مەملەكەت باسشىسى ءوز سوزىندە وسى ماڭىزدى ءىس-شارانى ۇيىمداستىرۋعا باستاماشى بولعانى ءۇشىن پرەمەر-مينيستر شاحباز شاريفكە العىس ايتتى، - دەپ حابارلايدى alnews.
– پاكىستانعا جاساعان العاشقى مەملەكەتتىك ساپارىم ەكىجاقتى ىنتىماقتاستىقتىڭ ايتۋلى تاريحي كەزەڭىنە اينالدى. ءبىز سەرىكتەستىگىمىزدى ستراتەگيالىق دەڭگەيگە كوتەرۋگە ارنالعان بىرلەسكەن دەكلاراسياعا قول قويدىق. بۇگىنگى بيزنەس فورۋم بارىسىندا جالپى سوماسى 200 ميلليون دوللارعا جۋىق 30-دان اسا كەلىسىم جاسالدى. بۇل باۋىرلاس حالىقتارىمىزدىڭ ساۋدا-ەكونوميكالىق جانە ينۆەستيسيالىق ىقپالداستىعىن ودان ءارى نىعايتۋعا تىڭ سەرپىن بەرەدى. شىن مانىندە، سەرىكتەستىگىمىز ۇدايى كەڭەيىپ كەلەدى. بىلتىر ەكى ەل اراسىنداعى تاۋار اينالىمى ەكى ەسەگە جۋىق ءوستى. قازاقستاندا پاكىستان كاپيتالىنىڭ ۇلەسى بار 200-دەن استام كومپانيا قۇرىلىس، اۋىل شارۋاشىلىعى، تاعام ونەركاسىبى، يندۋستريا جانە باسقا دا كوپتەگەن سالادا جۇمىس ىستەيدى. وسى وڭ ۇردىسكە ارقا سۇيەي وتىرىپ، ەكىجاقتى ساۋدا كولەمىن 1 ميلليارد دوللارعا دەيىن ۇلعايتۋدى كوزدەيتىن ءورشىل ماقسات قويدىق، – دەدى قاسىم-جومارت توقايەۆ.
پرەزيدەنت ۇكىمەتكە ەكى ەلدىڭ بيزنەس قۇرىلىمدارى اراسىنداعى، سونىڭ ىشىندە قازاقستان مەن پاكىستان ۇكىمەتارالىق كوميسسياسى اياسىنداعى ىقپالداستىقتى جانداندىرۋدى تاپسىرعانىن جەتكىزدى.
– قازاقستان ورتالىق ازياداعى ەكونوميكاسى ءىرى ەل رەتىندە وڭىرلىك ءوسىمدى قامتاماسىز ەتۋگە جانە تىڭ مۇمكىندىكتەرگە جول اشۋعا ۇلكەن ۇلەس قوسىپ كەلەدى. بىلتىر ەكونوميكامىز 6،5 پايىزعا ارتىپ، ناتيجەسىندە ىشكى جالپى ءونىم كولەمى 300 ميلليارد دوللار مەجەسىنەن استى. ال جان باسىنا شاققاندا ىشكى جالپى ءونىم كولەمى 15 مىڭ دوللارعا جەتتى. بۇل ءبىزدىڭ نارىقتىڭ ورنىقتى جانە ەكونوميكالىق الەۋەتى جوعارى ەكەنىن كورسەتەدى. ءبىز ينستيتۋسيونالدىق قۇرىلىمداردى دايەكتى تۇردە جەتىلدىرۋ ارقىلى وركەندەپ كەلەمىز. ەكونوميكالىق ستراتەگيامىز ساۋدا مەن ينۆەستيسيانى ءارتاراپتاندىرۋعا، يننوۆاسيالاردى ىنتالاندىرۋعا جانە بىلىمگە نەگىزدەلگەن دامۋ مودەلىن ىلگەرىلەتۋگە باعىتتالعان. مەن جەتەكشىلىك ەتەتىن شەتەلدىك ينۆەستورلار كەڭەسى قازاقستانداعى اشىقتىق، ادىلدىك قاعيداتتارىنا جانە ىسكەرلىك كليماتتى ۇدايى جاقسارتۋعا بەيىل. «ءبىر تەرەزە» قاعيداتىمەن جۇمىس ىستەيتىن ۇلتتىق سيفرلىق ينۆەستيسيالىق پلاتفورما ينۆەستورلار مەن بيزنەسكە ارنالعان ۇدەرىستەردى ايتارلىقتاي جەڭىلدەتەدى، – دەدى مەملەكەت باسشىسى.
