الماتى تۋريستىك ينفراقۇرىلىمدى جاڭعىرتۋ جۇمىستارىن جالعاستىرىپ وتىر. بۇل تۋرالى وڭىرلىك كوممۋنيكاسيالار قىزمەتىنىڭ الاڭىندا الماتى قالاسى تۋريزم باسقارماسىنىڭ باسشىسى عاليا توقسەيىتوۆا مالىمدەدى، - دەپ حابارلايدى alnews.
قالادا تۋريستەرگە كورسەتىلەتىن قىزمەت ساپاسىن ارتتىرۋعا، كولىك قولجەتىمدىلىگىن جاقسارتۋعا جانە زاماناۋي تۋريستىك قىزمەت كورسەتۋ جۇيەسىن قالىپتاستىرۋعا باعىتتالعان كەشەندى جۇمىستار جۇرگىزىلىپ جاتىر. سونىڭ نەگىزگى باعىتتارىنىڭ ءبىرى ۆيزيت ورتالىقتاردى جاڭعىرتۋ. بولاشاقتا ولار جاي عانا اقپاراتتىق پۋنكت ەمەس، تۋريستەرگە جان-جاقتى قىزمەت كورسەتەتىن تولىققاندى ورتالىقتارعا اينالادى.
بۇگىندە شاھاردا الماتىنى ورتالىق ازياداعى جەتەكشى تۋريستىك ورتالىقتاردىڭ ءبىرى رەتىندەگى تارتىمدىلىعىن ارتتىرۋعا باعىتتالعان بىرنەشە جوبا قاتار جۇزەگە اسىرىلىپ جاتىر.
قازىرگى تاڭدا قالادا تۋريستەر ەڭ كوپ باراتىن ورىنداردا ورنالاسقان 8 ۆيزيت ورتالىق جۇمىس ىستەيدى. ولار وماروۆا، پانفيلوۆ، زەنكوۆ، بايتۇرسىنوۆ، تيميريازيەۆ كوشەلەرىندە، دوستىق داڭعىلىندا جانە «مەدەۋ» بيىك تاۋلى سپورت كەشەنىنىڭ اۋماعىندا ورنالاسقان. مۇندا كەلۋشىلەر قالانىڭ كورىكتى جەرلەرى، ەكسكۋرسيالىق باعىتتار، مادەني ءىس-شارالار جانە تۋريستىك ونىمدەر تۋرالى تولىق اقپارات الا الادى.
2026 جىلدىڭ العاشقى بەس ايىندا ۆيزيت ورتالىقتاردىڭ قىزمەتىنە 3 604 ادام جۇگىندى. ونىڭ 2 813ء-ى نەمەسە شامامەن 80%-ى شەتەلدىك تۋريست بولسا، 791 ادام – ىشكى تۋريستەر.
«ۆيزيت-ورتالىقتاردى تۋريستەر ءۇشىن زاماناۋي ءارى قولايلى ەتۋگە مۇمكىندىك بەرەتىن جاڭا ۇلگىنى ازىرلەپ جاتىرمىز. بۇل جۇمىستا الەمنىڭ ۇزدىك تاجىريبەلەرى نەگىزگە الىندى»، – دەدى عاليا توقسەيىتوۆا.
باسقارما وكىلدەرىنىڭ ايتۋىنشا، تۋريستىك ينفراقۇرىلىمدى دامىتۋ تەك اقپاراتتىق قىزمەتپەن شەكتەلمەيدى. سونىمەن قاتار اۋە قاتىناسىن كەڭەيتۋ، قوناق ءۇي جەلىسىن دامىتۋ، تاۋ ينفراقۇرىلىمىن كوركەيتۋ جانە جاڭا تۋريستىك نىساندار سالۋ باعىتىندا دا جۇيەلى جۇمىستار قولعا الىنعان. بۇل جوبالاردىڭ كەشەندى جۇزەگە اسىرىلۋى الماتىنىڭ حالىقارالىق تۋريستىك نارىقتاعى باسەكەگە قابىلەتتىلىگىن ارتتىرىپ، تۋريستەر سانىن كوبەيتۋگە جانە شاھاردىڭ وڭىردەگى جەتەكشى تۋريستىك ورتالىقتاردىڭ ءبىرى رەتىندەگى مارتەبەسىن نىعايتۋعا مۇمكىندىك بەرەدى.
