مەملەكەت باسشىسى قاسىم-جومارت توقايەۆ بەلگيا پرەمەر-مينيسترى بارت دە ۆيەۆەرمەن كەزدەستى، - دەپ حابارلايدى alnews.
قازاقستان پرەزيدەنتى قاسىم-جومارت توقايەۆ پەن بەلگيا پرەمەر-مينيسترى بارت دە ۆيەۆەر ەكى ەل ىنتىماقتاستىعىنىڭ قازىرگى جاي-كۇيى مەن پەرسپەكتيۆاسىن تالقىلاپ، ساياسي ديالوگتى نىعايتۋ، ساۋدا-ەكونوميكالىق جانە ينۆەستيسيالىق بايلانىستاردى دامىتۋعا ايرىقشا نازار اۋداردى.
مەملەكەت باسشىسى بەلگيانى قازاقستاننىڭ ەۋروپالىق وداقتاعى باستى سەرىكتەستەرىنىڭ ءبىرى رەتىندە اتادى.
قاسىم-جومارت توقايەۆتىڭ ايتۋىنشا، ەكونوميكالىق ىقپالداستىقتىڭ قارقىنى بۇدان دا زور الەۋەتكە يە. بەلگيا قازاقستان ەكونوميكاسىنا قارجى قۇيعان 10 جەتەكشى ينۆەستوردىڭ قاتارىنا كىرەدى. سوڭعى 20 جىلدا اتالعان ەلدەن كەلگەن تىكەلەي ينۆەستيسيانىڭ جالپى كولەمى 15 ميلليارد دوللاردى قۇرادى.
ءوزارا ساۋدا اينالىمى دا تۇراقتى تۇردە ءوسىپ كەلەدى. ونىڭ كولەمى بىلتىر 580 ميلليون دوللاردان استى.
– قازاقستاندا بەلگيا كاپيتالىنىڭ ۇلەسى بار 110-نان استام كومپانيا جۇمىس ىستەيدى. بۇل ءوزارا ءتيىمدى ىنتىماقتاستىقتى نىعايتۋعا دەگەن ورتاق ۇمتىلىسىمىزدى اڭعارتادى. تانىمال بەلگيالىق كومپانيالار ءبىزدىڭ ەلدىڭ نارىعىنا كوپتەپ كەلىپ جاتىر، – دەدى قاسىم-جومارت توقايەۆ.
پرەمەر-مينيستر بارت دە ۆيەۆەر ەكى ەل اراسىندا ساياسي ديالوگ دەڭگەيى جوعارى ەكەنىن اتاپ ءوتتى. ول بەلگيانىڭ ەكىجاقتى قارىم-قاتىناستى ودان ءارى تەرەڭدەتۋگە جانە ستراتەگيالىق سەرىكتەستىك اياسىن كەڭەيتۋگە نيەتتى ەكەنىن مالىمدەدى.
