يزرايل ارمياسى (ساحال) ليۆان شەكاراسىنا قۇرلىق ارقىلى باسىپ كىردى. تەل-اۆيۆ رەسمي مالىمدەمەسىندە بۇل ارەكەتىن "شەكتى وپەراسيا" دەپ اتادى جانە شەكارا ماڭىنداعى "حەزبوللا" ۇيىمىنا تيەسىلى اسكەري نىسانداردى جويۋدى كوزدەگەندەرىن ايتتى.
بۇعان دەيىن ليۆاندا قارۋلى قاقتىعىستىڭ باستالۋى ايماقتاعى اۋقىمدى سوعىسقا يتەرمەلەۋى مۇمكىن دەگەن قاۋىپتەنۋلەر بولعان. سوعان قاراماستان يزرايل ءوز تاريحىندا ەكىنشى مارتە ليۆان جەرىنە اسكەري كۇشپەن كىردى.
بۇگىن تاڭدا ليۆاننىڭ وڭتۇستىگىندەگى شەكارا ماڭىندا يزرايل مەن "حەزبوللا" اراسىندا سۇراپىل شايقاستاردىڭ بولعانى تۋرالى حابارلار تارادى.
ساحال-دىڭ قۇرلىقتاعى قيمىلىنا اۋە كۇشتەرى مەن ارتيللەريا دا قولداۋ كورسەتىپ، شەكاراعا جاقىن ماڭداعى "حەزبوللاعا" تيەسىلى دەپ تانىلعان نىسانداردى تىمباي اتقىلادى.
يزرايل ارمياسىنىڭ ليۆانعا قۇرلىق ارقىلى اسكەري وپەراسيا باستايتىنى تۋرالى رەسمي مالىمەت 30 قىركۇيەك كۇنى كەشتە تاراي باستادى. ءبىر كۇن بۇرىن امەريكالىق باسىلىمدار وزدەرىنىڭ سەنىمدى اقپارات كوزدەرىنە سىلتەپ، ءيزرايلدىڭ قۇرلىقتاعى شابۋىلى باستالۋعا جاقىن تۇرعانىن حابارلاعان.
ال وپەراسيا الدىندا پەنتاگوننىڭ قازىرگى جەتەكشىسى وستين ءوزىنىڭ ءيزرايلدىڭ ارىپتەسىمەن سويلەسۋ وتكىزگەن. قۇراما شتاتتار ايماقتاعى بەيبىتشىلىك كەلىسسوزدەرىنە جەتەكشىلىك ەتىپ كەلگەنىنە قاراماستان ليۆانداعى قارۋلى قاقتىعىسقا جول بەرگەندەي كورىندى. دەگەنمەن، يزرايل شابۋىل تەك "حەزبوللانىڭ" شەكاراعا جاقىن اسكەري ينفراقۇرىلىمدارىنا باعىتتالعانىن ايتىپ سەندىرگەن.
بۇگىن تاڭدا يزرايل رەسميلەرى ليۆانداعى وپەراسيالاردىڭ دۇيسەنبى كۇنى تۇندە باستالعانىن، بۇل اسكەري قيمىلعا بىرنەشە اي بويى حاماسقا قارسى سوعىسقان گازادان ەليتالىق 98ء-شى ديۆيزيانىڭ قاتىسقانىن مالىمدەدى. بۇل ديۆيزيا ەكى اپتا بۇرىن عانا سولتۇستىك شەكاراعا ورنالاستىرىلعان ەدى.
وتكەن اپتادا يزرايل بەيرۋتتە "حەزبوللا" باسشىسى حاسان ناسراللانى ءولتىرىپ، يران قولداعان ءارى تاياۋ شىعىستاعى ەڭ قۋاتتى كۇشتىڭ ءبىرى "حەزبوللاعا" اۋىر سوققى بەرگەن بولاتىن.
تەل-اۆيۆ "شەكتى اسكەري وپەراسيا" اتاعان بۇل شابۋىلدىڭ قاشانعا دەيىن جالعاساتىنى بەلگىسىز. ايتا كەتەيىك، "حەزبولاعا" قارسى بۇل سوققىلار ءبىر جاعىنان يراننىڭ ايماقتاعى ىقپال-اسەرىنە دە اۋىر سوققى دەۋگە بولادى. وسىعان دەيىنگى ۇركىتكەن-قورقىتقان مالىمدەمەلەرىنە قاراماستان تەگەران يزرايلگە قارسى قازىرگە ەشقانداي ناقتى ارەكەتكە بارىپ وتىرعان جوق.
The ALNEWS
