الماتى اكىمى دارحان ساتىبالدى مەن الماتى وبلىسىنىڭ اكىمى مارات سۇلتانعازييەۆ الماتى اگلومەراسياسى جەرگىلىكتى كەڭەسىنىڭ كەزەكتى وتىرىسىن وتكىزدى، - دەپ حابارلايدى alnews.
جيىندا قالا ماڭىنداعى ەلدى مەكەندەردى گازداندىرۋ، كولىك ينفراقۇرىلىمىن دامىتۋ جانە قالا شەكاراسىنا جاقىن اۋماقتاردا مەكتەپتەر سالۋ جايى قارالدى.
كەڭەستەگى نەگىزگى ماسەلەنىڭ ءبىرى قاراساي، ىلە جانە تالعار اۋداندارى تۇرعىندارىن تابيعي گازبەن قامتۋ بولدى. ينجەنەرلىك ينفراقۇرىلىمدى دامىتۋمەن قاتار، ماگيسترالدىق جەلىلەردى سالۋمەن شەكتەلمەي، تۇرعىن ۇيلەردى گازبەن جابدىقتاۋ جۇيەسىنە قوسۋدى جەدەلدەتۋدىڭ ماڭىزدىلىعى اتاپ ءوتىلدى. وسى ماقساتتا الماتى وبلىسىنىڭ اكىمدىگى حالىق ءۇشىن قولايلى قارجىلاندىرۋ تەتىكتەرىن ازىرلەپ، ەلدى مەكەن ىشىندەگى گاز جەلىلەرىنىڭ قۇرىلىسىن جەدەلدەتىپ، قاجەتتى راسىمدەردى جەڭىلدەتەدى.
سونداي-اق، تۇركسىب اۋدانىنداعى بەس كومىر بازاسىن كوشىرۋ ماسەلەسى قارالدى. قالادا ساتىلاتىن كومىردىڭ 85 پايىزىن الماتى اگلومەراسىنىڭ تۇرعىندارى تۇتىناتىنى، بۇل ءوز كەزەگىندە قالانىڭ ينفراقۇرىلىمىنا قوسىمشا جۇكتەمە تۇسىرەتىنى ايتىلدى.
الماتى قالاسىنىڭ شەكاراسىنان ۇلكەن الماتى اينالما اۆتوموبيل جولىنا (ءۇاااج) دەيىنگى راديالدى جولداردى ۇزارتۋ ماسەلەسىنە دە ەرەكشە نازار اۋدارىلدى. جوبا قالا بيۋدجەتى ەسەبىنەن جۇزەگە اسىرىلادى. قازىرگى ۋاقىتتا جەر تەلىمدەرىن ساتىپ الۋ جانە جوبالىق قۇجاتتامانى جاڭارتۋ جۇمىستارى اياقتالۋعا جاقىن.
الماتى اكىمى دارحان ساتىبالدى اباي، رىسقۇلوۆ داڭعىلدارى مەن ساين كوشەسىن ۇزارتۋ ارقىلى ءۇاااج-عا قوسىلاتىن جولداردى قىسقا مەرزىمدە قامتاماسىز ەتۋدى تاپسىردى.
«بۇل باسىم مىندەتتەردىڭ ءبىرى. قولدانىستاعى جولدارعا تۇسەتىن جۇكتەمەنى ازايتىپ، ترانزيتتىك كولىكتىڭ قالا اۋماعىن اينالىپ ءوتۋىن قامتاماسىز ەتۋىمىز جانە اۆتوكولىكتىڭ قورشاعان ورتاعا تيگىزەتىن تەرىس اسەرىن تومەندەتۋىمىز قاجەت. قاجەتتى قارجى بولىنگەن، جۇمىس كولەمى ايقىندالعان. سالالىق باسقارمالار جۇمىستىڭ ساپالى ءارى ۋاقىتىلى ورىندالۋىن قامتاماسىز ەتۋگە ءتيىس»، – دەدى دارحان ساتىبالدى.
ءوز كەزەگىندە الماتى وبلىسىنىڭ اكىمى مارات سۇلتانعازييەۆ اگلومەراسيا حالقىنىڭ سانى تۇراقتى تۇردە ءوسىپ كەلە جاتقانىن اتاپ ءوتتى. اسىرەسە، الاتاۋ قالاسىندا، سونداي-اق قاراساي، ىلە جانە تالعار اۋداندارىنداعى جاڭا تۇرعىن الاپتارى قارقىندى دامىپ كەلەدى.
«وسىعان بايلانىستى مەكتەپتەر سالۋعا ارنالعان جەر ۋچاسكەلەرىن الدىن الا انىقتاۋ، ينجەنەرلىك ينفراقۇرىلىمدى تارتۋ جانە قۇرىلىس جۇمىستارىن جەدەل باستاۋ ەرەكشە ماڭىزدى. سونىمەن قاتار قالا ماڭىنداعى جولاۋشىلار تاسىمالى الماتى اگلومەراسياسى تۇرعىندارى ءۇشىن وزەكتى ماسەلەنىڭ ءبىرى بولىپ قالا بەرەدى. كۇن سايىن وبلىستىڭ ونداعان مىڭ تۇرعىنى الماتىعا قاتىنايدى. سوندىقتان قوعامدىق كولىكتىڭ قولجەتىمدىلىگىن قامتاماسىز ەتۋ، مارشرۋت جەلىسىن وڭتايلاندىرۋ جانە جولاۋشىلار تاسىمالىنىڭ ساپاسىن ارتتىرۋ – نەگىزگى مىندەتتەردىڭ ءبىرى. ءبىزدىڭ ماقساتىمىز – اكىمشىلىك شەكارالارعا قاراماستان، اگلومەراسيا تۇرعىندارى ءۇشىن ءبىرىڭعاي، قولايلى ءارى ءتيىمدى كولىك جۇيەسىن قالىپتاستىرۋ»، – دەدى مارات سۇلتانعازييەۆ.
