بولات وتەمۇراتوۆ قورى الماتى قالاسىنداعى تۇرعىن ۇيلەردى گازبەن جابدىقتاۋعا باعىتتالعان ماڭىزدى الەۋمەتتىك جوباعا 460 ملن تەڭگە كولەمىندە قايىرىمدىلىق كومەك كورسەتتى، - دەپ حابارلايدى alnews.
جەكە سەكتورداعى ۇيلەردى گازبەن جابدىقتاۋ جوباسى الماتى قالاسىنىڭ اكىمدىگىمەن بىرلەسىپ جۇزەگە اسىرىلادى. العاشقى كەزەڭدە تاراپتار ءوزارا ءىس-قيمىلدىڭ نەگىزگى باعىتتارىن ايقىندايتىن مەموراندۋمعا قول قويدى. جەكە ۇيلەردى گازعا قوسۋدىڭ ءبىرىڭعاي تاسىلىنە سايكەس اكىمدىك ۇيلەردى تەكسەرىپ، تۇرعىندارعا كەڭەس بەرەدى. ودان كەيىن بىلىكتى مەردىگەر ۇيىمدار قاجەتتى جۇمىستاردى جۇرگىزەدى. بۇل رەتتە، تۇرعىندارعا گازبەن جىلىتۋ جۇيەسىنە كوشۋگە جان-جاقتى قولداۋ كورسەتىلەدى. وعان قارجىلىق جانە ۇيىمداستىرۋشىلىق ماسەلەسىن شەشۋ، قاجەتتى قۇجاتتاردى راسىمدەۋ جانە باسقا دا قولداۋ شارالارى كىرەدى.
«الماتىدا جەكە ۇيلەردى گازبەن جابدىقتاۋ جۇيەسىنە قوسۋ بويىنشا جۇيەلى جۇمىس جالعاسىپ جاتىر. ءار ۇيدە ماسەلەنىڭ تۋىنداۋ سەبەپتەرى ءارتۇرلى بولۋى مۇمكىن. سوندىقتان تەحنيكالىق جۇمىستاردى جۇرگىزىپ قانا قويماي، تۇرعىندارعا كەڭەس بەرۋدەن باستاپ، ۇيلەردى گازعا قوسۋعا دەيىنگى بارلىق كەزەڭدە قولداۋ كورسەتۋ ماڭىزدى. الەۋمەتتىك جاۋاپكەرشىلىگى جوعارى بيزنەستىڭ قولداۋى مۇنداي جۇمىستىڭ اۋقىمىن كەڭەيتىپ، ناقتى ماسەلەلەردىڭ شەشىلۋىن جەدەلدەتۋگە مۇمكىندىك بەرەدى»، – دەدى الماتى قالاسىنىڭ اكىمى دارحان ساتىبالدى.
جەكە ۇيلەردىڭ كومىردەن تابيعي گازعا كوشۋى الماتىداعى اۋا ساپاسىن جاقسارتۋ ءۇشىن دە ماڭىزدى. جىلىتۋ ماۋسىمىندا جەكە سەكتوردا قاتتى وتىن جاعۋ قورشاعان ورتاعا تارايتىن لاستاۋشى زاتتاردىڭ نەگىزگى كوزدەرىنىڭ ءبىرى بولىپ وتىر.
«ءبىز ءۇشىن قالا ينفراقۇرىلىمىن دامىتۋ جانە الماتى تۇرعىندارىنا قولايلى جاعداي جاساۋعا باعىتتالعان جوبانى قولداۋ ماڭىزدى. جەكە سەكتوردى گازداندىرۋ تۇرعىندارعا زاماناۋي جىلىتۋ جۇيەسىنە كوشۋگە مۇمكىندىك بەرەدى. ءبىز وسى باستامانى جۇزەگە اسىرۋعا قولداۋ كورسەتىپ وتىرعانىمىزعا قۋانىشتىمىز»، – دەدى بولات وتەمۇراتوۆ قورىنىڭ باس ديرەكتورى اينۇر كارىبوزوۆا.
ايتا كەتەيىك، بۇل قوردىڭ الماتىداعى العاشقى جوباسى ەمەس. قالادا قور بوتانيكالىق باقتى، سونداي-اق ق ر ۇلتتىق ورتالىق مۋزەيىنىڭ جەلدەتۋ جانە اۋا باپتاۋ جۇيەسىن جاڭعىرتۋدى قولدادى. سونىمەن قاتار الماتىدا قوردىڭ «اۋتيزم. بارشامىزعا ءبىر الەم» باعدارلاماسى اياسىندا اشىلعان العاشقى «اسىل ميراس» اۋتيزم ورتالىقتارىنىڭ ءبىرى جۇمىس ىستەيدى. COVID-19 پاندەمياسى كەزىندە قور دەنساۋلىق ساقتاۋ جۇيەسىنە قولداۋ كورسەتتى. اتاپ ايتقاندا، پتر-تەستىلەۋگە ارنالعان ءموبيلدى زەرتحانالار ورناتىلدى.
12 جىل ىشىندە قور ەلىمىزدىڭ ءار ءتۇرلى وڭىرلەرىندە الەۋمەتتىك جوبالاردى جۇزەگە اسىردى. ولاردىڭ قاتارىندا ەسىك پەن قوسشىداعى مەكتەپتەر، قىزىلورداداعى جاڭا اۋەجاي تەرمينالى، قوسشىداعى قوميۋنيتي ورتالىعى، جەزقازعانداعى «شابىت» بالالار مەن جاسوسپىرىمدەر شىعارماشىلىق ورتالىعى بار. سونىمەن بىرگە قور ءبىلىم بەرۋ، دەنساۋلىق ساقتاۋ، ينكليۋزيا، مادەنيەت، ەكولوگيا جانە تابيعي اپاتتاردان زارداپ شەككەندەرگە قولداۋ كورسەتۋ باعىتتارىندا دا ءبىرقاتار باستامانى جۇزەگە اسىردى. 2014 جىلدان بەرى قور الەۋمەتتىك جوبالاردى جۇزەگە اسىرۋعا 250 ملن دوللاردان استام قارجى بولگەن.
