇرعىنى ارۋجان سمايلوۆا.
«كوك-توبە» ساياباعىنىڭ وكىلى فارحاد ءۋالي اتاپ وتكەندەي، كەلۋشىلەرگە ىڭعايلى بولۋ ءۇشىن بۇكىل مارشرۋتتا جارىقتاندىرۋ، بەينەباقىلاۋ، ورىندىقتار مەن ۋرنالار جابدىقتالعان.
«بۇگىنگى تاڭدا اسفالتتاۋ مەن بورديۋرلەردى جاساۋدى قوسا العاندا، نەگىزگى قۇرىلىس جۇمىستارى اياقتالدى. جاقىن ارادا ىرگەلەس اۋماقتى اباتتاندىرۋ باستالادى. مارشرۋت باستالار الدىندا ساياباق ايماعى قۇرىلادى، وندا بۇرىن اباتتاندىرىلماعان ۋچاسكە بولعان. الماتى اكىمى ەربولات دوسايەۆتىڭ تاپسىرماسى بويىنشا تۇرعىنداردىڭ وتىنىشتەرى ارقاسىندا كەلۋشىلەر ءۇشىن قولايلى جاعدايلار جاسالدى. وسىلايشا، ءوز قاراجاتىمىزبەن ءبىز جاياۋ جۇرگىنشىلەرگە ىڭعايلى جول سالا باستادىق. بۇگىن كەلۋشىلەر مۇندا جايلى سەرۋەندەيدى، جۇرگەن قادامدارىن ەسەپتەيدى»، - دەدى فارحاد ۋالي.
سونىمەن قاتار، دەمالۋشىلارعا ىڭعايلى بولۋ ءۇشىن كوك-توبە تاۋىنىڭ كوركەم بەتكەيلەرىنە قارايتىن بىرنەشە باقىلاۋ الاڭدارى قاراستىرىلعان. الاڭداردى اباتتاندىرۋ بيىل 1 مامىرعا دەيىن اياقتالادى.
«كوك توبە» ساياباعى قالانىڭ كورىكتى جەرلەرىنىڭ ءبىرى جانە دەمالىس ورنى بولىپ تابىلادى. جىل سايىن ساياباققا 600 مىڭنان استام ادام كەلەدى. ساياباقتىڭ باستاپقى نۇكتەسى-ۇزىندىعى 1620 مەتر بولاتىن بىرەگەي اسپالى جول، وندا 17 گوندولالىق كابينالار جۇمىس ىستەيدى. جول ءجۇرۋ ۋاقىتى شامامەن 6 مينۋتتى قۇرايدى، وسى ۋاقىت ىشىندە جولاۋشىلاردىڭ الدىندا كوركەم كورىنىستەر اشىلادى.
