الاتاۋ اۋدانىندا بۇقارالىق اقپارات قۇرالدارىنىڭ وكىلدەرىنە ارنالعان باسپا ءسوز تۋرى ۇيىمداستىرىلدى، - دەپ حابارلايدى alnews.
ءىس-شارا بارىسىندا اۋدان تۇرعىندارىنىڭ ءومىر ءسۇرۋ ساپاسىن ارتتىرۋعا باعىتتالعان ينفراقۇرىلىمدىق جانە الەۋمەتتىك جوبالاردىڭ جۇزەگە اسىرىلۋ بارىسى تانىستىرىلدى.
نىسانداردى الاتاۋ اۋدانىنىڭ اكىمى دانيار قىرىقبايەۆ تانىستىرىپ، جوبالاردىڭ ىسكە اسىرىلۋ كەزەڭدەرى، الەۋمەتتىك ماڭىزى جانە اۋداننىڭ الداعى دامۋ مۇمكىندىكتەرى تۋرالى ايتىپ بەردى.
باسپا ءسوز تۋرىنىڭ العاشقى نىسانى اقمارجان شاعىناۋدانىندا ورنالاسقان №230 جالپى ءبىلىم بەرەتىن جاڭا مەكتەپ بولدى. زاماناۋي ءبىلىم بەرۋ مەكەمەسى 2 مىڭ وقۋشىعا ارنالعان جانە تولىققاندى جۇمىسىن باستاۋ ءۇشىن بارلىق قاجەتتى رۇقسات قۇجاتتارىن العان.
«بۇگىندە الاتاۋ اۋدانىندا 35 مەكتەپ جۇمىس ىستەيدى. مەملەكەت باسشىسىنىڭ تاپسىرماسى اياسىندا بيىل ەكى زاماناۋي كەلەشەك مەكتەبى پايدالانۋعا بەرىلەدى. سونىڭ ءبىرى – 2 مىڭ وقۋشىعا ارنالعان وسى مەكتەپ. ءقازىردىڭ وزىندە مۇندا 1700-دەن استام بالا قابىلداندى، ال 1 قىركۇيەككە قاراي مەكتەپ وقۋشىلاردى تولىق قابىلداۋعا دايىن بولادى. ارينە، اۋدانداعى وقۋشى ورىندارىنىڭ تاپشىلىعى ماسەلەسى ءالى دە وزەكتى. دەگەنمەن جاڭا مەكتەپتەردىڭ اشىلۋى قولدانىستاعى ءبىلىم بەرۋ ۇيىمدارىنا تۇسەتىن جۇكتەمەنى ەداۋىر ازايتادى. بيىل تاعى بىرنەشە مەكتەپتى پايدالانۋعا بەرۋ جوسپارلانىپ وتىر. بۇل وقۋشى ورىندارىنىڭ جەتىسپەۋشىلىگىن ايتارلىقتاي قىسقارتۋعا مۇمكىندىك بەرەدى. الداعى جىلدارى دا بۇل باعىتتاعى جۇمىس جالعاسادى»، – دەدى الاتاۋ اۋدانىنىڭ اكىمى دانيار قىرىقبايەۆ.
№230 مەكتەپ «كەلەشەك مەكتەپتەرى» ۇلتتىق جوباسى اياسىندا سالىندى. جوبانىڭ باستى ماقساتى – ءقاۋىپسىز ءارى زاماناۋي ءبىلىم بەرۋ ورتاسىن قالىپتاستىرۋ.
مەكتەپ زاماناۋي تالاپتارعا ساي جابدىقتالعان. مۇندا ينفورماتيكا، روبوتوتەحنيكا، فيزيكا، حيميا، بيولوگيا كابينەتتەرى، STEM-زەرتحانا، مامانداندىرىلعان شەبەرحانا، رەسۋرستىق ورتالىعى بار كىتاپحانا جانە كەڭ دەمالىس ايماعى قاراستىرىلعان. ەرەكشە ءبىلىم بەرۋ قاجەتتىلىگى بار بالالار ءۇشىن ينكليۋزيا كابينەتتەرى مەن سەنسورلىق بولمە جابدىقتالعان.
