الماتىنىڭ المالى اۋدانىنداعى تاستاق شاعىناۋدانىندا ورنالاسقان «اسىل» ساۋدا ورتالىعىندا قالا كۇنى اياسىندا قالالىق كىتاپحانالاردىڭ جاڭا كىتاپ بەرۋ پۋنكتى اشىلدى، - دەپ حابارلايدى alnews.
جوبا مەملەكەت باسشىسى قاسىم-جومارت توقايەۆتىڭ «وقيتىن ۇلت» جوباسى اياسىندا، قالا اكىمى دارحان ساتىبالدىنىڭ تاپسىرماسىمەن جۇزەگە اسىرىلىپ جاتىر. جوبانىڭ ماقساتى – كىتاپتى قالا تۇرعىندارىنا بارىنشا قولجەتىمدى ەتۋ، وقۋعا دەگەن قىزىعۋشىلىقتى ارتتىرۋ جانە كىتاپ وقۋ مادەنيەتىن دامىتۋ.
كىتاپ بەرۋ پۋنكتىنىڭ اشىلۋ راسىمىنە المالى اۋدانى اكىمىنىڭ ورىنباسارى ولجاس قۇرمانبەك ۇلى، قازاقستاننىڭ ەڭبەك سىڭىرگەن قايراتكەرى ساۋلە دوسجان، قازاقستان جازۋشىلار وداعىنىڭ مۇشەسى، اقىن ءارى جازۋشى بەيبىت سارىباي، جۋرناليست ءارى جازۋشى بايان بولاتحانوۆا، مادەنيەت سالاسىنىڭ وكىلدەرى مەن قالا تۇرعىندارى قاتىستى.
ءىس-شارا بارىسىندا شىعارماشىلىق زيالى قاۋىم وكىلدەرى كىتاپتىڭ ادام ءومىرى مەن قوعامداعى رولىنە توقتالىپ، ادەبيەتتى كوپشىلىككە جاقىنداتۋدىڭ جانە كىتاپ وقۋعا دەگەن قىزىعۋشىلىقتى ارتتىرۋدىڭ ماڭىزىن اتاپ ءوتتى.
قازاقستاننىڭ ەڭبەك سىڭىرگەن قايراتكەرى ساۋلە دوسجان كىتاپ بەرۋ پۋنكتىنىڭ ساۋدا ورتالىعىندا اشىلۋى تۇرعىندار ءۇشىن ماڭىزدى ەكەنىن ايتتى.
«بۇگىن المالى اۋدانىندا تۇرعىندار ءۇشىن ماڭىزدى ءارى قولجەتىمدى مادەني كەڭىستىك اشىلىپ وتىر. كوپشىلىك ءجيى كەلەتىن ساۋدا ورتالىعىنا كىتاپحانانى جاقىنداتۋ – كىتاپ وقۋدى كۇندەلىكتى ءومىردىڭ ءبىر بولىگىنە اينالدىرۋعا باعىتتالعان جاقسى باستاما. وسىنداي جوبالاردىڭ كوبەيۋى تۇرعىنداردىڭ كىتاپقا دەگەن قىزىعۋشىلىعىن ارتتىرىپ، كىتاپ وقۋ مادەنيەتىنىڭ ودان ءارى دامۋىنا ىقپال ەتەدى دەپ سەنەمىن»، – دەدى ساۋلە دوسجان.
بۇعان دەيىن «ادەم» ساۋدا ورتالىعىندا العاشقى كىتاپ بەرۋ پۋنكتى اشىلعان بولاتىن. تۇرعىندار مەن كاسىپكەرلەر تاراپىنان قولداۋ تاۋىپ، وقىرمانداردىڭ قىزىعۋشىلىعىن ارتتىرعان باستاما ەندى قالانىڭ باسقا اۋداندارىندا دا جالعاسىن تابادى. الداعى ۋاقىتتا وسىنداي كىتاپ بەرۋ پۋنكتتەرىن وزگە ساۋدا ورتالىقتارىندا اشۋ جوسپارلانعان.
جاڭا كىتاپ بەرۋ پۋنكتىنىڭ اشىلۋىن جەرگىلىكتى كاسىپكەرلەر دە جىلى قابىلدادى.
«جۇمىس ورنىمىزدا كىتاپ بەرۋ پۋنكتىنىڭ اشىلعانىنا قۋانىشتىمىن. مۇندا موتيۆاسيالىق جانە كاسىبي كىتاپتاردى الىپ وقۋعا، سونداي-اق كاسىبىمىزدى دامىتۋعا كومەكتەسەتىن ادەبيەتتەرمەن تانىسۋعا مۇمكىندىك بار. مەنىڭشە، بۇل ءبىز ءۇشىن ۇلكەن مۇمكىندىك. وسىنداي يگى باستاما ءۇشىن الماتى اكىمدىگى مەن قالالىق كىتاپحانالارعا مىڭ العىس!» – دەدى كاسىپكەر ازامات ىڭكاروۆ.
ءقازىر كىتاپ بەرۋ پۋنكتىنىڭ قورىندا 2 000-نان استام كىتاپ بار. وقىرماندار كوركەم ادەبيەتتەن باستاپ بالالارعا ارنالعان جانە تانىمدىق باسىلىمدارعا دەيىن تالعامىنا ساي كىتاپ تاڭداي الادى.
جاڭا كىتاپ بەرۋ پۋنكتى سارسەنبى مەن دۇيسەنبى ارالىعىندا ساعات 10:00-دەن 19:00-گە دەيىن جۇمىس ىستەيدى. سەيسەنبى – دەمالىس كۇنى.
