مەملەكەت باسشىسى قاسىم-جومارت توقايەۆ ەو جانە ەۋروپالىق ينۆەستيسيالىق بانكتىڭ رەسمي تۇلعالارىمەن كەزدەستى، - دەپ حابارلايدى alnews.
پرەزيدەنت ساۋدا جانە ەكونوميكالىق قاۋىپسىزدىك ماسەلەلەرى جونىندەگى ەۋروكوميسسار ماروش شەفچوۆيچپەن، ەۋروپالىق وداقتىڭ ورتالىق ازيا بويىنشا ارنايى وكىلى ەدۋاردس ستيپرايسپەن جانە ەۋروپالىق ينۆەستيسيالىق بانكتىڭ ۆيسە-پرەزيدەنتى مارەك مورامەن كەزدەسۋ وتكىزدى.
ەو جانە ەيب جوعارى لاۋازىمدى وكىلدەرىمەن اڭگىمەلەسۋ بارىسىندا قاسىم-جومارت توقايەۆ ەو كوشباسشىلارى انتونيۋ كوشتامەن جانە ۋرسۋلا فون دەر ليايەنمەن وتكەن كەلىسسوزدەر ناتيجەسىن جوعارى باعالاپ، كەزدەسۋدە استانا مەن بريۋسسەل اراسىنداعى ستراتەگيالىق سەرىكتەستىكتى ودان ءارى نىعايتۋعا ءوزارا بەيىل ەكەندەرىن راستاعانىن ايتتى.
مەملەكەت باسشىسى بۇل ساپاردىڭ ەكونوميكالىق قۇرامداس بولىگى، اتاپ ايتقاندا، قۇنى 12 ميلليارد دوللاردان اساتىن كوممەرسيالىق كەلىسىمدەر مەن مەموراندۋمدارعا قول قويىلۋى ەۋروپالىق بيزنەستىڭ قازاقستان ەكونوميكاسىنا جانە ەلدە جۇرگىزىلىپ جاتقان رەفورمالارعا دەگەن سەنىمىن بايقاتاتىنىن جەتكىزدى.
وسى ورايدا پرەزيدەنت ەۋروپالىق ينۆەستيسيالىق بانكپەن سەرىكتەستىكتىڭ ناتيجەلى سيپاتىنا كوڭىلى تولاتىنىن اتاپ ءوتىپ، اتالعان قارجى ينستيتۋتىمەن الداعى ىنتىماقتاستىق قازاقستاننىڭ ورنىقتى ەكونوميكالىق دامۋىنا جانە وڭىرلىك ءوزارا بايلانىستاردى ارتتىرۋ باعىتىنداعى باستامالارىن ىلگەرىلەتۋگە سەپتىگىن تيگىزەتىنىنە سەنىم ءبىلدىردى.
ساۋدا جانە ەكونوميكالىق قاۋىپسىزدىك ماسەلەلەرى جونىندەگى ەۋروكوميسسار ماروش شەفچوۆيچ پرەزيدەنت قاسىم-جومارت توقايەۆتىڭ رەسمي ساپارى ەۋروپالىق وداق پەن قازاقستان اراسىنداعى قارىم-قاتىناستىڭ جاڭا كەزەڭىنە جول اشاتىنىن اتاپ ءوتتى.
ول وسى ساپار اياسىندا قول قويىلاتىن ماڭىزدى كوممەرسيالىق كەلىسىمدەر ساۋدا-ەكونوميكالىق ىنتىماقتاستىقتى نىعايتۋ بويىنشا ۇزاق جىلدار بويعى بىرلەسكەن كۇش-جىگەردىڭ ناتيجەسى ەكەنىنە توقتالدى.
كەزدەسۋ سوڭىندا تاراپتار ءوزارا مۇددەلى سالالارداعى ورتاق باستامالاردى ىلگەرىلەتۋ ماقساتىندا كونسترۋكتيۆتى ديالوگتى جالعاستىرۋعا ۋاعدالاستى.
