كوكتوبە ساياباعىندا اۋماعى 4 گەكتار بولاتىن جاڭا گۇلدى بەتكەيدىڭ كورىكتەندىرۋ جۇمىستارى اياقتالدى، - دەپ حابارلايدى alnews.
الماتى قالاسىنىڭ تۋريزم باسقارماسى وكىلدەرىنىڭ مالىمەتىنشە، اۋقىمدى كوگالداندىرۋ جانە كوركەيتۋ ناتيجەسىندە مۇندا سەرۋەندەۋگە ارنالعان باعىتتار، شولۋ الاڭدارى مەن الماتىنىڭ كوركەم كورىنىسى اشىلاتىن جاڭا قوعامدىق كەڭىستىك پايدا بولدى.
جوبانىڭ باستى ەرەكشەلىگى – گۇلدەۋ كەزەڭىندە تاۋ بوكتەرىنە ەرەكشە كورىك بەرەتىن لاۆاندا تەرراسالارى. مۇندا ەرتە كوكتەمنەن كۇز سوڭىنا دەيىن ءسانىن جوعالتپايتىن 20-دان استام كوپجىلدىق وسىمدىك، ساندىك بۇتا مەن استىق تۇقىمداس وسىمدىكتەر ەگىلگەن. لاندشافتىق كومپوزيسيانى گورتەنزيا، توبىلعى، شاتىراش، كوكجالبىز (كوتوۆنيك)، قىزىلكۇرەڭ جانە ساندىك استىق تۇقىمداس وسىمدىكتەر تولىقتىرادى.
جوبانى ىسكە اسىرۋ بارىسىندا تابيعي جەر بەدەرىن ساقتاۋعا ەرەكشە كوڭىل ءبولىندى. بەتكەيلەر ەروزيادان قورعاۋ ءۇشىن گابيون قۇرىلىمدارىمەن بەكىتىلىپ، كەلۋشىلەردىڭ جايلى سەرۋەندەۋى ءۇشىن تابيعي لاندشافتپەن ۇيلەسىمدى كىرىكتىرىلگەن جۇرگىنشى جولدارى، باسپالداقتار جانە شولۋ الاڭدارى سالىندى.
جاڭا قوعامدىق كەڭىستىك كەلۋشىلەر ءۇشىن اشىق. گۇل كومپوزيسيالارى ساياباقتىڭ ءار تۇسىنان انىق كورىنەدى، ال سەرۋەن باعىتتارىنان الماتى قالاسى مەن ىلە الاتاۋىنىڭ اسەم كورىنىسى اشىلادى. جاڭا گۇلدى بەتكەي تابيعات پەن زاماناۋي لاندشافتىق ديزاين ۇيلەسىم تاپقان قالانىڭ كورىكتى ورىندارىنىڭ بىرىنە اينالدى.
