الماتى ەستونيانىڭ ERR قوعامدىق تەلەراديوكورپوراسياسى تۇسىرەتىن Maitserännak läheb külla («قوناققا گاسترونوميالىق ساياحات») گاسترونوميالىق تۋريستىك جوباسىنىڭ جاڭا شىعارىلىمىنا ارقاۋ بولدى، - دەپ حابارلايدى alnews.
باعدارلاما جۇرگىزۋشىلەرى كورەرمەندەردى قالانىڭ تۋريستىك كورىكتى جەرلەرىمەن، جەرگىلىكتى اسحاناسىمەن، مادەني كەڭىستىكتەرىمەن جانە بەلسەندى دەمالىس مۇمكىندىكتەرىمەن تانىستىردى.
الماتىعا ەستونيالىق باس اسپازدار رومان زاششەرينسكيي مەن نيكيتا چۋنيحين ساياحات جاسادى. باعدارلاما اياسىندا ولار ەكسترەمالدى اتتراكسيوندارى بار «سۇڭقار» كەشەنىنە، كوكتوبەگە، كوك بازارعا جانە زاماناۋي ونەر مۋزەيىنە باردى. سونداي-اق جۇرگىزۋشىلەر جىلقى ەتىنەن دايىندالعان ەت پەن قىمىزدان ءدام تاتىپ، الماتى وڭىرىندەگى جۇزىمدىكتەردى ارالادى جانە مۋزىكانت ۆيكتور سويدىڭ ومىرىمەن بايلانىستى ورىندارمەن تانىستى.
ERR – تەلەارنالاردى، راديوستانسيالاردى جانە سيفرلىق مەدياپلاتفورمالاردى بىرىكتىرەتىن ەستونيانىڭ قوعامدىق تەلەراديوكورپوراسياسى. الماتىعا ارنالعان جەكە شىعارىلىم قالانى ەۋروپالىق اۋديتورياعا تەك تانىمال كورىكتى جەرلەرى ارقىلى عانا ەمەس، گاسترونومياسى، قالالىق مادەنيەتى جانە ساياحاتشىلاردىڭ العان اسەرلەرى ارقىلى دا تانىستىرۋعا مۇمكىندىك بەرەدى.
حالىقارالىق اقپارات كەڭىستىگىندە قالانىڭ كەڭىنەن تانىلۋى ونىڭ تۋريستىك الەۋەتىن ىلگەرىلەتۋدە ماڭىزدى ءرول اتقارادى. بولجام بويىنشا 2026 جىلى الماتىعا 800 مىڭنان استام شەتەلدىك تۋريست كەلەدى. شەتەلدىك بۇقارالىق اقپارات قۇرالدارىنىڭ جاريالانىمدارى مەن تەليەۆيزيالىق جوبالارى قالانىڭ حالىقارالىق دەڭگەيدەگى تانىمالدىلىعىن ارتتىرىپ، الەۋەتتى ساياحاتشىلاردى ونىڭ سان الۋان تۋريستىك مۇمكىندىكتەرىمەن تانىستىرادى.