وقۋشىلاردىڭ قاۋىپسىزدىگىنە ەرەكشە كوڭىل بولىنگەن. مەكتەپتە بەينەباقىلاۋ جانە Face ID قولجەتىمدىلىكتى باقىلاۋ جۇيەلەرى ەنگىزىلگەن، سونداي-اق وقۋشىلاردىڭ قوزعالىسى جاس ەرەكشەلىكتەرىنە قاراي بولىنگەن. عيمارات جوعارى سەيسميكالىق توزىمدىلىككە يە.
مەكتەپ اۋماعىندا سپورت الاڭى، ستاديون، workout ايماعى، تەننيس كورتى جانە امفيتەاتر سالىنعان. جاڭا ءبىلىم بەرۋ نىسانى №201 جانە №209 مەكتەپتەرگە تۇسەتىن جۇكتەمەنى ەداۋىر ازايتىپ، شاعىناۋدان تۇرعىندارىن ساپالى ءارى قولجەتىمدى ءبىلىم بەرۋ ينفراقۇرىلىمىمەن قامتاماسىز ەتەدى.
باسپا ءسوز تۋرىنىڭ كەلەسى نىسانى نۇركەنت شاعىناۋدانىنداعى جاڭا قوعامدىق كەڭىستىك بولدى. سكۆەردى كورىكتەندىرۋ جۇمىستارى بيىل مامىر ايىندا باستالىپ، قازىرگى ۋاقىتتا بەلسەندى كەزەڭدە جۇزەگە اسىرىلۋدا.
جوبا بالالار مەن ەرەسەكتەرگە ارنالعان جايلى ءارى زاماناۋي دەمالىس ورنىن قۇرۋدى كوزدەيدى. مۇندا سەرۋەن اللەيالارى، دەمالىس ايماعى، زاماناۋي شاعىن ساۋلەت نىساندارى، بالالار ويىن الاڭى، جاسىل جەلەك جانە اۆتوماتتى سۋارۋ جۇيەسى سالىنادى.
«جۇمىستار 26 مامىردا باستالدى جانە بەلگىلەنگەن مەرزىمدە اياقتالادى. قايتا جاڭعىرتۋ اياقتالعاننان كەيىن مۇندا جايلىلىق پەن قاۋىپسىزدىكتىڭ بارلىق تالابىنا ساي كەلەتىن زاماناۋي قوعامدىق كەڭىستىك قالىپتاسادى. وتباسىلىق دەمالىس پەن سپورتپەن اينالىسۋعا قولايلى ورتا قۇرۋعا ەرەكشە كوڭىل ءبولىنىپ وتىر. جوبادا قاراستىرىلعان بارلىق قۇرىلىم كەزەڭ-كەزەڭىمەن اياقتالادى. كورىكتەندىرۋ جۇمىستارى تولىق بىتكەن سوڭ بۇل ورىن اۋدان تۇرعىندارىنىڭ سۇيىكتى دەمالىس ورىندارىنىڭ بىرىنە اينالاتىنىنا سەنىمدىمىن»، – دەدى دانيار قىرىقبايەۆ.
جوبا اياسىندا 5،8 مىڭ شارشى مەتردەن استام كەسپەتاس توسەلىپ، 22 مىڭ شارشى مەتردەن استام كوگال ەگىلمەك. سونداي-اق 4،3 مىڭنان استام بۇتا وتىرعىزىلدى. تۇرعىنداردىڭ قولايلىعى ءۇشىن 40 ورىندىق پەن قوقىس جاشىگى، 21 شاعىن ساۋلەت نىسانى جانە سىرتقى جارىقتاندىرۋدىڭ 120 تىرەگى ورناتىلادى. جۇمىس اياقتالعاننان كەيىن سكۆەر تۇرعىنداردىڭ دەمالىس جانە بوس ۋاقىتىن وتكىزۋگە ارنالعان جاڭا قوعامدىق كەڭىستىككە اينالادى.
