الماتى قالاسىنىڭ اكىمى دارحان ساتىبالدىنىڭ توراعالىعىمەن سپورت سالاسىن دامىتۋ جايى بويىنشا كەڭەس ءوتتى، - دەپ حابارلايدى alnews.
جيىندا سپورت رەزەرۆىن دايارلاۋ، سپورتشىلار مەن جاتتىقتىرۋشىلاردى قولداۋ، قالا تۇرعىندارى ءۇشىن سپورت نىساندارىنىڭ قولجەتىمدىلىگىن ارتتىرۋ جانە ءىرى حالىقارالىق جارىستاردى وتكىزۋ ماسەلەلەرى قارالدى.
قالالىق سپورت باسقارماسىنىڭ باسشىسى دارحان نۇرحان ۇلى اتقارىلعان جۇمىستاردىڭ ناتيجەسى تۋرالى بايانداپ، الداعى كەزەڭگە ارنالعان جوسپارلاردى تانىستىردى. بۇگىندە قازاقستان ۇلتتىق قۇراماسىنىڭ ساپىندا الماتىنىڭ 2 544 سپورتشىسى بار. ياعني ۇلتتىق قۇرامانىڭ ءاربىر ءتورتىنشى مۇشەسى – الماتىلىق سپورتشى.
الماتىلىق سپورتشىلاردىڭ ەنشىسىندە 2 230 مەدال بار. ونىڭ ىشىندە الەم چەمپيوناتتارىنىڭ 60 مەدالى، ازيا چەمپيوناتتارىنىڭ 105 مەدالى جانە قازاقستان چەمپيوناتتارىنىڭ 2 065 مەدالى بار. بيىل الماتىلىق سپورتشىلار سپورتتىق گيمناستيكادان الەم كۋبوگى كەزەڭدەرىندە جانە ستەند اتۋدان جاسوسپىرىمدەر اراسىنداعى الەم چەمپيوناتىندا قازاقستان تاريحىنداعى العاشقى جەڭىستەرگە قول جەتكىزدى. سونداي-اق باسقا دا سپورت تۇرلەرىندە تاريحي ناتيجەلەر كورسەتتى.
اي سايىنعى اقشالاي قامسىزداندىرۋ الۋشىلاردىڭ سانى ءتورت ەسەگە جۋىق ارتتى. سپورتشىلار سانى 244-تەن 925-كە، ال جاتتىقتىرۋشىلار سانى 28-دەن 341-گە دەيىن ءوستى. كەڭەيتىلگەن قولداۋ جۇيەسى جاسوسپىرىمدەر، جاستار، پاراليمپيادالىق جانە سۋردليمپيادالىق سپورت وكىلدەرىن دە قامتيدى. سونىمەن قاتار 200-دەن استام جەتەكشى سپورتشى تەرەڭدەتىلگەن عىلىمي-مەديسينالىق تەكسەرۋدەن ءوتتى.
قالا تۇرعىندارىن دەنە بەلسەندىلىگىنە تارتۋ ماقساتىندا ALMATY MOVE، «سپورت – دوستىق الاڭى»، ستۋدەنتتىك سپورت ليگاسى، بالالار فۋتبول ليگاسى جوبالارى جانە تەگىن جاتتىعۋلار ۇيىمداستىرىلۋدا. قالا كولەمىندە وتكەن ءىرى سپورتتىق ءىس-شارالارعا 40 مىڭنان استام ادام قاتىستى. جىل سوڭىنا دەيىن الماتىنىڭ بارلىق اۋدانىندا 2 مىڭنان استام سپورتتىق ءىس-شارا وتكىزۋ جوسپارلانعان.
سونداي-اق قالا Almaty Marathon، ATP 250 Almaty Open، دجيۋ-دجيتسۋدان ازيا چەمپيوناتى، WTT Youth Contender Almaty، FIBA ازيا كۋبوگىنىڭ ىرىكتەۋ ويىندارى جانە FIDE ۇيىمداستىراتىن ۋنيۆەرسيتەتتەر اراسىنداعى شاحماتتان الەم چەمپيوناتىنىڭ فينالىن قوسا العاندا، 35 حالىقارالىق جارىستى قابىلداۋعا دايىندالۋدا.
كەڭەس قورىتىندىسى بويىنشا دارحان ساتىبالدى سپورت ينفراقۇرىلىمىن جاڭعىرتۋ جۇمىستارىن جالعاستىرۋدى، ونىڭ تۇرعىندار ءۇشىن قولجەتىمدىلىگىن ارتتىرۋدى، بالالار مەن جاسوسپىرىمدەر سپورتىنا باسىمدىق بەرۋدى جانە سپورتشىلاردى حالىقارالىق جارىستارعا ساپالى دايارلاۋدى تاپسىردى. سونىمەن قاتار قولدانىستاعى سپورت ينفراقۇرىلىمىنىڭ ءتيىمدى پايدالانىلۋىن قامتاماسىز ەتۋ جانە قالانىڭ بارلىق اۋدانىندا تەگىن سپورتتىق جاتتىعۋلاردىڭ سانىن كوبەيتۋ جونىندە ناقتى مىندەتتەر جۇكتەدى.
