مەملەكەت باسشىسى قاسىم-جومارت توقايەۆ قىرعىز رەسپۋبليكاسى جوگوركۋ كەنەشىنىڭ ءتوراعاسى مارلەن ماماتالييەۆتى قابىلدادى، - دەپ حابارلايدى alnews پرەزيدەنتتىڭ باسپا ءسوز قىزمەتىنە سىلتەمە جاساپ.
قاسىم-جومارت توقايەۆ مارلەن ماماتالييەۆكە ءىلتيپات ءبىلدىرىپ، ونىڭ قازاقستانعا العاشقى رەسمي ساپارى ەكىجاقتى قارىم-قاتىناستى نىعايتۋ تۇرعىسىنان ايرىقشا مانگە يە ەكەنىن اتاپ ءوتتى.
– ەلىمىزگە ارنايى كەلگەنىڭىزگە قۋانىشتىمىز. ساپارىڭىز وتە ماڭىزدى. بۇل ەكى ەل اراسىنداعى ىنتىماقتاستىققا تىڭ سەرپىن بەرەدى دەپ سەنەمىن. ەلدەرىمىز اراسىندا ەشقانداي تۇيتكىل نەمەسە تۇسىنىسپەۋشىلىك جوق. «قازاق-قىرعىز – ءبىر تۋعان» دەگەن ءسوز بار. ءبىر كەڭىستىكتە باۋىرلاس، تاتۋ بولىپ، ارامىزداعى قارىم-قاتىناستى نىعايتا بەرەمىز. قىرعىز رەسپۋبليكاسىنىڭ ەكونوميكاسى جوعارى قارقىنمەن دامىپ كەلەدى. ءبىز بۇل وڭ ءۇردىستى قولدايمىز. قىرعىز رەسپۋبليكاسى بىرىككەن ۇلتتار ۇيىمى قاۋىپسىزدىك كەڭەسىنىڭ تۇراقتى ەمەس مۇشەسى بولىپ سايلاندى. مۇنى قىرعىزستان مەن ورتالىق ازيا ەلدەرى ءۇشىن تاريحي وقيعا دەپ ايتۋعا بولادى. وسىعان وراي پرەزيدەنت سادىر نۋرگوجويەۆيچ جاپاروۆقا قۇتتىقتاۋ حات جولدادىم، – دەدى پرەزيدەنت.
مارلەن ماماتالييەۆ قاسىم-جومارت توقايەۆقا كەزدەسۋ ءۇشىن العىس ايتىپ، پرەزيدەنت سادىر جاپاروۆتىڭ ىستىق ىقىلاسىن جەتكىزدى.
– قىرعىز تاراپى ءسىزدىڭ باسشىلىعىڭىزبەن ىسكە اسىرىلعان اۋقىمدى كونستيتۋسيالىق وزگەرىستەردى قولدايدى. مەن مۇنى سەنىمدى تۇردە ايتا الامىن. بۇل ادىلەتتى ءارى وزىق قازاقستاندى قۇرۋعا بەرىك نەگىز قالايدى. سىزگە جانە باۋىرلاس قازاقستان حالقىنا بەيبىتشىلىك، باق-بەرەكە تىلەيمىن. قولعا العان رەفورمالاردى تابىستى جۇزەگە اسىرۋلارىڭىزعا تىلەكتەسپىن، – دەدى جوگوركۋ كەنەش ءتوراعاسى.
كەزدەسۋ بارىسىندا پارلامەنتارالىق بايلانىستاردى دامىتۋ جانە جوعارى دەڭگەيدە قول جەتكىزىلگەن ەكىجاقتى ۋاعدالاستىقتاردى زاڭنامالىق تۇرعىدان ءتيىمدى قامتاماسىز ەتۋ ماسەلەلەرى تالقىلاندى.
ەكى ەلدە جۇرگىزىلىپ جاتقان جۇيەلى الەۋمەتتىك-ەكونوميكالىق رەفورمالار جونىندە مازمۇندى ءارى ەگجەي-تەگجەيلى اڭگىمە ءوربىدى.
پرەزيدەنت پەن جوگوركۋ كەنەش ءتوراعاسى قازاقستان مەن قىرعىزستاننىڭ ستراتەگيالىق سەرىكتەستىك جانە وداقتاستىق قارىم-قاتىناسىن جان-جاقتى دامىتۋعا بەيىل ەكەنىن راستادى.
