الماتىنىڭ مەدەۋ اۋدانىندا قوعامدىق كەڭىستىكتەردى كوركەيتۋگە باعىتتالعان ەكى جوبا جۇزەگە اسىرىلدى، - دەپ حابارلايدى alnews.
«حالىق قاتىساتىن بيۋدجەت» باعدارلاماسى اياسىندا «حالىق ارەنا» سپورت كەشەنىنىڭ اۋماعىندا اۆتوماتتى سۋارۋ جۇيەسى ورناتىلدى. جالپى 4 مىڭ مەتر اۆتوماتتى سۋارۋ جۇيەسى مونتاجدالىپ، 2،5 مىڭ مەتر جەلى تارتىلدى.
جاڭا جۇيە جاسىل جەلەكتى تۇراقتى سۋارۋعا جانە سۋ رەسۋرسىن ءتيىمدى پايدالانۋعا مۇمكىندىك بەرەدى.
تاعى ءبىر جوبا وسپانوۆ كوشەسىندە جۇزەگە اسىرىلىپ، جۇرگىنشىلەر ايماعىن كوركەيتۋ جۇمىستارى اياقتالدى. مۇندا 150 شارشى مەتر اسفالتبەتون جابىنى جانە 480 شارشى مەتر كەسپەتاس توسەلدى. سونداي-اق، 1 650 شارشى مەتر اۋماق كوگالداندىرىلىپ، سىرتقى جارىقتاندىرۋ باعانالارى ورناتىلدى.
اتقارىلعان جۇمىستار مەدەۋ اۋدانىنداعى جۇرگىنشىلەر ينفراقۇرىلىمىن دامىتۋعا جانە قوعامدىق كەڭىستىكتەردىڭ جايلىلىعىن ارتتىرۋعا باعىتتالعان.
