پرەزيدەنت قاسىم-جومارت توقايەۆ پاكىستانعا مەملەكەتتىك ساپارمەن كەلۋگە شاقىرعانى ءۇشىن پرەمەر-مينيستر شاحباز شاريفكە العىس ايتىپ، قازاق دەلەگاسياسىن قوناقجايلىقپەن قارسى العان پاكىستان حالقىنا ريزاشىلىعىن ءبىلدىردى. سونداي-اق تاريحى تەرەڭ، مادەنيەتى باي، حالىقارالىق ساحناداعى بەدەلى بيىك باۋىرلاس پاكىستانعا كەلگەنىنە قۋانىشتى ەكەنىن جەتكىزدى، - دەپ حابارلايدى alnews.
– پاكىستان – قازاقستاننىڭ وڭتۇستىك ازياداعى جانە ودان تىسقارى جەرلەردەگى سەنىمدى ءارى ماڭىزدى سەرىكتەسى. حالىقتارىمىزدى ۇلى جىبەك جولىنان باستاۋ العان تاعدىرلى بايلانىس پەن مادەني-رۋحاني ساباقتاستىق جالعاپ كەلەدى. ءبىزدىڭ قۇندىلىقتارىمىز بەن داستۇرلەرىمىز ۇندەس، نيەتىمىز بەن تىلەگىمىز ورتاق، مۇراتىمىز ءبىر. ۇكىمەتتەرىمىز بەن ىسكەرلىك ورتا دەڭگەيىندە سىندارلى ساياسي ديالوگ، ورنىقتى ەكونوميكالىق قاتىناستار قالىپتاسىپ، جۇيەلى تۇردە نىعايۋدا. بۇگىن ءقادىرلى پرەمەر-مينيستر مىرزامەن تاريحي قۇجاتقا – قازاقستان مەن پاكىستان اراسىندا ستراتەگيالىق سەرىكتەستىك ورناتۋ تۋرالى بىرلەسكەن دەكلاراسياعا قول قويدىق. بۇل قۇجات ءوزارا بايلانىستاردى جاڭا دەڭگەيگە كوتەرۋگە، سونداي-اق ەكىجاقتى جانە كوپجاقتى كۇن ءتارتىبىنىڭ بارلىق سپەكترى بويىنشا ىنتىماقتاستىقتى كەڭىنەن دامىتۋعا جول اشادى. ەلدەرىمىز اراسىنداعى دوستىق قاتىناستاردى جانە ءوزارا ءتيىمدى ىقپالداستىقتى تەرەڭدەتۋگە پاكىستان پرەمەر-مينيسترى شاحباز شاريف ايتارلىقتاي زور ۇلەس قوستى. سول ءۇشىن وعان العىس ايتامىن، – دەدى مەملەكەت باسشىسى.
قاسىم-جومارت توقايەۆ شاحباز ءشاريفتى ەلىن العا باتىل باستاعان كورەگەن كوشباسشى دەپ اتادى. ونىڭ كەلەشەككە باعدارلانعان ساليقالى ساياسات جۇرگىزۋىنىڭ ارقاسىندا يسلامابادتىڭ ايماقتاعى جانە الەمدەگى بەدەلى جىلدان جىلعا ارتىپ كەلەدى.
– بىلتىر پاكىستان بىرىككەن ۇلتتار ۇيىمى قاۋىپسىزدىك كەڭەسىنىڭ تۇراقتى ەمەس مۇشەسى بولىپ سايلاندى. ەلدىڭ سىندارلى ءارى جاۋاپتى قادامدارى ايماقتاعى بەيبىتشىلىك پەن تۇراقتىلىقتى نىعايتۋعا سەپتىگىن تيگىزدى. پاكىستاننىڭ ەكونوميكالىق الەۋەتى زور، ونەركاسىپتىك بازاسى دامىعان، كولىك-ترانزيت مۇمكىندىكتەرى مول. پاكىستاننىڭ اۋىل شارۋاشىلىعى، جەڭىل ونەركاسىبى، مەديسينا ونىمدەرى حالىقارالىق نارىقتا كەڭىنەن تارالعان. اسكەري-ونەركاسىپتىك كەشەنىنىڭ سەرپىندى دامۋى الەمدىك دەڭگەيدە تانىلعان. دوستاس حالىقتىڭ ءتۇرلى سالالارداعى ءاربىر جەتىستىگىنە شىن جۇرەكتەن ريزامىز، سىزدەرگە ءاردايىم تىلەكشىمىز، – دەدى قازاقستان پرەزيدەنتى.
مەملەكەت باسشىسى پرەمەر-مينيستر شاحباز شاريفپەن مازمۇندى ءارى ناتيجەلى كەلىسسوزدەر وتكىزگەنىنە توقتالدى.
