شانحاي ىنتىماقتاستىق ۇيىمىنا مۇشە مەملەكەتتەر باسشىلارى كەڭەسىنىڭ وتىرىسى «شىۇ پليۋس» فورماتىندا جالعاستى، - دەپ حابارلايدى alnews اقورداعا سىلتەمە جاساپ.
پرەزيدەنت سامميتتە ءسوز سويلەپ، قىرعىزستاننىڭ شىۇ-عا ءتوراعالىعى جوعارى دەڭگەيدە ءوتىپ جاتقانىن ايتتى.
– قىرعىزستان ۇيىم مۇشەلەرىن جۇمىلدىرىپ، ءبىزدىڭ ۇسىنىستارىمىزدان «تۇراقتى بەيبىتشىلىك، دامۋ جانە وركەندەۋ جولىنداعى بىرلىك» ۇرانى اياسىندا مازمۇندى كۇن ءتارتىبىن قالىپتاستىردى. بىشكەك ءسامميتىنىڭ قورىتىندىسى ورتاق ماقساتتارعا ءبىر تابان جاقىنداتىپ، ەۋرازيا كەڭىستىگىندەگى تۇراقتىلىقتى ساقتايتىن باستى تىرەكتەردىڭ ءبىرى رەتىندە شانحاي ىنتىماقتاستىق ۇيىمىن نىعايتا تۇسەتىنىنە سەنىمدىمىن، – دەدى مەملەكەت باسشىسى.
قاسىم-جومارت توقايەۆ ورتاق ستراتەگيالىق مىندەتكە توقتالدى. ونىڭ پايىمداۋىنشا، كۇش كورسەتۋ كۋلتى مەن كونفرونتاسيا ورنىنا ءوزارا جاۋاپكەرشىلىك، بىرلەسە دامۋ جانە ۇزاقمەرزىمدى ىنتىماقتاستىق سالتانات قۇراتىن جاڭا الەمدىك ءتارتىپ قالىپتاسۋعا ءتيىس.
– حالىقارالىق ارەناداعى مۇنداي ىقپالداستىقتىڭ ەڭ ۇلگىلى مودەلى «شانحاي رۋحى» ەكەنىن شىۇ-نىڭ كوپجىلدىق تاجىريبەسى انىق كورسەتەدى. ۇيىم قىزمەتىندەگى تەڭدىك پەن كونسەنسۋس قاعيداتتارى، شىن مانىندە، كوپجاقتى ىنتىماقتاستىقتى تابىستى دامىتۋدىڭ ۇزدىك ولشەمىنە اينالدى. سوندىقتان شىۇ-نىڭ باستى قاعيداتتارىن حالىقارالىق كوپجاقتى ىنتىماقتاستىق جانە بەيبىتشىلىك جولىنداعى ديپلوماتيا كۇنىنە ارنالعان بۇۇ باس اسسامبلەياسىنىڭ ارنايى قارارىندا بەكىتۋدى ۇسىنامىن، – دەدى پرەزيدەنت.
