الماتىدا «الماتى – ءبىلىم مەن يننوۆاسيا ورتالىعى: جاڭا حالىقتىق كونستيتۋسيا قۇندىلىقتارى نەگىزىندە ادامي كاپيتالدى دامىتۋ» تاقىرىبىندا پەداگوگ قىزمەتكەرلەردىڭ ءداستۇرلى تامىز كونفەرەنسياسى ءوتتى، - دەپ حابارلايدى alnews.
رەسپۋبليكا سارايىندا وتكەن ءىس-شاراعا الماتى اكىمى دارحان ساتىبالدى قاتىستى.
كونفەرەنسيادا 2026–2027 وقۋ جىلىنا ارنالعان ءبىلىم بەرۋ جۇيەسىنىڭ نەگىزگى مىندەتتەرى ايقىندالدى. اسىرەسە، ءبىلىم ساپاسىن ارتتىرۋعا، وقۋشىلاردىڭ سيفرلىق قۇزىرەتىن دامىتۋعا، جاساندى ينتەللەكتىنى ەنگىزۋگە، سونداي-اق «ادال ازامات» جانە «زاڭ مەن ءتارتىپ» قۇندىلىقتارىن نىعايتۋعا باسا نازار اۋدارىلدى.
«ءبىزدىڭ الدىمىزدا جاسالعان مۇمكىندىكتەردى ناقتى ءارى ولشەنەتىن ناتيجەگە اينالدىرىپ، بالالارىمىزدىڭ ءبىلىم ساپاسىنىڭ تۇراقتى ءوسۋىن قامتاماسىز ەتۋ مىندەتى تۇر. بۇل رەتتە ءمۇعالىمنىڭ كاسىبي شەبەرلىگى مەن ءار مەكتەپ جۇمىسىنىڭ تيىمدىلىگى شەشۋشى مانگە يە. مەملەكەت باسشىسى قاسىم-جومارت توقايەۆتىڭ تاپسىرماسىمەن الماتىدا 2026–2029 جىلدارعا ارنالعان ورتا ءبىلىم بەرۋ جۇيەسىنە جاساندى ينتەللەكتىنى ەنگىزۋدىڭ وڭىرلىك جوسپارى جۇزەگە اسىرىلىپ جاتىر. «Almaty Digital Mektebi» ءبىرىڭعاي قالالىق سيفرلىق پلاتفورماسى كەزەڭ-كەزەڭىمەن ەنگىزىلۋدە. قالاداعى بارلىق مەكتەپ جوعارى جىلدامدىقتى ينتەرنەتپەن قامتاماسىز ەتىلگەن، ءبىلىم بەرۋ ۇدەرىسىنە قاتىساتىن 200 مىڭنان استام ادام جاساندى ينتەللەكت قۇرالدارىن پايدالانادى. جاڭا وقۋ جىلىندا پەداگوگتەردىڭ AI-قۇزىرەتتەرىن ارتتىرۋ، 60 پاندىك كابينەتتى جابدىقتاۋ جانە بەيىندى زەرتحانالاردى دامىتۋ جۇمىستارى جالعاسادى»، – دەدى دارحان ساتىبالدى.
مامانمەن قامتاماسىز ەتۋ ماسەلەسىنە ەرەكشە نازار اۋدارىلدى. 2027–2030 جىلدارى اسا سۇرانىسقا يە پەداگوگيكالىق باعىتتار بويىنشا الماتى اكىمى گرانتتارىن ءبولۋ جوسپارلانىپ وتىر. وقۋ ورنىن اياقتاعان تۇلەكتەر كەيىن قالا مەكتەپتەرىنە جۇمىسقا ورنالاستىرىلادى.
ءبىلىم بەرۋ ينفراقۇرىلىمىن دامىتۋ جۇمىستارى جالعاسۋدا. وتكەن جىلى 40 مىڭعا جۋىق ورىنعا ارنالعان 37 ءبىلىم بەرۋ نىسانى پايدالانۋعا بەرىلدى. جاڭا وقۋ جىلىنىڭ باسىنا دەيىن 8 جاڭا مەكتەپ پەن 3 جاڭا كورپۋس اشىلىپ، 11 950 وقۋشى ورنى قۇرىلادى.
الماتى ءبىلىم ساپاسى بويىنشا جوعارى كورسەتكىشتەرىن ساقتاپ كەلەدى. قالا وقۋشىلارى 24 جىل قاتارىنان ەلىمىزدىڭ ۇزدىك وليمپيادالىق كومانداسى اتانىپ وتىر. 2026 جىلى سەگىز وقۋشى حالىقارالىق پاندىك وليمپيادالاردىڭ جەڭىمپازى جانە جۇلدەگەرى اتاندى. پەداگوگتەر دە جوعارى ناتيجە كورسەتىپ كەلەدى: الماتىنىڭ جەتى ءمۇعالىمى «ۇزدىك پەداگوگ – 2025» بايقاۋىنىڭ جەڭىمپازى اتانسا، №95 مەكتەپ-ليسەيىنىڭ ءمۇعالىمى تاتيانا بەلوۋسوۆا Global Teacher Prize نۇسقاسى بويىنشا الەمنىڭ ۇزدىك 50 پەداگوگىنىڭ قاتارىنا ەندى.
كونفەرەنسيا اياسىندا ءبىلىم بەرۋ سالاسىنىڭ ۇزدىك وكىلدەرى ماراپاتتالدى. كاسىبي شەبەرلىگى، كوپجىلدىق ەڭبەگى جانە وسكەلەڭ ۇرپاقتى تاربيەلەۋگە قوسقان ۇلەسى ءۇشىن پەداگوگتەرگە الماتى اكىمىنىڭ العىس حاتتارى مەن قازاقستان رەسپۋبليكاسى وقۋ-اعارتۋ مينيسترلىگىنىڭ ۆەدومستۆولىق ناگرادالارى تابىستالدى. سونداي-اق، قالانىڭ ۇزدىك ءبىلىم بەرۋ ۇيىمدارى انىقتالدى: ىبىراي التىنسارين اتىنداعى №159 گيمنازيا ۇزدىك ورتا ءبىلىم بەرۋ ۇيىمى دەپ تانىلىپ، قالا اكىمىنىڭ 68 ملن تەڭگە كولەمىندەگى گرانتىنا سەرتيفيكات الدى. الماتى تەحنولوگيالىق كوللەدجى ۇزدىك تەحنيكالىق جانە كاسىپتىك، ورتا بىلىمنەن كەيىنگى ءبىلىم بەرۋ ۇيىمى دەپ تانىلىپ، وعان دا ماتەريالدىق-تەحنيكالىق بازانى دامىتۋعا جانە عىلىمي-ادىستەمەلىك قامتاماسىز ەتۋگە 68 ملن تەڭگە كولەمىندە گرانت ءبولىندى.
كونفەرەنسيا قورىتىندىسى بويىنشا جاڭا وقۋ جىلىنا ارنالعان نەگىزگى مىندەتتەر – وقۋشىلاردىڭ ءبىلىم ساپاسىن ارتتىرۋ، پەداگوگتەردىڭ كاسىبي دامۋىن قامتاماسىز ەتۋ، مەكتەپ باسشىلارىنىڭ جاۋاپكەرشىلىگىن كۇشەيتۋ جانە ءبىلىم بەرۋ ۇيىمدارىنا اتاۋلى قولداۋ كورسەتۋ ايقىندالدى.