– ىنتىماقتاستىعىمىزدىڭ ءتۇرلى باعىتتارىنا سەرپىن بەرەتىن ماڭىزدى ۇكىمەتارالىق قۇجاتتار قابىلداندى. ساۋدا، كولىك جانە لوگيستيكا، ونەركاسىپ، ەنەرگەتيكا، اقپاراتتىق تەحنولوگيالار، مادەني-گۋمانيتارلىق ماسەلەلەر جان-جاقتى تالقىلاندى. ساۋدا-ەكونوميكا سالاسىنداعى الىس-بەرىس كۇشەيىپ كەلەدى. بىلتىر ەكىجاقتى ساۋدا كورسەتكىشتەرى الدىڭعى جىلمەن سالىستىرعاندا ەكى ەسە ارتتى. بۇل باعىتتا ەلدەرىمىز اراسىنداعى «ساۋدا-ەكونوميكالىق ىنتىماقتاستىق جونىندەگى جول كارتاسى» (2025-2027 جىلدارعا ارنالعان) ءتيىمدى ىسكە اسىرىلىپ كەلەدى. ءبىز تاۋار اينالىمىن ارتتىرۋ ءۇشىن ناقتى شارالار قابىلداۋ جونىندە ۋاعدالاستىق. الداعى جىلدارى ونىڭ كولەمىن 1 ميلليارد دوللارعا جەتكىزۋ تۋرالى وتە ءورشىل ماقسات قويدىق. كاسىپكەرلەرىمىزدىڭ اراسىنداعى ءوزارا ءىس-قيمىلدى جانداندىرۋ ءۇشىن قولايلى جاعداي قالىپتاستىرۋدىڭ ماڭىزىن اتاپ وتتىك. اسىرەسە الىس-بەرىستى كەڭەيتۋ ماقساتىندا كولىك-لوگيستيكا سالاسىنداعى جوبالارعا باسىمدىق بەرەتىن بولدىق، – دەدى قاسىم-جومارت توقايەۆ.
كەلىسسوزدەر بارىسىندا پرەمەر-مينيستر پاكىستاننىڭ ترانزيتتىك جانە لوگيستيكالىق مۇمكىندىكتەرى كەڭەيىپ كەلە جاتقانىن، بۇل قازاقستاننىڭ حالىقارالىق نارىقتارعا شىعۋىنا بالاما جول بولا الاتىنىن اتاپ وتكەن.
– بۇل تۇرعىدا، پاكىستاننىڭ كاراچي جانە گۆادار پورتتارىنىڭ الەۋەتىن تالقىلادىق. باسىم مىندەتتەردىڭ ءبىرى رەتىندە ترانسكاسپيي كولىك ءدالىزىن دامىتۋدى، اۋعانستان ارقىلى وتەتىن ترانزيتتىك باعىتتى ىلگەرىلەتۋدى قاراستىردىق. وسى ورايدا قازاقستان – تۇرىكمەنستان – اۋعانستان – پاكىستان باعىتىنداعى تەمىر جول باعىتىن ىسكە اسىرۋ پەرسپەكتيۆاسىن تالقىلادىق، – دەدى مەملەكەت باسشىسى.
بۇدان بولەك، ەكى ەل اراسىنداعى تىكەلەي اۋە قاتىناسىن قايتا قوسۋ مۇمكىندىگى زەردەلەنەدى. بۇل بيزنەستى، ءتۋريزمدى دامىتۋ تۇرعىسىندا وتە وزەكتى.
– اگروونەركاسىپ كەشەنىندە ءوزارا الىس-بەرىستى ارتتىرۋعا جانە بىرلەسكەن وندىرىستەردى اشۋعا سەپتىگىن تيگىزەتىن ماڭىزدى كەلىسىمدەر جاسالدى. ەكى ەلدىڭ ونەركاسىپ سالاسىنداعى مۇمكىندىكتەرى مول. مەن پاكىستان كومپانيالارىن ەلىمىزدە تاۋارلار وندىرۋگە باعىتتالعان كاسىپورىندار اشۋعا شاقىردىم. قازىرگى ۋاقىتتا ولار اۋىل شارۋاشىلىعى، فارماسيەۆتيكا جانە قۇرىلىس ماتەريالدارى ونىمدەرىن وندىرۋگە قىزىعۋشىلىق تانىتۋدا، – دەدى قاسىم-جومارت توقايەۆ.
پرەزيدەنت قورعانىس ونەركاسىبى اياسىندا ءوزارا ءتيىمدى ىنتىماقتاستىقتىڭ باعىتتارىن دامىتۋعا كەلىسكەنىن ايتتى.
