مەملەكەت باسشىسى قاسىم-جومارت توقايەۆ رەسپۋبليكالىق تامىز كونفەرەنسياسىندا سويلەگەن ماڭىزدى سوزىندە بالالاردى قورعاۋ، ولاردىڭ قاۋىپسىزدىگى مەن ءال-اۋقاتى ماسەلەلەرىنە ايرىقشا توقتالدى. تامىز كونفەرەنسياسىنا قاتىسا وتىرىپ، مەملەكەتىمىزدىڭ بالالاردىڭ قۇقىعىن قورعاۋ، ولاردىڭ دامۋىنا جۇيەلى جاعداي جاساۋ باعىتىنداعى سىندارلى ساياساتىنىڭ ءمانىن تاعى ءبىر مارتە تەرەڭ ۇعىندىق.
پرەزيدەنتىمىز اتاپ وتكەندەي، جىل باسىنان بەرى ەلىمىزدە «قازاقستان بالالارى» تۇجىرىمداماسى جۇزەگە اسىرىلىپ كەلەدى. بارلىق وڭىرلەردە بالالاردىڭ قۇقىقتارىن قورعاۋ باسقارمالارى مەن پسيحولوگيالىق قولداۋ ورتالىقتارى قۇرىلدى. بۇل، ارينە، وسكەلەڭ ۇرپاقتىڭ قۇقىقتارى مەن مۇددەلەرىن قورعاۋعا باعىتتالعان ماڭىزدى جۇيەلى قادامدار.
بالالاردىڭ دۇنيەتانىمى مەن پسيحولوگيالىق جاعدايىنا الەۋمەتتىك جەلىلەردىڭ، سيفرلىق پلاتفورمالاردىڭ، جاساندى ينتەللەكتتىڭ جانە اقپاراتتىق ورتانىڭ تيگىزەتىن اسەرىنە، ءبىر سوزبەن ايتقاندا ولاردىڭ ءقازىر بەتپە-بەت كەلىپ وتىرعان جاڭا سىن-قاتەرلەرى دە نازاردان تىس قالمادى.
مەملەكەت باسشىسى بۇل باعىتتاعى ەڭ ماڭىزدى مىندەتتەردىڭ ءبىرى رەتىندە بالالاردىڭ پسيحولوگيالىق جاعدايىنا تونەتىن قاۋىپتەردىڭ الدىن الۋ كەرەكتىگىن باسا بەلگىلەدى. الدىن-الا ارەكەت وتىرىپ، ءقاۋىپتى ەرتەرەك بايقاۋ، بالانى تىڭداي ءبىلۋ، ناقتى كومەك كورسەتۋ جانە ناقتى ناتيجەگە دەيىن سۇيەمەلدەۋدى قامتاماسىز ەتۋ اسا ماڭىزدى.
وسكەلەڭ ۇرپاقتىڭ قۇقىقتىق ساۋاتتىلىعىنا دا باسا نازار اۋدارىلدى. وسى وقۋ جىلىنان باستاپ مەكتەپتەردە «قۇقىق نەگىزدەرى» ءپانى وقىتىلا باستايدى، ال ءبىلىم بەرۋ باعدارلامالارىنا «كونستيتۋسيا نەگىزدەرى» جانە «زاڭ مەن ءتارتىپ» كۋرستارى ەنگىزىلەدى. تاعى ءبىر وزەكتى ماسەلە – بالالاردىڭ سيفرلىق كەڭىستىكتەگى قاۋىپسىزدىگى. كامەلەتكە تولماعانداردى زياندى كونتەنتتەن قورعاۋ شارالارى، سونداي-اق 16 جاسقا تولماعان بالالاردىڭ الەۋمەتتىك جەلىلەردە تىركەلۋىن شەكتەۋ جانە بالالارعا ارنالعان SIM-كارتالاردى اۋقىمدى ەتۋ ماسەلەلەرى اتاپ ءوتىلدى.
الايدا بارلىق باعدارلامالار، تەتىكتەر مەن شەشىمدەر سانعا ەمەس، تىكەلەي بالالارعا باعىتتالۋى ءتيىس. سەبەبى، ءاربىر ساننىڭ ارتىندا ءبىر-بىر تاعدىر، ءار سيگنالدىڭ ارتىندا نازار اۋدارۋدى قاجەت ەتەتىن جاعداي تۇرۋى مۇمكىن. ال ءبىزدىڭ مىندەتىمىز – سونىڭ ءارقايسىسىنا جاۋاپكەرشىلىكپەن قاراپ، ۋاقىتىندا تانىپ، ۋاقىتىندا كومەك بەرۋ.
ءبىر سوزبەن ايتقاندا، جۇيەلى شەشىمدەر ءاربىر بالاعا ءدال وسىنداي جولمەن جەتۋى ءتيىس.
ايتپايەۆا جانات جەڭىسبەك قىزى،
الماتى قالاسى بالالاردىڭ قۇقىقتارىن قورعاۋ
باسقارماسىنىڭ باسشىسى
