«ازاماتتارعا ارنالعان ۇكىمەت» مەملەكەتتىك كورپوراسياسى سەرىكتەس بانكتەرمەن بىرلەسىپ «Blockchain» تەحنولوگياسى ارقىلى زاڭدى تۇلعالاردىڭ جىلجىمايتىن مۇلىك كەپىلىنە تىركەۋ سەرۆيسىن ىسكە قوستى.
بۇل سەرۆيس مەملەكەتتىك كورپوراسيا مەن ەكىنشى دەڭگەيلى بانكتەر اراسىنداعى ۇزاق مەرزىمدى ىنتىماقتاستىق اياسىنداعى جوبالاردىڭ جالعاسى.
زاڭدى تۇلعالاردىڭ جىلجىمايتىن مۇلكىن كەپىلگە قويىپ، ونلاين راسىمدەۋ ارقىلى نەسيە بەرۋدى جەڭىلدەتۋ سىندى بانك سالاسىنداعى «Blockchain» تەحنولوگياسىنىڭ مۇمكىندىكتەرىنىڭ ارقاسىندا مامىلەلەردى تىركەۋگە جۇمسالاتىن ۋاقىت بىرنەشە ەسە قىسقارادى. ناتيجەسىندە، قۇجات جيناۋ قاجەتتىلىگى مەن قىزمەت الۋشى مەن قىزمەت كورسەتۋشىنىڭ بەتپە-بەت كەزدەسۋ تالابىنىڭ جويىلۋىنىڭ ارقاسىندا كەپىلدى تىركەۋ مەرزىمى 3 كۇننەن 1 ساعاتقا قىسقارادى.
جالپى مەملەكەتتىك كورپوراسيا مەن ەكىنشى دەڭگەيلى بانكتەر اراسىنداعى ىنتىماقتاستىق اياسىندا جەكە تۇلعالارعا كەپىل تۇرىندەگى اۋىرتپالىقتاردى تىركەۋ جانە ونى توقتاتۋ، الەۋمەتتىك ءالسىز توپتارعا ارنالعان مەملەكەتتىك باعدارلاما بويىنشا جالداۋ شارتىن جاساۋ، سونداي-اق جىلجىمايتىن مۇلىكتى ساتىپ الۋ-ساتۋ جانە بەرۋ شارتتارىن راسىمدەۋ سەكىلدى قىزمەتتەر كورسەتىلەدى.
2024 جىلى «Blockchain» تەحنولوگياسى ارقىلى قارىز شارتى بويىنشا تالاپ ەتۋ قۇقىعىن بەرۋ، شارت تالاپتارىنىڭ وزگەرۋىنە بايلانىستى اۋىرتپالىقتاردى وزگەرتۋ، سونداي-اق تۇرعىن ەمەس ءۇي-جايلاردى كەپىلگە قويۋ شارتىن تىركەۋ قىزمەتتەرى دە ىسكە قوسىلدى.
بۇگىنگى كۇنگە دەيىن «Blockchain» تەحنولوگياسى ارقىلى 360 مىڭنان استام ءوتىنىم قاراستىرىلدى. جىلجىمايتىن مۇلىككە اۋىرتپالىقتاردى تىركەۋ 2024 جىلى وتكەن جىلمەن سالىستىرعاندا 1،5 ەسەگە ارتتى، ياعني 87،8 مىڭ وپەراسيادان 131،7 مىڭعا دەيىن ءوستى.
جاڭا تەحنولوگيانى پايدالانۋ بويىنشا استانا، الماتى جانە شىمكەنت قالالارى، سونداي-اق اقتوبە، تۇركىستان، قاراعاندى جانە الماتى وبلىستارى جوعارى بەلسەندىلىك تانىتتى.
جاڭا سەرۆيس «Blockchain» تەحنولوگياسىن قولدانۋ ارقىلى كورسەتىلەتىن قىزمەتتەر قاتارىن كەڭەيتىپ، بانكتەر تاراپىنان تۇسەتىن شارتتاردىڭ بارلىق اۋقىمىن جىلجىمايتىن مۇلىكتى (اۋىرتپالىق قۇقىقتارىن) ەلەكتروندى تىركەۋگە اۋدارۋ.
