الماتى قالاسى جۇمىسپەن قامتۋ جانە الەۋمەتتىك باعدارلامالار باسقارماسىنا قاراستى «الماتى قالاسىنىڭ بەلسەندى ۇزاق ءومىر ءسۇرۋ ورتالىعى» كمم-دە جانە اۋداندىق بەلسەندى ۇزاق ءومىر ءسۇرۋ ورتالىقتارىندا جىل باسىنان بەرى شامامەن 333 مىڭ قىزمەت كورسەتىلدى. بۇل تۋرالى قالالىق جۇمىسپەن قامتۋ جانە الەۋمەتتىك باعدارلامالار باسقارماسىنىڭ وكىلدەرى ايتتى.
«الماتى قالاسىنىڭ بەلسەندى ۇزاق ءومىر ءسۇرۋ ورتالىعى» كوممۋنالدىق مەملەكەتتىك مەكەمەسى 2022 جىلى قۇرىلدى. زەينەت جاسىنداعى ازاماتتارعا كورسەتىلەتىن الەۋمەتتىك قىزمەتتەرگە سۇرانىستىڭ ارتۋىنا بايلانىستى 2024 جىلدىڭ اقپان ايىنان باستاپ قالالىق ورتالىقتىڭ ءۇش بولىمشەسى اشىلدى. ونىڭ ەكەۋى بوستاندىق اۋدانىندا، بىرەۋى مەدەۋ اۋدانىندا ورنالاسقان. بۇل بولىمشەلەرگە كۇن سايىن شامامەن 500 ادام كەلەدى.
جىل باسىنان بەرى ورتالىققا 13 302 زەينەتكەر جۇگىنىپ، ولارعا 48،4 مىڭنان استام قىزمەت كورسەتىلدى.
سونىمەن قاتار الماتى قالاسى اكىمدىكتەرىنىڭ جانىنان مەملەكەتتىك الەۋمەتتىك تاپسىرىس اياسىندا ۇكىمەتتىك ەمەس ۇيىمدار بازاسىندا جۇمىس ىستەيتىن 18 اۋداندىق بەلسەندى ۇزاق ءومىر ءسۇرۋ ورتالىعى قىزمەت كورسەتەدى. جىل باسىنان بەرى بۇل ورتالىقتارعا 8 834 ادام جۇگىنىپ، ولارعا 284،7 مىڭنان استام قىزمەت كورسەتىلدى.
ورتالىقتاردىڭ نەگىزگى ماقساتى – زەينەت جاسىنداعى ازاماتتاردى بەلسەندى قوعامدىق، مادەني، شىعارماشىلىق، سپورتتىق جانە ىسكەرلىك ومىرگە تارتۋ ارقىلى ولاردىڭ فيزيكالىق جانە پسيحيكالىق ساۋلىعىن نىعايتىپ، بەلسەندى ءومىر ءسۇرۋ ۇزاقتىعىن ارتتىرۋ.
الماتىنىڭ بەلسەندى ۇزاق ءومىر ءسۇرۋ ورتالىقتارىندا جىل باسىنان بەرى 333 مىڭعا جۋىق قىزمەت كورسەتىلدى