– كەيىنگى جىلدارى قاۋىپسىزدىك ورگاندارى جانە قۇقىق قورعاۋ قۇرىلىمدارى اراسىنداعى ىقپالداستىق قارقىندى دامۋدا. كەلىسسوز كەزىندە جاساندى ينتەللەكتىنى جانە سيفرلىق تەحنولوگيانى ەكونوميكاعا جاپپاي ەنگىزۋدىڭ ستراتەگيالىق ماڭىزى اتاپ ءوتىلدى. وسى سالادا بىرلەسىپ جۇمىس ىستەۋگە دايىن ەكەنىمىزدى راستادىق. پاكىستان يسلامدىق قارجىلاندىرۋ سالاسىندا الەمنىڭ جەتەكشى ەلدەرىنىڭ ءبىرى. استانا حالىقارالىق قارجى ورتالىعىندا ەۋرازيالىق كەڭىستىكتە حالال قارجىنى دامىتۋ ءۇشىن بارلىق جاعداي جاسالعان. وسى مۇمكىندىكتەردى پاكىستاننىڭ قارجى ينستيتۋتتارى دا ءتيىمدى پايدالانا الادى. سونىمەن قاتار ينۆەستيسيالىق ىنتىماقتاستىققا نازار اۋداردىق. بۇل باعىتتا بۇگىن «سامۇرىق-قازىنا» قورى جانە «Fauji Foundation» اراسىندا قۇرىلعان «بىرلەسكەن ينۆەستيسيالىق پلاتفورماسى» ناقتى جوبالاردى زەردەلەيتىن بولادى. جالپى، پاكىستاندىق كاسىپكەرلەرگە ەلىمىزدە قولايلى جاعداي جاساۋعا دايىنبىز، – دەدى قاسىم-جومارت توقايەۆ.
مەملەكەت باسشىسى قازاقستان-پاكىستان بيزنەس-فورۋمىنا قاتىساتىندارىن، جيىندا ەكى ەلدىڭ 250-دەن اسا كومپانيا جەتەكشىلەرى باس قوسىپ، ءبىرقاتار كوممەرسيالىق قۇجاتقا قول قويىلاتىنىن جەتكىزدى.
– بۇل ماڭىزدى ءىس-شارا ناتيجەلەرى ءوزارا ساۋدا-ەكونوميكالىق جانە ينۆەستيسيالىق قاتىناستارعا تىڭ سەرپىن بەرەتىنىنە سەنەمىن. سونداي-اق ەكى ەلدىڭ مادەني-گۋمانيتارلىق ىنتىماقتاستىعىن دامىتۋ ماسەلەسىن تالقىلادىق. ەلىمىزدىڭ جوعارى وقۋ ورىندارىنىڭ تانىمالدىلىعى پاكىستان جاستارى اراسىندا جىلدان جىلعا ارتىپ كەلەدى. قازىرگى ۋاقىتتا قازاقستاندا مىڭنان اسا پاكىستاندىق ستۋدەنت ءتۇرلى ماماندىقتار بويىنشا ءبىلىم الۋدا. وسى رەتتە عىلىم جانە ءبىلىم سالاسىنداعى بايلانىستى ودان ءارى دامىتۋعا ۋاعدالاستىق. يسلاماباد ۋنيۆەرسيتەتتەرىندە بۇگىن اشىلعان «ءال-فارابي»، «ساتپايەۆ» جانە «ياساۋي» ورتالىقتارى ەكى ەلدىڭ عىلىم جانە وقۋ-اعارتۋ سالالارىنداعى ىقپالداستىعىن نىعايتاتىن بولادى، – دەدى مەملەكەت باسشىسى.
قاسىم-جومارت توقايەۆ دەنساۋلىق ساقتاۋ جانە سپورت باعىتتارى بويىنشا ءوزارا ءىس-قيمىلدى كۇشەيتۋ ماڭىزدى ەكەنىنە ءمان بەردى.
– بۇگىن ءبىز قازاقستان-پاكىستان «دوستىق» سپورت كەشەنىن سالتاناتتى تۇردە اشتىق. اتالعان سپورت ورتالىعىندا قازاق كۇرەسى، توعىزقۇمالاق سياقتى قازاقتىڭ ۇلتتىق سپورت تۇرلەرى وقىتىلادى. سونداي-اق شاحمات، بوكس، ارالاس جەكپە-جەك بويىنشا دارىستەر ۇيىمداستىرىلادى. تۇراقتى تۇردە مادەني جانە سپورتتىق ءىس-شارالار وتكىزۋ باعدارلاماسىن قابىلدادىق. بۇل قادام قوس حالىقتىڭ ءبىر-بىرىن جاقىنىراق تانۋىنا سەپتىگىن تيگىزەدى دەپ سەنەمىن، – دەدى پرەزيدەنت.
