الماتىداعى تەررەنكۋردا قالا كۇنىنە جانە Almaty Marathon-نىڭ 15 جىلدىعىنا وراي جاڭا مۋرال سالىندى، - دەپ حابارلايدى alnews.
تۋىندى ءال-فارابي داڭعىلىنىڭ استىنداعى توننەلگە ورنالاستىرىلدى. بۇل جۇگىرۋ، جاتتىعۋ جانە بەلسەندى سەرۋەنگە ارنالعان تانىمال باعىتتاردىڭ ءبىرى. مۋرالدىڭ اۆتورى - Repas گراففيتي-كومانداسى.
كومپوزيسيانىڭ نەگىزگى تاقىرىبى - قوزعالىس پەن بۇقارالىق سپورت.
«15 جىل ىشىندە Almaty Marathon الماتى ءومىرىنىڭ اجىراماس بولىگىنە اينالدى. ءبىز وسى تاريحتى قالا كەڭىستىگىندە دە قالدىرعىمىز كەلدى. مارافوننىڭ ەنەرگياسىن جەتكىزىپ، سپورتتىڭ ءتۇرلى ادامداردى قالاي بىرىكتىرەتىنىن كورسەتەتىن تۋىندى جاساۋدى كوزدەدىك. بۇل مۋرال قوزعالىس، حالىق جانە وسى جىلدار بويى Almaty Marathon-مەن بىرگە وزگەرىپ، دامىپ كەلە جاتقان قالا تۋرالى. ونىڭ ءدال ءقازىر، الماتى قالا كۇنى مەن مەرەيتويلىق Almaty Marathon-عا دايىندالىپ جاتقان كەزدە پايدا بولۋىنىڭ دا وزىندىك ءمانى بار»، — دەدى Almaty Marathon ۇيىمداستىرۋشىسى — «ءبىرىنشى بولۋ — باتىلدىق» كورپوراتيۆتىك قورىنىڭ اتقارۋشى ديرەكتورى سالتانات قازىبايەۆا.
جۇگىرۋ جارىسى 27 قىركۇيەكتە قالا اكىمدىگىنىڭ قولداۋىمەن وتەدى. وعان الەمنىڭ 60-تان استام ەلىنەن 16 مىڭ ادام قاتىسادى.
جارىس باعدارلاماسىنا 42،2 كم، 21،1 كم جانە 10 كم قاشىقتىقتار، سكانديناۆيالىق سەرۋەن، سونداي-اق كوماندالىق ەكيدەن ەستافەتاسى كىرەدى.
