سولتۇستىك اتلانتيكالىق شارت ۇيىمىنىڭ 2024 جىلعى ءسامميتى ءدال بۇگىن، 9 شىلدە كۇنى ۆاشينگتوندا وتپەك. 3 كۇندىك جيىننىڭ نەگىزگى تالقى تاقىرىبى ارينە ۋكراينا-رەسەي ماسەلەسىنە ارنالارى انىق. دەگەنمەن، امەريكا قۇراما شتاتتارى 2019 جىلى ءوزىنىڭ ءۇندى-تىنىق مۇحيت ايماعىنا ارنالعان جاڭا ستراتەگياسىن جاريالاعاننان بەرى ناتو جينالىستارىندا قىتايعا نازار اۋدارۋدى ءجيى قايتالاپ كەلەدى. بۇل جولى دا ۆاشينگتون تارابى قىتايدىڭ الىپ تەڭىز-مۇحيتتاعى جانە ءار ايماقتارداعى ءوسىپ كەلە جاتقان ىقپالىنا قاتىستى ءوز ەسەبىن ورتاعا سالىپ، ۇيىم نازارىن بۇرۋدى كوزدەيتىنى كۇتىلۋدە.
امەريكالىق باسىلىمداردىڭ جازۋىنشا، ءوزىنىڭ تاريحىندا ماسكەۋدى ورتالىق ەتكەن وزىنە ءقاۋىپتى كۇشتەرگە قارسى قۇرىلعان ۇيىمنىڭ بۇگىنگى نازارىندا جۇڭگو دا بار. ناتو-نىڭ قىتايعا كوڭىل بۇرۋىنىڭ سەبەبى وزدىگىنەن تۇسىنىكتى. قۇراما شتاتتار سوڭعى جىلدارى رەسەيدەن كورى قىتايدى ءوزىنىڭ ەڭ ءقاۋىپتى ستراتەگيالىق باسەكەلەسى ساناپ كەلە جاتىر. ءارى ءۇندى-تىنىق مۇحيتىنداعى باسىمدىلىققا جەتۋ ءۇشىن بارلىق مۇمكىندىكتەردى قاراستىرۋدا.
سونىڭ ىشىندە ايماقتاعى ەلدەرمەن اسكەري جانە ساياسي ىنتىماقتاستىقتى دامىتۋ، ءتىپتى ايماقتىق جاڭا وداق قالىپتاستىرۋعا ۇمتىلىستارى دا كورىنەدى. ايتالىق، اۋستراليا، ءۇندىستان جانە جاپونيانىڭ باسىن بىرىكتىرگەن جاڭا ديالوگ الاڭىن كەي ساراپشىلار بولاشاقتا قىتايعا قارسى جاڭا اليانسقا داميدى دەپ بولجايدى.
بۇدان تىس ناتو-نىڭ ەڭ ءىرى قارجىلاندىرۋشىسى رەتىندە اقش-تىڭ ۇيىمداعى بەدەلى جوعارى. ءتىپتى، ناتو ۆاشينگتون سىرتقى ساياساتىن جۇزەگە اسىرۋشى نەگىزگى الاڭداردىڭ ءبىرى دەۋگە دە بولادى. بۇل مۇمكىندىكتەن پايدالانا وتىرىپ اقش قىتايدىڭ ءوسىپ كەلە جاتقان قاتەرىنە قارسى ناتو وداقتاستارىندا جۇمىلدىرۋدى ارتىق كورمەيدى.
ونىڭ ۇستىنە قىتايدىڭ قوس ماقساتتا پايدالانۋعا بولاتىن ەكسپورتتىق ونىمدەرى رەسەيدىڭ اسكەري ونەركاسىپ بازاسىن قامتاماسىز ەتىپ جاتقان تۇستا، جۇڭگو ناتو مۇشەلەرى ءۇشىن رەسەيدىڭ سوعىسىن استىرتىن قارجىلاندىرۋشى تاراپ رەتىندە قاراستىرىلارى انىق.
كەزەكتى ۆاشينگتونداعى سامميتتە قىتايعا قارسى قاتاڭ مالىمدەمەلەر بولۋى مۇمكىن. بۇعان دەيىن دە ۇيىمنىڭ باس حاتشىسى يەنس ستولتەنبەرگ بەيجىڭگە قاراتا قاتاڭ مالىمدەمەلەرىن جاساپ ۇلگىرگەن بولاتىن. ول قىتايدى ەكى تاراپقا بىردەي جاقسى اتتانۋعا تىرىسۋدى توقتاتۋعا شاقىرعان. ول: "بەيجىڭ تاڭداۋ جاساۋى كەرەك، بەيجىڭ ەكى جولعا دا يە بولا المايدى. بەلگىلى ءبىر كەزەڭدە جۇڭگو باعىتىن وزگەرتپەسە، ناتو وداقتاستارى ونىڭ قۇنىن تولەۋگە ءماجبۇر بولادى" – دەپ ەسكەرتكەن. ال بولجامدارعا سەنسەك بۇل جولى ودان دا سالماقتى مالىمدەمەلەر جاسالۋى مۇمكىن.
ارينە، ءۇش كۇندىك جينالىستىڭ نەگىزگى تاقىرىبىندا ۋكرايناعا قولداۋ كورسەتۋدى قالاي جالعاتسىرۋعا بولاتىنى ەڭ نەگىزگى ماسەلە بولىپ قالا بەرەدى. كەزەكتى سامميتتەن كەيىن باتىس پەن شىعىس اراسىنداعى شيەلەنىس تاعى ءبىر ساتى جوعارىلاي ءتۇسۋى بەك مۇمكىن.
