الماتىعا حالىقارالىق Food and Travel باسىلىمىنىڭ رەداكسيالىق توبى كەلدى، - دەپ حابارلايدى alnews.
Almaty Tourism Bureau قولداۋىمەن كوماندا قالانىڭ گاسترونوميالىق جانە تۋريستىك ومىرىمەن تانىسىپ جاتىر.
باسىلىم وكىلدەرى مەيرامحانالارعا، جەرگىلىكتى گاسترونوميالىق جوبالار مەن بازارلارعا بارىپ، قازاقتىڭ ۇلتتىق تاعامدارىمەن جانە زاماناۋي اۆتورلىق كونسەپسيالارمەن تانىسۋدا. جەرگىلىكتى ونىمدەر مەن ءداستۇرلى رەسەپتەرگە جاڭا كوزقاراستارعا ەرەكشە كوڭىل بولىنۋدە. باعدارلاماعا الماتىنىڭ تاريحى مەن قازىرگى تىنىسىن گاسترونوميامەن ساباقتاستىرا تانىتاتىن مادەني جانە تۋريستىك نىساندار دا ەنگىزىلگەن.
Food and Travel 1997 جىلدان بەرى ساياحات پەن گاسترونوميا تاقىرىپتارىن قامتىپ كەلە جاتقان حالىقارالىق باسىلىم. ءقازىر جۋرنال ۇلىبريتانيا، گەرمانيا، يتاليا، مەكسيكا، تۇركيا جانە گرەكيا نارىقتارىندا شىعادى. باسىلىم الەمنىڭ ءتۇرلى ەلدەرىندەگى تۋريستىك باعىتتار، ۇلتتىق تاعامدار جانە مادەني ەرەكشەلىكتەر تۋرالى اقپارات ۇسىنادى.
2026 جىلى الماتىنىڭ گاسترونوميالىق ساحناسىنا حالىقارالىق مەديانىڭ نازارىن اۋدى. امەريكالىق Eater باسىلىمى قالانى Where to Eat 2026 تىزىمىنە ەنگىزسە، الماتىنىڭ ءتورت مەكەمەسى The World’s 50 Best Discovery تىزىمىنەن ورىن الدى.
Food and Travel رەداكسياسىنىڭ بۇل ساپارى الماتىعا دەگەن حالىقارالىق قىزىعۋشىلىقتىڭ ارتىپ كەلە جاتقانىنىڭ تاعى ءبىر بەلگىسى. ساپار سوڭىندا حالىقارالىق اۋديتورياعا الماتىنىڭ زاماناۋي گاسترونومياسى، قازاق اسحاناسى مەن جەرگىلىكتى ونىمدەرى تانىستىرىلىپ، شاھاردىڭ ورتالىق ازياداعى گاسترونوميالىق ورتالىق رەتىندەگى الەۋەتى كەڭىنەن كورسەتىلمەك.
