بۇل شەشىم نارىق قاتىسۋشىلارىنا جاڭا تالاپتارعا بەيىمدەلۋگە جانە جۇيەنىڭ ءتيىستى فۋنكسيونالىن تولىققاندى پايدالانۋعا دايىندالۋ ءۇشىن قوسىمشا ۋاقىت بەرۋ ماقساتىندا قابىلداندى، - دەپ حابارلايدى alnews.
بيزنەس قاۋىمداستىعى وكىلدەرى مەن «اتامەكەن» ۇلتتىق كاسىپكەرلەر پالاتاسىنىڭ ۇسىنىستارىن ەسكەرە وتىرىپ، قازاقستان رەسپۋبليكاسى كولىك مينيسترلىگى جۇرگىزۋشىلەردىڭ رەيس الدىنداعى مەديسينالىق تەكسەرۋدەن وتكەنىن كولىك قۇجاتتارىن باسقارۋدىڭ ءبىرىڭعاي جۇيەسىندە (كقببج) راستاۋ تەتىگىن قولدانۋدى كوزدەيتىن نورمانىڭ قولدانىسىن 2027 جىلعى 1 قاڭتارعا دەيىن توقتاتا تۇرۋ تۋرالى شەشىم قابىلدادى.
اتالعان تەتىك پايدالانۋعا دايىن جانە قۇجاتتاردى ەلەكتروندىق فورماتتا راسىمدەۋگە مۇددەلى تاسىمالداۋشىلار كقببج جۇيەسىندە جۇمىستى ەرىكتى نەگىزدە جالعاستىرا الادى.
كولىك قوعامداستىعى وكىلدەرىنەن كەلىپ تۇسەتىن سۇراقتارعا بايلانىستى قازاقستان رەسپۋبليكاسى كولىك مينيسترلىگى كولىك قۇجاتتارىن باسقارۋدىڭ ءبىرىڭعاي جۇيەسىن ەنگىزۋ تارتىبىنە قاتىستى تۇسىنىكتەمە بەرەدى.
ەڭ الدىمەن، كقببج جۇيەسىن ەنگىزۋ تاسىمالداۋشىلار ءۇشىن جاڭا مىندەتتەمەلەر جۇكتەمەيتىنىن اتاپ وتكەن ءجون. تاۋار-كولىك جۇكقۇجاتى مەن جول پاراعىن راسىمدەۋ تالاپتارى قازاقستان رەسپۋبليكاسىنىڭ زاڭناماسىندا بۇرىننان كوزدەلگەن.
كقببج جۇيەسىنىڭ نەگىزگى ماقساتى – كولىك قۇجاتتارىن قاعاز تۇرىندە راسىمدەۋدىڭ قولدانىستاعى پروسەستەرىن ەلەكتروندىق فورماتقا كوشىرۋ جانە ولاردى تاسىمالداۋ پروسەسىنە قاتىسۋشىلار ءۇشىن قولجەتىمدى ەتۋ.
سونداي-اق، ينتەرنەت بايلانىسى تۇراقسىز اۋدانداردا جۇمىس ماسەلەسىنە ەرەكشە نازار اۋدارىلعان. مۇنداي جاعدايلاردا زاڭناماعا سايكەس كولىك قۇجاتتارىن قاعاز تۇرىندە راسىمدەۋگە جانە ينتەرنەتكە قولجەتىمدىلىك قالپىنا كەلتىرىلگەننەن كەيىن ولاردى كقببج جۇيەسىندە تىركەۋگە جول بەرىلەدى. وسىلايشا، بايلانىس بولماۋى تاسىمالداۋدى جۇزەگە اسىرۋعا جانە قاجەتتى قۇجاتتاردى راسىمدەۋگە كەدەرگى كەلتىرمەيدى.
مينيسترلىك حالىقارالىق اۆتوموبيل تاسىمالدارى كەزىندە قۇجاتتاردى راسىمدەۋ ءتارتىبىن دە تۇسىندىرەدى. ەگەر تاسىمالداۋ ءبىر حالىقارالىق تاسىمالداۋ شارتى اياسىندا جۇزەگە اسىرىلىپ، ءبىرىڭعاي حالىقارالىق CMR جۇكقۇجاتىمەن راسىمدەلسە، وندا تاۋار-كولىك جۇكقۇجاتىن جانە جول پاراعىن كقببج جۇيەسىندە راسىمدەۋ مەن تىركەۋ تالاپ ەتىلمەيدى.
سونىمەن قاتار، كقببج جۇيەسىندە جۇرگىزۋشىلەردىڭ رەيس الدىنداعى مەديسينالىق تەكسەرۋدەن ءوتۋىن راستاۋ ءتارتىبى جەتىلدىرىلدى.
رەيس الدىنداعى مەديسينالىق تەكسەرۋدى جۇرگىزۋ پروسەسىنەن مەديسينا قىزمەتكەرى شىعارىلمايتىنىن ەرەكشە اتاپ وتكەن ءجون. وزگەرىستەر تەك اقپاراتتىق جۇيەدە تەكسەرۋدەن ءوتۋ فاكتىسىن راستاۋ تەتىگىنە عانا قاتىستى.
تاسىمالداۋشىلار كەلەسى نۇسقالاردىڭ ءبىرىن تاڭداي الادى:
– ەگەر رەيس الدىنداعى تەكسەرۋدى مەديسينا قىزمەتكەرى جۇرگىزسە، ول ەنگىزىلگەن مالىمەتتەردىڭ دۇرىستىعىنا جاۋاپكەرشىلىك الا وتىرىپ، ونى جۇيەدە راستاي الادى؛
– راستاۋدىڭ وزگە ءتارتىبى قولدانىلعان جاعدايدا، تاسىمالداۋشى زاڭناما تالاپتارىنا سايكەس جول پاراعىندا ءتيىستى بەلگىنى وزدىگىنەن قويادى.
