بريۋسسەلدە ەۋروپالىق وداققا مۇشە مەملەكەتتەر ىسكەرلىك ورتا وكىلدەرىنىڭ قاتىسۋىمەن «قازاقستان – ەو» دوڭگەلەك ۇستەلى ۇيىمداستىرىلدى، - دەپ حابارلايدى alnews.
قاسىم-جومارت توقايەۆ جيىنعا قاتىسۋشىلار الدىندا ءسوز سويلەپ، قازاقستان مەن ەو اراسىنداعى قارىم-قاتىناس شىنايى ستراتەگيالىق سيپاتقا يە بولعانىن اتاپ ءوتتى.
– بۇگىندە ەۋروپالىق وداق ەلىمىزدىڭ ەڭ ءىرى ساۋدا جانە ينۆەستيسيالىق سەرىكتەسى سانالادى، ونىڭ ۇلەسىنە قازاقستانعا شەتەلدەن تىكەلەي تارتىلعان ينۆەستيسيانىڭ جارتىسىنا جۋىعى تيەسىلى. تەك وتكەن جىلدىڭ وزىندە ەكىجاقتى تاۋار اينالىمى 45 ميلليارد دوللاردان استى. بۇل جەتىستىك حالىقارالىق دەڭگەيدە مويىندالدى. بۇۇ ساۋدا جانە دامۋ ۇيىمىنىڭ (يۋنكتاد) دۇنيەجۇزىلىك ينۆەستيسيالار تۋرالى سوڭعى ەسەبىنە سايكەس، قازاقستان شەت ەلدەن تىكەلەي ينۆەستيسيا تارتۋ بويىنشا ورتالىق ازيادا ءبىرىنشى ورىنعا يە، سونداي-اق پوستكەڭەستىك كەڭىستىك پەن تەڭىزگە شىعاتىن جولى جوق دامۋشى ەلدەر اراسىندا كوشباسشىلىقتى ساقتاپ كەلەدى. قازاقستاندا 4 مىڭعا جۋىق ەۋروپالىق كومپانيا تابىستى جۇمىس ىستەيدى. ولاردىڭ كوبى، اسىرەسە، Airbus، Polpharma Group، Air Liquide Group، Škoda Group جانە Alstom سەكىلدى كومپانيالار ونداعان جىلداردان بەرى سەنىمدى سەرىكتەسكە اينالدى. سونىمەن بىرگە ءبىز ەۋروپالىق ينۆەستورلاردىڭ جاڭا بۋىنىن قۋانا قارسى الامىز. ولاردىڭ قاتارىندا Roca Group، Inditex، Maersk، Dewulf جانە Damen Shipyards Group سياقتى تانىمال كومپانيالار بار، – دەدى پرەزيدەنت.