مەملەكەت باسشىسى پرەمەر-مينيسترمەن بىرگە بەيبىتشىلىك پەن قاۋىپسىزدىكتى نىعايتۋ ماقساتىندا كۇش جۇمىلدىرۋعا دەن قويا وتىرىپ، حالىقارالىق جانە ايماقتىق ماسەلەلەردى تالقىلاعانىن ايتتى.
– ءبىز الەمنىڭ ءار تۇكپىرىندە جالعاسىپ جاتقان قاقتىعىستارعا الاڭداۋشىلىق بىلدىرەمىز. كوپتەگەن وزەكتى تاقىرىپتار بويىنشا ۇستانىمدارىمىز ۇقساس. كەز كەلگەن جانجالدى ديالوگ ارقىلى ديپلوماتيالىق جولمەن شەشۋ قاجەت دەپ سانايمىز. بىرىككەن ۇلتتار ۇيىمىنىڭ جارعىسى جانە حالىقارالىق قۇقىق نورمالارى قاتاڭ ساقتالۋعا جانە ءسوزسىز باسىمدىققا يە بولۋعا ءتيىس. قازىرگى گەوساياسي جاعدايدا كوپجاقتى ۇيىمدار اياسىندا ءوزارا قولداۋ كورسەتۋ جانە كونسۋلتاسيالار وتكىزۋ اسا ماڭىزدى. پاكىستان قازاقستاننىڭ ازياداعى ءوزارا ىقپالداستىق جانە سەنىم شارالارى كەڭەسى اياسىنداعى باستامالارىن ۇنەمى قولداپ كەلەدى. ءبىز بۇعان ريزاشىلىعىمىزدى بىلدىرەمىز. سونىمەن قاتار الەمدە بەيبىتشىلىك پەن تۇراقتىلىقتى ورناتۋ جولىندا ناقتى قادامداردى تالقىلادىق. وسى ورايدا، بۇگىن بىرىككەن ۇلتتار ۇيىمىنىڭ بىتىمگەرشىلىك ميسسيالارىنا بىرلەسىپ قاتىسۋ جونىندەگى ۇكىمەتارالىق مەموراندۋمعا قول قويىلدى. بۇل قۇجات حالىقارالىق بىتىمگەرشىلىك قىزمەتى بويىنشا ارىپتەستىگىمىزدى ودان ءارى كەڭەيتۋگە جول اشادى، – دەدى پرەزيدەنت.
مەملەكەت باسشىسىنىڭ ايتۋىنشا، بۇگىنگى ساپار ەكى ەلدىڭ ىنتىماقتاستىعىن ودان ءارى نىعايتا تۇسەتىنى انىق.
– بۇگىن ورناتىلعان ستراتەگيالىق سەرىكتەستىگىمىز بەن قول جەتكىزگەن ۋاعدالاستىقتارىمىز ەكى ەلدىڭ يگىلىگى ءۇشىن قىزمەت ەتەتىنىنە كامىل سەنەمىن. باۋىرلاس حالىقتارىمىزدىڭ دوستىعى بەرىك، باياندى بولىپ، بولاشاققا جالعاسا بەرسىن. مەنىڭ باۋىرىم، ءقادىرلى پاكىستان پرەمەر-مينيسترى شاحباز شاريف مىرزانىڭ بيىل قازاقستانعا مەملەكەتتىك ساپارمەن كەلۋىن اسىعا كۇتەمىن، – دەدى قاسىم-جومارت توقايەۆ.
شاحباز شاريف پاكىستان قازاقستاندى ورتالىق ازياداعى ماڭىزدى سەرىكتەستەرىنىڭ ءبىرى رەتىندە قاراستىراتىنىن مالىمدەدى.
– بۇگىنگى تابىستى كەلىسسوزدەر ناقتى ناتيجەلەرگە ۇلاسىپ، قول قويىلعان قۇجاتتار ەكىجاقتى بايلانىستاردى دامىتۋعا تىڭ سەرپىن بەرەتىنىنە سەنىمدىمىن. ەكى ەل اراسىنداعى سەرىكتەستىكتى نىعايتا وتىرىپ، ساۋدا، مادەنيەت، ءبىلىم بەرۋ جانە باسقا دا كوپتەگەن سالا بويىنشا ىنتىماقتاستىقتا جاڭا مۇمكىندىكتەرگە جول اشىلادى دەپ ەسەپتەيمىن. جوعارى مارتەبەلى پرەزيدەنت مىرزا، سىزگە پاكىستان مەن قازاقستان قارىم-قاتىناسىن ودان ءارى ارتتىرۋعا قولداۋ كورسەتكەنىڭىز ءۇشىن العىس ايتامىن، – دەدى پاكىستان پرەمەر-مينيسترى.
