الماتىدا حالىقارالىق جاستار كۇنىنە وراي ۇيىمداستىرىلعان ALMA LOVE 2026 قالالىق جاستار فەستيۆالى اياسىندا Jas Vibe اكسياسى جالعاسۋدا، - دەپ حابارلايدى alnews.
العاشقى بەس كۇننىڭ ىشىندە جوباعا 5 مىڭنان استام قالا تۇرعىنى قاتىستى. بۇل تۋرالى الماتى قالاسى جاستار ساياساتى باسقارماسىنىڭ وكىلدەرى ايتتى.
اكسيانىڭ باستى ەرەكشەلىگى – قالا اۋداندارىن ارالاپ جۇرگەن برەندتەلگەن Jas Vibe اۆتوبۋسى. «جاس الماتى» ۇيىمىنىڭ بەلسەندىلەرى مەن فەستيۆالدىڭ ماسكوتتارىمەن بىرگە كوماندا ءتۇرلى بايقاۋلار مەن ينتەراكتيۆتەر ۇيىمداستىرىپ، تۇرعىنداردى فەستيۆال باعدارلاماسىمەن تانىستىرىپ، ALMA LOVE فەستيۆالىنىڭ قورىتىندى كونسەرتىنە شاقىرۋدا.
باعىت قالانىڭ ورتالىق كوشەلەرى مەن تانىمال قوعامدىق كەڭىستىكتەرىن عانا ەمەس، شالعاي شاعىناۋداندار مەن قالانىڭ تومەنگى بولىگىن دە قامتيتىنداي ەتىپ جاسالعان. اۆتوبۋس اۋلالارعا، سكۆەرلەرگە جانە تۇرعىنداردىڭ دەمالىس ورىندارىنا توقتايدى.
«ادەتتە مۇنداي ءىس-شارالار قالانىڭ ورتالىعىندا وتەتىن. سوندىقتان ءبىزدىڭ اۋدانعا وسىنداي جارقىن اۆتوبۋستىڭ كەلگەنى ەرەكشە اسەر قالدىردى. ۇيىمداستىرۋشىلاردىڭ شالعاي اۋداندارعا ارنايى كەلىپ، تۇرعىندارمەن كەزدەسىپ، بايقاۋلار وتكىزىپ جاتقانى قۋانتادى. بۇل مەرەكەنىڭ شىنىمەن بۇكىل قالا ءۇشىن ۇيىمداستىرىلعانىن كورسەتەدى»، – دەدى اكسياعا قاتىسقان الماتىلىق جاس تۇرعىن.
ايالدامالاردا ALMA LOVE فەستيۆالىنىڭ قورىتىندى كونسەرتى وتەتىن فان-ايماققا شاقىرۋ بيلەتتەرى ويناتىلادى. ولاردى بايقاۋلار مەن ينتەراكتيۆتەرگە بەلسەندى قاتىسقان تۇرعىندار جەڭىپ الا الادى.
Jas Vibe اكسياسى 12 تامىزعا دەيىن جالعاسادى. سول كۇنى ALMA LOVE 2026 فەستيۆالى مەرەكەلىك قورىتىندى كونسەرتپەن اياقتالادى.
