الماتىنىڭ بورالداي شاعىناۋدانىنداعى ازات كوشەسى، 23ء-ۇيدىڭ جانىندا تۇرعىنداردىڭ دەمالۋىنا ارنالعان جاڭا قوعامدىق كەڭىستىك پايدا بولدى، - دەپ حابارلايدى alnews.
سكۆەر «حالىق قاتىساتىن بيۋدجەت» باعدارلاماسى اياسىندا كوركەيتىلدى. بۇل باعدارلاما قالا تۇرعىندارىنا قالالىق ورتانى جاقسارتۋعا باعىتتالعان جوباسىن ۇسىنۋعا مۇمكىندىك بەرەدى.
اۋماقتا كۇركەلەر مەن ورىندىقتار ورناتىلىپ، شاحمات ويناۋعا ارنالعان ارنايى ايماق جاساقتالدى. سونداي-اق كوگال توسەلىپ، جاسىل ايماق جاسالدى. كەشكى ۋاقىتتا جايلى دەمالۋ ءۇشىن كوشە جارىقتاندىرۋ جۇيەسى قاراستىرىلعان.
بيىل كۇزدە مۇندا بيىكتىگى 3-4 مەتر بولاتىن شىرشالار ەگۋ دە جوسپارلانىپ وتىر.
ەندى شاعىناۋدان تۇرعىندارىنىڭ تازا اۋادا سەرۋەندەپ، وتباسىمەن دەمالىپ، ءوزارا ارالاسۋىنا تاعى ءبىر جايلى ورىن پايدا بولدى.
جالپى، 2026 جىلى الماتىنىڭ الاتاۋ اۋدانىندا «حالىق قاتىساتىن بيۋدجەت» باعدارلاماسى اياسىندا كوركەيتۋ بويىنشا 43 جوبا جۇزەگە اسىرىلىپ جاتىر.
باعدارلاماعا قاتىسۋ ءۇشىن ءوتىنىمدى https://budget.open-almaty.kz/ سايتى ارقىلى بەرۋگە بولادى.