قاسىم-جومارت توقايەۆ استانا حالىقارالىق قارجى ورتالىعى ينۆەستيسيا، يننوۆاسيا جانە كورپوراتيۆتىك قىزمەت كورسەتۋ سالالارى بويىنشا وڭىردەگى جەتەكشى ورتالىق سانالاتىنىنا توقتالدى.
– بۇگىندە 100-گە جۋىق ەلدەن 5 مىڭنان استام كومپانيا وسى پلاتفورما اياسىندا تابىستى جۇمىس ىستەپ جاتىر. ەرەكشە اتاپ وتەتىن جايت، ەكوجۇيەگە پاكىستاننىڭ 11 كومپانياسى قوسىلعان. قاتىسۋشىلار قاتارى الداعى ۋاقىتتا دا كوبەيەدى دەپ سەنەمىز. قازاقستان، سونداي-اق ءوڭىر نارىعىنا شىققىسى كەلەتىن پاكىستاندىق كاسىپكەرلەرگە سەنىمدى ءارى اشىق مۇمكىندىكتەر ۇسىنامىز. تۇراقتى ينۆەستيسيالىق قۇرىلىمدى ۇدايى جەتىلدىرىپ وتىرامىز، – دەدى پرەزيدەنت.
مەملەكەت باسشىسىنىڭ پىكىرىنشە، قازاقستان مەن پاكىستاننىڭ گەوگرافيالىق ورنالاسۋى ستراتەگيالىق تۇرعىدان ماڭىزدى. ەكى ەل دە وڭىرلىك جانە جاھاندىق بايلانىستىڭ باستى بۋىنى بولا الادى.
– ەۋرازيا جۇرەگىندە ورنالاسقان قازاقستان قۇرلىق ارقىلى ساۋدا-ساتتىقتا ەلەۋلى ءرول اتقارادى. ەۋروپا مەن جۇڭگو اراسىندا قۇرلىق جولدارىمەن تاسىمالداناتىن جۇكتىڭ 85 پايىزى ءبىز ارقىلى وتەدى. قازىرگى ۋاقىتتا ترانسكاسپيي حالىقارالىق كولىك باعدارىن نەمەسە ورتا ءدالىزدى دامىتۋ ەلىمىزدى ترانسكونتينەنتالدىق ساۋدانىڭ ءىرى ورتالىعىنا اينالدىراتىن نەگىزگى فاكتور رەتىندە قاراستىرامىز. سونداي-اق ترانزيت اعىنىن اناعۇرلىم ءتيىمدى ۇيلەستىرۋدى كوزدەيتىن Smart Cargo ءبىرىڭعاي سيفرلىق باسقارۋ پلاتفورماسىن ازىرلەدىك. بۇل رەتتە «قازاقستان تەمىر جولى» ۇلتتىق وپەراتورى، «قازپوشتا» اكسيونەرلىك قوعامى مەن پاكىستاننىڭ ۇلتتىق لوگيستيكا كورپوراسياسى جانە Pakistan Post كومپانياسى اراسىندا كەلىسىمگە قول قويىلۋىن قۇپتايمىن. ولاردان مۋلتيمودالدى كولىك شەشىمدەرىن ىلگەرىلەتۋگە جانە ەلدەرىمىزدىڭ پورت ينفراقۇرىلىمىن بىرلەسە پايدالانۋعا جول اشاتىن ناقتى قادامدار كۇتەمىز، – دەدى قاسىم-جومارت توقايەۆ.
