قاتەرلى ىسىك قازىرگى زاماننىڭ ەڭ اۋىر اۋرۋلارىنىڭ ءبىرى جانە ونىڭ بەلگىلەرىن ەرتە ساتىسىندا انىقتاپ، ۋاقىتىلى ەم-دوم قابىلداۋ ماڭىزدى ءرول اتقارادى.
ماماندار سوزىنە سۇيەنسەك، مەديسينالىق تەكسەرۋلەر مەن تالداۋلار قاتەرلى ىسىك اۋرۋىن انىقتاۋدىڭ نەگىزگى ءادىسى بولعانىمەن، سىرتقى تۇردەگى كەيبىر وزگەرىستەر دە ونىڭ دامۋ ىقتيمالدىعىن كورسەتۋى مۇمكىن. سوندىقتان، ماسەلەن، تەرىدەگى كەيبىر وزگەرىستەر قاتەرلى ىسىكتىڭ ءبىرىنشى بەلگىسى بولۋى مۇمكىن.
«تەرىدە جاڭا مەڭنىڭ پايدا بولۋى، بۇرىننان بار مەڭ مولشەرىنىڭ نە ءپىشىنىنىڭ وزگەرۋى، اسسيمەتريا، جيەگى نە ءتۇسىنىڭ وزگەرۋى تەرى قاتەرلى ىسىگىنىڭ دامۋىنىڭ كورسەتكىشى بولۋى مۇمكىن. سونىمەن قاتار، ۇزاق ۋاقىت بويى جازىلمايتىن كەز كەلگەن جارا مەن ويىق جاراعا نازار اۋدارىڭىز. اسىرەسە، ودان قان كەتسە نە قوڭىر ءتۇستى بولسا. ءسۇت بەزىنىڭ ءپىشىنى نەمەسە كولەمىنىڭ وزگەرۋى ءسۇت بەزى قاتەرلى ىسىگىنىڭ كورسەتكىشى بولۋى مۇمكىن. ءتۇزىلىمدى انىقتاۋ، ەمىزىك ءپىشىنىنىڭ وزگەرۋى، ونىڭ تارتىلۋى نە ءبولىنىستىڭ شىعۋى ءقاۋىپتى بەلگى بولۋى ىقتيمال»، – دەيدى الماتى ونكولوگيالىق ورتالىعىنىڭ ونكولوگ-دارىگەرى نايليا اقجولوۆا.
ناقتى سەبەپسىز، كەنەتتەن سالماق جوعالتۋ، سونداي-اق باسقا سەبەپپەن تۇسىندىرۋگە بولمايتىن ۇزاق شارشاۋ نەمەسە السىزدىك قاتەرلى ىسىكتىڭ دامۋ ىقتيمالدىعىنىڭ سيگنالى بولۋى مۇمكىن. زاردەگى، قانداعى نەمەسە ناجىستەگى وزگەرىستەر دە ءمان بەرەتىن جاعداي. ماسەلەن، زاردەگى نەمەسە ناجىستەگى قان نە ءزاردىڭ ءيىسى نە ءتۇسىنىڭ ەرەكشە وزگەرىسى بايىپتى تۇردە قابىلدانىپ، دارىگەرمەن تالقىلانۋى كەرەك.
«ارينە، قاتەرلى ىسىكتىڭ دامۋ ىقتيمالدىعىن كورسەتەتىن سىرتقى بەلگىلەر تۋرالى ويلاعان كەزدە، ولار مەديسينالىق تەكسەرۋلەرمەن جانە سىناقتارمەن بىرگە اۋرۋدى ەرتە كەزەڭدە انىقتاۋعا كومەكتەسەتىنىن ەستە ۇستاعان ءجون. بۇل ءساتتى ەمدەۋ مۇمكىندىگىن ايتارلىقتاي ارتتىرادى. ءوزىن-وزى كۇتۋ، ۇنەمى مەديسينالىق تەكسەرۋدەن ءوتۋ جانە دارىگەرگە ۋاقىتىلى كورىنۋ دەنساۋلىقتى ساقتاۋدىڭ جانە قاتەرلى ىسىكپەن كۇرەسۋدىڭ ماڭىزدى قۇرامداس بولىگى بولىپ تابىلادى»، – دەيدى نايليا بۇرحاندين قىزى.
