الماتى ءماسليحاتىنىڭ كەزەكتەن تىس سەسسياسىندا قالا اكىمىنىڭ ورىنباسارى بەيبىت شاحانوۆ كەشەندى قالا قۇرىلىسى ساراپتاماسىنىڭ وڭ قورىتىندىسىن العان 2040 جىلعا دەيىنگى باس جوسپاردى تۇزەتۋ جوباسىنىڭ نەگىزگى ەرەجەلەرى تۋرالى باياندادى، - دەپ حابارلايدى alnews.
ول باس جوسپاردى تۇزەتۋ جۇمىستارىنىڭ ماڭىزدى باعىتتارىنىڭ ءبىرى قالا تۇرعىندارىمەن ءوزارا ءىس-قيمىل بولعانىن اتاپ ءوتتى. بەيبىت شاحانوۆتىڭ ايتۋىنشا، قوعامدىق تالقىلاۋلار بارىسىندا كەلىپ تۇسكەن ۇسىنىستار مەن وتىنىشتەر سارالانىپ، زاڭناما تالاپتارى مەن قالا قۇرىلىسى شەكتەۋلەرى ەسكەرىلە وتىرىپ، مۇمكىندىگىنشە جوبالىق شەشىمدەرگە ەنگىزىلگەن. سونىمەن قاتار ستراتەگيالىق ەكولوگيالىق باعالاۋعا جانە باس جوسپاردىڭ ىسكە اسىرىلۋىنا ودان ءارى قوعامدىق باقىلاۋ جۇرگىزۋگە ەرەكشە نازار اۋدارىلدى.
«باس جوسپاردى ودان ءارى ىسكە اسىرۋدىڭ ماڭىزى ەرەكشە. قۇجاتتى بەكىتۋ قالانىڭ كەيىنگى دامۋىنا نەگىز بولادى، الايدا وندا كوزدەلگەن شەشىمدەردى دايەكتى تۇردە جۇزەگە اسىرۋ نەگىزگى كەزەڭ بولماق. وسىعان بايلانىستى باس جوسپاردىڭ ىسكە اسىرىلۋىنا، قۇرىلىس پارامەترلەرىنىڭ ساقتالۋىنا، الەۋمەتتىك جانە ينجەنەرلىك ينفراقۇرىلىمنىڭ ۋاقىتىلى دامۋىنا، سونداي-اق جاسىل جەلەك پەن تابيعي اۋماقتاردىڭ ساقتالۋىنا تۇراقتى مونيتورينگ جۇرگىزۋدى قامتاماسىز ەتۋ قاجەت. حالىقپەن بايلانىس ورناتۋ جانە تۇرعىنداردى نەگىزگى جوبالاردىڭ ىسكە اسىرىلۋ بارىسى تۋرالى حاباردار ەتۋ دە ماڭىزدى باعىت بولىپ قالا بەرەدى. بۇل قالا قۇرىلىسى شەشىمدەرىنىڭ اشىقتىعىن ارتتىرۋعا جانە دەموگرافيالىق، كولىك، ەكولوگيالىق ءارى الەۋمەتتىك احۋالداعى وزگەرىستى دەر كەزىندە ەسكەرۋگە مۇمكىندىك بەرەدى»، – دەدى بەيبىت شاحانوۆ.
ونىڭ ايتۋىنشا، جاڭارتىلعان قۇجات سوڭعى دەرەكتەرگە نەگىزدەلگەن جانە ەكولوگيالىق، سەيسميكالىق، كولىك، الەۋمەتتىك جانە ينفراقۇرىلىمدىق شەكتەۋلەردى ەسكەرە وتىرىپ، قالانىڭ تەڭگەرىمدى دامۋىن قامتاماسىز ەتۋگە باعىتتالعان.
«قالانىڭ الدىندا الماتىنىڭ تابيعي الەۋەتىن ساقتاۋ، جايلى قالالىق ورتانى قامتاماسىز ەتۋ، كولىك بايلانىسىن جاقسارتۋ، حالىق سانىنىڭ وسۋىنە قاجەتتى جاعداي جاساۋ جانە سونىمەن قاتار قالانىڭ تاريحي بىرەگەيلىگىن ساقتاۋ مىندەتى تۇر»، – دەدى الماتى اكىمىنىڭ ورىنباسارى.