مەردىگەر ۇيىمنىڭ ديرەكتورى ديدار قونىسبايەۆتىڭ ايتۋىنشا، كورىكتەندىرۋ جوباسى اياسىندا شامامەن 3،5 گەكتار اۋماقتا زاماناۋي قوعامدىق كەڭىستىك سالىنىپ جاتىر. ول جاقىن ماڭداعى تۇرعىن ۇيلەردە تۇراتىن 1 800-دەن استام تۇرعىننىڭ جايلى دەمالۋىنا مۇمكىندىك بەرەدى.
«قازىرگى ۋاقىتتا قۇرىلىس جۇمىستارى جالعاسىپ جاتىر. نەگىزگى جۇمىستاردى قىركۇيەك ايىندا اياقتاۋدى جوسپارلاپ وتىرمىز. ءبىزدىڭ ماقساتىمىز – تۇرعىنداردىڭ سۇرانىسىنا ساي كەلەتىن جايلى ءارى زاماناۋي قوعامدىق كەڭىستىك قالىپتاستىرۋ»، – دەدى مەردىگەر ۇيىم وكىلى.
باسپا ءسوز تۋرىنىڭ سوڭعى نىسانى تەرەكتى شاعىناۋدانى بولدى. مۇندا سۋمەن جابدىقتاۋ جانە سۋ بۇرۋ جەلىلەرىن دامىتۋعا ارنالعان اۋقىمدى جوبا جۇزەگە اسىرىلۋدا. جوبانىڭ ماقساتى – تۇرعىنداردى زاماناۋي ينجەنەرلىك كوممۋنيكاسيالارمەن قامتاماسىز ەتىپ، اۋداننىڭ وزەكتى ماسەلەلەرىنىڭ ءبىرىن شەشۋ.
مەردىگەر ۇيىمنىڭ مالىمەتىنشە، جوبا اياسىندا جالپى ۇزىندىعى 92 شاقىرىمنان اساتىن سۋ قۇبىرى جانە كارىز جەلىلەرى سالىنادى. قازىرگى ۋاقىتتا جۇمىستاردىڭ ەداۋىر بولىگى ورىندالعان. جوبا اياقتالعاننان كەيىن شامامەن 9 مىڭ ادام تۇراتىن 1700-گە جۋىق جەكە تۇرعىن ءۇي ورتالىقتاندىرىلعان سۋمەن جابدىقتاۋ جانە سۋ بۇرۋ جۇيەسىنە قوسىلادى.
اۋدان اكىمىنىڭ ايتۋىنشا، تۇرعىنداردى ساپالى ينجەنەرلىك ينفراقۇرىلىممەن قامتاماسىز ەتۋ – اۋماقتى دامىتۋدىڭ باسىم باعىتتارىنىڭ ءبىرى. جوبا تولىق اياقتالعاننان كەيىن تەرەكتى شاعىناۋدانى ورتالىقتاندىرىلعان سۋ قۇبىرى جانە كارىز جۇيەلەرىمەن تولىق قامتىلىپ، تۇرعىنداردىڭ ءومىر ءسۇرۋ جايلىلىعى ارتىپ، نەگىزگى كوممۋنالدىق قىزمەتتەردىڭ بولماۋىنا بايلانىستى الەۋمەتتىك ماسەلەلەر شەشىمىن تابادى.
باسپا ءسوز تۋرىن قورىتىندىلاعان دانيار قىرىقبايەۆ الاتاۋ اۋدانى بۇگىندە مەگاپوليستىڭ ەڭ قارقىندى دامىپ كەلە جاتقان اۋماقتارىنىڭ ءبىرى ەكەنىن اتاپ ءوتتى. ونىڭ ايتۋىنشا، اۋداندا ءبىلىم بەرۋ، قوعامدىق كەڭىستىكتەردى دامىتۋ جانە ينجەنەرلىك ينفراقۇرىلىمدى جاڭعىرتۋ باعىتىنداعى ءىرى جوبالار قاتار جۇزەگە اسىرىلىپ جاتىر. بۇل جۇمىستاردىڭ بارلىعى تۇرعىندارعا قولايلى قالالىق ورتا قالىپتاستىرىپ، حالىقتىڭ ءومىر ءسۇرۋ ساپاسىن ارتتىرۋعا باعىتتالعان.
