الاتاۋ اۋدانىندا 2026 جىلدىڭ سوڭىنا دەيىن جالپى سىيىمدىلىعى 4 300 ورىندىق ءتورت مەكتەپتى پايدالانۋعا بەرۋ جوسپارلانعان. بۇل تۋرالى اۋدان اكىمدىگىنىڭ وكىلدەرى مالىمدەدى.
جاڭا وقۋ جىلىندا زەردەلى شاعىناۋدانىنداعى 550 ورىندىق №178 ليسەي، اقمارجان شاعىناۋدانىنداعى 2 مىڭ ورىندىق №230 مەكتەپ جانە عاجايىپ شاعىناۋدانىنداعى 1 200 ورىندىق جاڭا مەكتەپ وقۋشىلارعا ەسىگىن ايقارا اشادى. ال قاراسۋ شاعىناۋدانىنداعى №160 مەكتەپتى بيىل قاراشا ايىندا پايدالانۋعا بەرۋ جوسپارلانعان.
سايالى شاعىناۋدانىندا تاۋلىگىنە 200 ادام قابىلدايتىن وتباسىلىق دارىگەرلىك امبۋلاتوريانىڭ قۇرىلىسى اياقتالدى. سونداي-اق مۇندا يننوۆاسيالىق شىعارماشىلىق ورتالىق سالىنىپ، بالالاردى ۇيىرمەلەرگە قابىلداۋ باستالدى.
اۋداندا ينجەنەرلىك ينفراقۇرىلىمدى دامىتۋ جۇمىستارى دا جالعاسۋدا. 2026 جىلى راحات–مادەنيەت جانە شاپاعات شاعىناۋداندارىندا ۇزىندىعى 177،8 شاقىرىم بولاتىن سۋ قۇبىرى مەن كارىز جەلىلەرىن پايدالانۋعا بەرۋ جوسپارلانعان. بۇل شامامەن 19 مىڭ تۇرعىندى ورتالىقتاندىرىلعان ينجەنەرلىك جەلىلەرمەن قامتاماسىز ەتۋگە مۇمكىندىك بەرەدى. تەرەكتى شاعىناۋدانىندا قوسىمشا 92،2 شاقىرىم ينجەنەرلىك جەلى سالىنىپ جاتىر.
سونىمەن قاتار جالپى ۇزىندىعى 61،1 شاقىرىم بولاتىن 95 كوشەدە ورتاشا جول جوندەۋ جۇمىستارى جۇرگىزىلۋدە. ۇزىندىعى 3،2 شاقىرىم بولاتىن ساين كوشەسى اۋماعىنىڭ قۇرىلىسى اياقتالدى. قازىرگى ۋاقىتتا بورالداي، راحات–مادەنيەت جانە تەرەكتى شاعىناۋداندارىندا جول قۇرىلىسى جۇمىستارى جالعاسىپ جاتىر.