پرەزيدەنت قازاقستان مەن پاكىستان ازىق-تۇلىك قاۋىپسىزدىگى جونىندەگى يسلام ۇيىمىنا مۇشە ەلدەر رەتىندە مۇسىلمان مەملەكەتتەرىنە ارنالعان ورنىقتى ءارى ءادىل ازىق-تۇلىك جۇيەسىن قۇرۋ جولىندا ورتاق ماقساتقا جۇمىلاتىنىن اتاپ ءوتتى.
– الەمنىڭ 70-تەن اسا ەلىنە اۋىل شارۋاشىلىعى ونىمدەرىنىڭ 200-دەن استام ءتۇرىن ەكسپورتتايمىز. سوڭعى ون جىلدا اۋىل شارۋاشىلىعى ءوندىرىسىنىڭ جالپى ىشكى كولەمى 2،5 ەسەدەن اسا كوبەيدى. 2030 جىلعا قاراي بۇل كورسەتكىشتى ەكى ەسە ارتتىرۋعا نيەتتىمىز. جوعارى ساپالى جانە ەكولوگيالىق تازا اۋىل شارۋاشىلىعى ءونىمىن شىعاراتىن سەنىمدى جەتكىزۋشى رەتىندەگى پوزيسيامىزدى نىعايتىپ كەلەمىز. سول سەبەپتى سەرىكتەستىك بايلانىستاردى كەڭەيتىپ، وڭىرلىك ءارى جاھاندىق دەڭگەيدە جاڭا جەتكىزۋ تىزبەگىن قۇرۋ ءۇشىن جۇيەلى قادامدار جاسايمىز. وسى ورايدا پاكىستاندىق ارىپتەستەرىمىزدىڭ اتالعان سەكتورداعى تاجىريبەسىن ءبولىسىپ، كاپيتال قۇيماق نيەتىن قۇپتايمىز. جەتىسۋ وبلىسىندا قانت قىزىلشاسىن وڭدەۋ زاۋىتىن ىسكە قوسۋ تۋرالى Almoiz Group كومپانياسىمەن جاسالعان كەلىسىم – وسى ىنتىماقتاستىقتىڭ ماڭىزدى باستاماسى، – دەدى مەملەكەت باسشىسى.
قاسىم-جومارت توقايەۆ سيفرلاندىرۋ ەلدەرىمىز اراسىنداعى ساۋدا جانە ينۆەستيسيالىق ىنتىماقتاستىق سالالارى بويىنشا پروگرەستىڭ نەگىزگى فاكتورىنا اينالادى دەپ پايىمدايدى. پرەزيدەنت پاكىستان ۇكىمەتىنىڭ وزىق سيفرلىق شەشىمدەر ەنگىزۋ جونىندەگى شارالارىنا جوعارى باعا بەردى.
– پرەمەر-مينيستر شاحباز شاريف پاكىستان ەكونوميكاسىن بولاشاقتا باسەكەگە قابىلەتتى ەتۋ ءۇشىن سيفرلىق ترانسفورماسيانىڭ ماڭىزدى ءرول اتقاراتىنىن ۇدايى ايتىپ كەلەدى. قازاقستان بۇل كورەگەن ۇستانىمدى قۇپتايدى ءارى ەكى ەل ءۇشىن دە سيفرلىق يننوۆاسيالاردىڭ الەۋەتى زور دەپ بىلەدى. ءبىز الداعى بىرنەشە جىلدا تولىق سيفرلىق ەلگە اينالۋ جونىندە ءورشىل ماقسات قويدىق. وعان قول جەتكىزۋ ءۇشىن وڭىردەگى العاشقى جاساندى ينتەللەكت جانە سيفرلىق دامۋ مينيسترلىگىن قۇردىق. يننوۆاسيانىڭ، زەرتتەۋ مەن تەحنولوگيالىق پروگرەستىڭ جەتەكشى پلاتفورماسى رەتىندە قىزمەت ەتەتىن حالىقارالىق جاساندى ينتەللەكت ورتالىعىن اشتىق. Alatau City كەشەندى قۇقىقتىق، سيفرلىق جانە قارجىلىق ەكوجۇيە قالىپتاستىرادى. بۇل ەلىمىزدەگى قالالاردى دامىتۋدا