الماتىدا س. اسفەندياروۆ اتىنداعى قازاق ۇلتتىق مەديسينا ۋنيۆەرسيتەتىنىڭ ءبىرىنشى كۋرس ستۋدەنتتەرىنىڭ قاتىسۋىمەن "جارقىن بولاشاق" قالالىق پروفيلاكتيكالىق فورۋمى ءوتتى، - دەپ حابارلايدى Alnews Polisia.kz-كە سىلتەمە جاساپ.
ءىس-شارانى الماتى قالاسى پوليسيا دەپارتامەنتىنىڭ ەسىرتكى قىلمىسىنا قارسى ءىس-قيمىل باسقارماسى، قازاقستان رەسپۋبليكاسى ىشكى ىستەر مينيسترلىگى، س. اسفەندياروۆ اتىنداعى قازۇمۋ، الماتى قالاسى بويىنشا ەكونوميكالىق تەرگەپ-تەكسەرۋ دەپارتامەنتى جانە قالالىق جاستار ساياساتى باسقارماسى بىرلەسىپ ۇيىمداستىردى.
فورۋم بارىسىندا ستۋدەنتتەرگە ينتەرنەت پەن مەسسەندجەرلەر ارقىلى جاستاردى ەسىرتكىنىڭ زاڭسىز اينالىمىنا تارتۋدىڭ زاماناۋي تاسىلدەرى ءتۇسىندىرىلدى. سونىمەن قاتار مۇنداي قىلمىستار ءۇشىن كوزدەلگەن جاۋاپكەرشىلىك، دروپپەرلىك، ينتەرنەت-الاياقتىق، ويىنعا تاۋەلدىلىك جانە وزگە دە سيفرلىق قاۋىپتەردىڭ الدىن الۋ ماسەلەلەرى قوزعالدى.
كەزدەسۋدە جاستاردى قىلمىستىق ارەكەتكە تارتۋ بەلگىلەرىن دەر كەزىندە تانىپ، قۇقىققا قايشى كونتەنتكە ءقاۋىپسىز ءارى ساۋاتتى ارەكەت ەتۋدىڭ ماڭىزىنا ەرەكشە نازار اۋدارىلدى. قاتىسۋشىلارعا پروفيلاكتيكالىق بەينەماتەريالدار كورسەتىلىپ، اشىق فورماتتا سۇراق-جاۋاپ ۇيىمداستىرىلدى.
فورۋم پوليسيا مەن جاستار اراسىنداعى تىكەلەي بايلانىستى نىعايتىپ، وزەكتى ماسەلەلەردى اشىق تالقىلاۋعا مۇمكىندىك بەرەتىن ماڭىزدى الاڭعا اينالدى. ءىس-شارانىڭ نەگىزگى ماقساتى – جاستاردىڭ قۇقىقتىق ساۋاتتىلىعىن ارتتىرۋ، جاۋاپتى مىنەز-قۇلىق مادەنيەتىن قالىپتاستىرۋ جانە قىلمىستىق ارەكەتتىڭ كەز كەلگەن تۇرىنە جول بەرمەۋ ۇستانىمىن نىعايتۋ.
