الماتىنىڭ دوستىق داڭعىلى، 170/1 مەكەنجايىندا ورنالاسقان زاڭسىز ساۋدا نىساندارى ءسۇرىلدى. بۇل تۋرالى قالا قۇرىلىسى باقىلاۋ باسقارماسىنىڭ وكىلدەرى حابارلادى.
جوسپاردان تىس تەكسەرۋ بارىسىندا اتالعان اۋماقتا قاجەتتى رۇقساتسىز ءبىر قاباتتى ءۇش نىساننىڭ قۇرىلىسى جۇرگىزىلگەنى انىقتالدى.
تەكسەرۋ قورىتىندىسى بويىنشا مەنشىك يەسىنە قۇرىلىس-مونتاج جۇمىستارىن توقتاتۋ، انىقتالعان زاڭبۇزۋشىلىقتاردى جويۋ جانە جەر تەلىمىن باستاپقى قالپىنا كەلتىرۋ جونىندە نۇسقاما بەرىلدى.
الايدا نۇسقاما تالاپتارى ورىندالماعاندىقتان، ماتەريالدار اكىمشىلىك قۇقىق بۇزۋشىلىقتار جونىندەگى مامانداندىرىلعان اۋدانارالىق سوتقا جولداندى. سوت شەشىمىمەن مەنشىك يەسى اكىمشىلىك جاۋاپكەرشىلىككە تارتىلدى.
قازىرگى ۋاقىتتا ءوز بەتىنشە سالىنعان نىساندار مەنشىك يەسىنىڭ كۇشىمەن تولىقتاي ءسۇرىلدى.
قالا قۇرىلىسى باقىلاۋ باسقارماسى قۇرىلىس جۇمىستارىن جۇرگىزۋ كەزىندە قولدانىستاعى زاڭناما تالاپتارىن قاتاڭ ساقتاۋ قاجەتتىگىن ەسكە سالدى.