ماڭدايالدى جوبا بولماق. سونىمەن قاتار ەكونوميكانىڭ يننوۆاسيالىق جانە پەرسپەكتيۆتى سەكتورلارىندا ورنىقتى دامىتۋدى ىنتالاندىرىپ، قارجى تارتادى. بىلتىر ەكى سۋپەركومپيۋتەردى ىسكە قوستىق. بۇل اۋقىمدى دەربەس تىلدىك مودەلدەردى ازىرلەۋ جانە قازاقستانداعى تەحنولوگيالىق پروگرەستى جەدەلدەتۋ ىسىندە ماڭىزدى قادامعا اينالدى. ءبىزدىڭ كۇش-جىگەرىمىز ۇلتتىق، ءتىپتى جاھاندىق دەڭگەيدەگى ءىرى IT كومپانيالاردىڭ قۇرىلۋىنا ىقپال ەتتى. مىسالى، قازاقستاندىق InDrive پلاتفورماسى پاكىستاندا كەڭىنەن پايدالانىلادى. بىلتىرعى كورسەتكىش بويىنشا، قوسىمشا پاكىستانداعى تاكسي نارىعىنىڭ 60 پايىزدان استامىن يەلەنگەن. وسىلايشا، قالا ىشىندەگى قوزعالىستا ءبىرىنشى ورىنعا شىققان. پاكىستاندىق سەرىكتەستەردى IT جانە ينۆەستيسيا سالالارىنداعى مۇمكىندىكتەرىمىزدى پايدالانۋعا شاقىرامىن، – دەدى پرەزيدەنت.
قاسىم-جومارت توقايەۆ ەكى ەل اراسىنداعى سەرىكتەستىك جاڭا كەزەڭگە قادام باسقانىن جانە ەكونوميكادا ەكىجاقتى كۇن ءتارتىبىنىڭ بارلىق سالاسىن قامتيتىن بايلانىستى تەرەڭدەتۋگە مول مۇمكىندىك بار ەكەنىن اتاپ ءوتتى.
پاكىستان پرەمەر-مينيسترى ەكى ەلدىڭ ساۋدا-ەكونوميكالىق جانە ينۆەستيسيالىق ىقپالداستىعىن تەرەڭدەتۋ تۇرعىسىنان بۇگىنگى بيزنەس فورۋمنىڭ ماڭىزدىلىعىنا نازار اۋداردى.
– بۇگىن ءبىز تاۋار اينالىمىن الداعى ەكى جىلدا 1 ميلليارد دوللارعا جەتكىزۋ ءۇشىن بارىنشا ارەكەت ەتۋگە ۋاعدالاستىق. وسى ماقساتقا تەزىرەك جەتۋ جولىندا قولدا بار مۇمكىندىكتىڭ ءبارىن پايدالانۋعا كەلىستىك. بيىل دوستاس قازاقستانعا ساپارمەن كەلۋگە شاقىرعانى ءۇشىن ءقادىرلى باۋىرىما ريزاشىلىعىمدى بىلدىرەمىن. بۇل شاقىرۋدى زور قۋانىشپەن جانە ەرەكشە ىقىلاسپەن قابىل الدىم. ءبىز ءوزارا جۇمىس توبىن قۇرۋ جونىندە شەشىم قابىلدادىق. بۇل توپقا ورتاق ساۋدا جانە ينۆەستيسيالىق پورتفەلدى كەڭەيتۋ جونىندە بەسجىلدىق باعدارلامانى ازىرلەۋ تاپسىرىلادى، – دەدى شاحباز شاريف.
قازاقستان-پاكىستان بيزنەس فورۋمىنىڭ قورىتىندىسى بويىنشا جالپى سوماسى 200 ميلليون دوللارعا جۋىق 30-دان استام كوممەرسيالىق قۇجاتقا قول قويىلدى. كەلىسىمدەردە ەكى ەلدىڭ قارجى، لوگيستيكا، ونەركاسىپ، ەنەرگەتيكا، اگروونەركاسىپ كەشەنى، سيفرلاندىرۋ جانە ينفراقۇرىلىم سالالارىنداعى ىنتىماقتاستىعىن كەڭەيتۋ كوزدەلگەن.
