«قازاقتەلەكوم» اقتاۋ قالاسىنداعى وپتيكالىق جەلىنى كەڭەيتۋدە، - دەپ حابارلايدى alnews.
جىل باسىنان بەرى كومپانيا سەگىز تۇرعىن ءۇيدى ءوز ينفراقۇرىلىمىنا قوستى، ال جاقىن ارادا قالاداعى تاعى ءتورت تۇرعىن ءۇي كەشەنىن GPON تەحنولوگياسى ارقىلى ينتەرنەتكە قوسۋدى جوسپارلاپ وتىر. جاڭادان قوسىلعان نىسانداردىڭ ءبىرى – 240 پاتەرلى «ايسار» تۇرعىن ءۇي كەشەنى.
اقتاۋداعى «ايسار» تۇرعىن ءۇي كەشەنىندە تۇراتىن ءزۇلپيا اراحوۆانىڭ وتباسى ءۇشىن ءۇيدىڭ وپتيكالىق جەلىگە قوسىلۋى وقۋ جىلىنىڭ باستالۋىمەن تۇسپا-تۇس كەلدى. وتباسىندا ينتەرنەتتى بالالار وقۋ، اقپارات ىزدەۋ جانە ونلاين ساباقتارعا قاتىسۋ ءۇشىن بارىنشا پايدالانادى.
«ءقازىر وقۋ جىلى باستالعان كەزدە ينتەرنەت بالالارعا اسا قاجەت. ولار ءۇي تاپسىرمالارىن ورىندايدى، قوسىمشا اقپارات ىزدەيدى، ونلاين وقيدى. سوندىقتان وتباسىمىز ءۇشىن ينتەرنەتتىڭ جىلدام ءارى تۇراقتى بولعانى ماڭىزدى. ەندى مۇنداي قىزمەتتەردىڭ ءبىزدىڭ ۇيدە دە قولجەتىمدى بولعانى وتە ىڭعايلى»، – دەدى ءزۇلپيا اراحوۆا.
GPON تەحنولوگياسى ارقىلى وپتيكالىق-تالشىقتى جەلى ابونەنتتىڭ پاتەرىنە تىكەلەي تارتىلادى. بۇل ءبىر جەلى ارقىلى ۇيدەگى ينتەرنەت، تەلەديدار جانە باسقا دا سيفرلىق سەرۆيستەرءدى قاتار پايدالانۋعا مۇمكىندىك بەرەدى.
جاڭا تۇرعىن ءۇي كەشەندەرىمەن قاتار، «قازاقتەلەكوم» جەكە سەكتورداعى وپتيكالىق جەلىنى دە كەڭەيتۋدى جوسپارلاپ وتىر. كەلەسى جوبالاردىڭ ءبىرى ماڭعىستاۋ وبلىسى مۇنايلى اۋدانىنداعى قىزىلتوبە اۋىلىندا جۇزەگە اسىرىلادى. مۇندا شامامەن 1 200 ءۇيدى GPON تەحنولوگياسىنا قوسۋ مۇمكىندىگى قاراستىرىلعان. جوبا اياسىندا شامامەن 800 پورت سالۋ كوزدەلگەن.
«ءبىز اقتاۋ قالاسىنىڭ وزىندە دە، وعان جاقىن ەلدى مەكەندەردە دە وپتيكالىق جەلىنى دامىتۋدى جالعاستىرىپ جاتىرمىز. ءقازىر قالادا تاعى ءتورت تۇرعىن ءۇي كەشەنىن قوسۋعا دايىندىق جۇرگىزىلۋدە. الداعى اۋقىمدى جۇمىستاردىڭ ءبىرى قىزىلتوبەدە جۇرگىزىلەدى – مۇندا جەلى جەر ۇيلەرگە تارتىلادى. زاماناۋي ينفراقۇرىلىم تەك جاڭا كوپقاباتتى ۇيلەردە عانا ەمەس، ساپالى سىمدى ينتەرنەتكە مۇقتاج جەكە ۇيلەردە تۇراتىن تۇرعىندارعا دا قولجەتىمدى بولۋى ءبىز ءۇشىن ماڭىزدى»، – دەپ اتاپ ءوتتى «قازاقتەلەكوم» بولشەك بيزنەس ديۆيزيونىنىڭ ينستاللياسيالىق جۇمىستار دەپارتامەنتى اقتاۋ قالاسى سەحىنىڭ باستىعى باۋىرجان قالييەۆ.
جاڭا نىسانداردى قوسپاس بۇرىن كومپانيا ماماندارى تۇرعىندارمەن كەزدەسىپ، قولجەتىمدى قىزمەتتەر تۋرالى كەڭەس بەرەدى جانە وتىنىمدەر جينايدى. مۇنداي فورمات سۇرانىستى باعالاۋعا جانە جەلىنى دامىتۋ كەزەڭىنىڭ وزىندە قوسىلۋعا دەگەن قاجەتتىلىكتى انىقتاۋعا مۇمكىندىك بەرەدى.
