اقش مەملەكەتتىك حاتشىسى ەنتوني بلينكەن تاياۋ-شىعىستاعى ساپارىن اياقتاتۋعا جاقىن. ول يزرايل-حاماس سوعىسى باستالعالى بەرى ايماققا وسىمەن 9 رەت ساپارلاي بارعان. تەل-اۆيۆتەن اتتاناردا بلينكەن يزرايل تارابىنىڭ كەلىسىمدى قابىل العانىن، حاماستى دا اتىستى توقتاتۋ بويىنشا كەلىسسوز شارتىن قابىلداۋعا شاقىرعان بولاتىن.
يزرايل پرەمەر-مينيسترى نەتانياحۋ مەن اقش مەم. حاتشىسى اراسىندا اشىق سويلەسۋ كوپكە سوزىلعان. بۇل تۋرالى اقش مەملەكەتتىك دەپارتامەنتىنىڭ وكىلدەرى باق-قا مالىمدەگەن. ولار وسى اشىق سويلەسۋلەردىڭ ناتيجەسىندە يزرايل تارابى اقش ۇسىنعان كەلىسىم شارتىن قابىلداۋعا كەلىسكەن. دەگەنمەن شارتتاردىڭ ناقتى ءماتىنى ءالى دە ءمالىم ەمەس.
بلينكەن ساپارىنىڭ باستى ماقساتى سوعىسۋشى جانە كەلىسسوزگە ارا اعايىن ەلدەرگە گازادا تىنىشتىق ورناتۋ بويىنشا اقش-تىڭ ۇسىنىسىن جەتكىزۋ بولاتىن. ال اقش، كاتار جانە مىسىردىڭ ارا اعايىندىق ەتۋىمەن يزرايل مەن حاماس اراسىنداعى كەلىسسوز 15 تامىز كۇنى دوحا قالاسىندا باستالعان. وسى اپتادا كەلىسسوزدەردىڭ ەكىنشى اينالىمى مىسىر ورتالىعى كايردە ءوتتى.
ءاۋ باستا بارلىق تاراپتار يزرايل مەن حاماس اراسىنداعى ۇسىنعان شارتتاردى ءبىر ورتاقتىققا كەلتىرۋ اسا قيىن ەكەنىن ايتقان. ءتىپتى كەلىسسوزدىڭ ناتيجەلى بولارىنا سەنىم دە از بولعان. سەبەبى، سوعىسىپ جاتقان تاراپتار ءبىر-بىرىنىڭ ۇسىنعان شارتتارىن قابىلداي المايتىنىن ايتقان. ايتالىق حاماس بىتىمگە كەلۋ ءۇشىن ۋاقىتشا اتىستى توقتاتۋ كەلىسىمىنە جەتۋدى قالاعان. بۇل تالاپ يزرايل جاعىنان قابىلدانبادى. ولار ءۇزىلىس حاماستى تىنىعىپ، ءتىپتى دە كۇشتى قارسىلىق كورسەتۋگە مۇمكىندىك بەرەدى دەپ ساناعان.
ال يزرايل تارابى بولسا سوعىستان كەيىن دە ءوز ارمياسىنىڭ گازادا قالىپ باقىلاۋ ورناتۋىن، گازا مەن مىسىر اراسىنداعى شەكارا وتكەلىن ءوزى باقىلاۋىن، سونىمەن بىرگە گازا ىشىندە سولتۇستىككە قاراي قايتا قونىستاناتىن بوسقىنداردى قاتاڭ تەكسەرىستەن وتكىزۋ سەكىلدى شارتتار ۇسىنعان. بۇل تالاپتارى دا حاماس جاعىنان قابىل الىنبايتىنىن اتالعان ۇيىم بىرنەشە رەت مالىمدەگەن.
بلينكەن ساپارى بارىسىندا مىسىر مەن كاتار ۇكىمەتىنەن حاماستى كەلىسىمگە شاقىرۋىن سۇرادى.
مالىمەتتەرگە قاراعاندا اقش ۇسىنعان كەلىسسوزدەردىڭ نەگىزى وسىعان دەيىن جو بايدەن ۇسىنعان كەلىسسوز شارتتارىن قامتيدى. وندا باستاپقىدا التى اپتاعا سوعىس قيمىلدارىن توقتاتۋ جانە تۇتقىنداردى بوساتۋ تۋرالى كەلىسسوزدەر قاراستىرىلعان.
بلينكەن ساپارىنان كەيىن امەريكالىق شەنەۋنگتەر كەلىسسوز سوڭعى مارەسىنە جاقىنداپ قالعانىن ايتقانى بار. دەگەنمەن، ءالى دە كەلىسە الماي جاتقان ماسەلەلەردىڭ بار ەكەنىن جوققا شىعارمايدى.
بۇعان قاراعاندا كەلىسسوزدەر ءالى دە ءبىرشاما ۋاقىتقا سوزىلۋى مۇمكىن.
