الماتىدا باس جوسپارعا ەنگىزىلەتىن تۇزەتۋلەردىڭ ستراتەگيالىق ەكولوگيالىق باعالاۋىنا قاتىستى قوعامدىق تىڭداۋلار ءوتىپ جاتىر، - دەپ حابارلايدى alnews.
تىڭداۋ بارىسىندا تۇرعىنداردىڭ ءبىرى قۇجات ازىرلەۋشىلەردەن قالانى كوگالداندىرۋ باعىتىندا اتقارىلعان جۇمىستارعا جۇرگىزىلگەن تالداۋدىڭ ناقتى ناتيجەسىن ۇسىنۋدى سۇرادى. ونىڭ ايتۋىنشا، قالا تۇرعىندارىن الماتىنىڭ جاسىل قورىنىڭ قازىرگى جاي-كۇيى مەن ونىڭ اۋا ساپاسىنا ىقپالى تۋرالى وبەكتيۆتى باعالاۋ قىزىقتىرادى.
بۇل سۇراققا PhD دوكتورى، بەلگىلى قازاقستاندىق بيوتەحنولوگ-عالىم گۇلنۇر ءجۇنىسوۆا جاۋاپ بەردى. ونىڭ ايتۋىنشا، بۇگىنگى احۋالعا جان-جاقتى تالداۋ جاسالعان. قازىرگى تاڭدا الماتىداعى ءبىر تۇرعىنعا شاققانداعى جاسىل جەلەكپەن قامتاماسىز ەتۋ دەڭگەيى شامامەن 5 شارشى مەتر. بۇل بەلگىلەنگەن نورماتيۆتەن ەداۋىر تومەن. ال مەجەلى كورسەتكىش – ءبىر ادامعا شاققاندا 16 شارشى مەتر.
ساراپشىنىڭ ايتۋىنشا، نورماتيۆتىك ەسەپتەۋ كەزىندە كەيبىر تابيعي اۋماقتار قالانىڭ كوگالداندىرۋ جۇيەسىنىڭ قۇرامىنا ەنگىزىلمەيدى. سوندىقتان ولار جالپى ستاتيستيكالىق كورسەتكىشتە ەسەپكە الىنبايدى.
«بەلگىلەنگەن مەجەگە قول جەتكىزۋ ءۇشىن باس جوسپاردا جاسىل جەلەك كولەمىن ەداۋىر ۇلعايتۋ كوزدەلگەن. وسى ماقساتتا جىل سايىن 10 مىڭنان استام اعاش ەگۋ جوسپارلانىپ وتىر. بۇل رەتتە جەرگىلىكتى تابيعي جاعدايعا بەيىمدەلگەن وسىمدىك تۇرلەرىنە باسىمدىق بەرىلەدى»، – دەدى سپيكەر.
گۇلنۇر ءجۇنىسوۆانىڭ ايتۋىنشا، مۇنداي ءتاسىل قالانىڭ كوگالداندىرۋ دەڭگەيىن ارتتىرىپ قانا قويماي، قالا ەكوجۇيەسىنىڭ جاعدايىن جاقسارتۋعا، بيولوگيالىق الۋان تۇرلىلىكتى ساقتاۋعا جانە قالاداعى قۇستار مەن جانۋارلاردىڭ تىرشىلىك ەتۋىنە قولايلى ورتا قالىپتاستىرۋعا مۇمكىندىك بەرەدى.
سونىمەن قاتار قالاداعى جاسىل بەلدەۋدى وزەن جاعالاۋلارىن كوگالداندىرۋ جانە جاسىل جەلەك القاپتارىن ۇلعايتۋ ارقىلى دامىتۋ جوسپارلانعان. جوسپاردا ىلە الاتاۋى مەملەكەتتىك ۇلتتىق تابيعي ساياباعىنىڭ اينالاسىندا قورعاۋ ايماعىن بەلگىلەۋ، تۇرعىندار ءجيى باراتىن شاتقالدارداعى دەمالىس جۇكتەمەنى رەتتەۋ، سونداي-اق سيرەك كەزدەسەتىن جانۋارلار تۇرلەرىنە مونيتورينگ جۇرگىزۋ باعدارلامالارىن كەڭەيتۋ كوزدەلگەن. ەكولوگيالىق تاۋەكەلدەردى ازايتۋ ماقساتىندا باس جوسپاردا تابيعي اۋماقتار اراسىنداعى جانۋارلاردىڭ ەركىن قونىس اۋدارۋىنا مۇمكىندىك بەرەتىن ەكولوگيالىق دالىزدەر جۇيەسىن قۇرۋ دا قاراستىرىلعان.
