الماتىداعى «الاتاۋ» ءداستۇرلى ونەر تەاترىنىڭ الدىنداعى الاڭدا جاڭا كونستيتۋسيانىڭ كۇشىنە ەنگەن كۇنىنە ارنالعان «ءبىز، ءبىرتۇتاس قازاقستان حالقى..!» اتتى اۋقىمدى كونسەرت ءوتتى، - دەپ حابارلايدى alnews.
الماتى قالاسى اكىمدىگىنىڭ قولداۋىمەن ۇيىمداستىرىلعان مادەني ءىس-شارانىڭ باستى ماقساتى – قازاقستاندىق قوعامداعى بىرلىك پەن قوعامدىق كەلىسىم قۇندىلىقتارىن ناسيحاتتاۋ، كونستيتۋسيانىڭ ەل ومىرىندەگى ماڭىزىن كەڭىنەن دارىپتەۋ، سونداي-اق قالا تۇرعىندارى مەن قوناقتارىنا كوتەرىڭكى كوڭىل كۇي سىيلاۋ.
Open-air فورماتىندا وتكەن كونسەرتتە ءبىر ساحنادا ەلىمىزدىڭ تانىمال انشىلەرى مەن شىعارماشىلىق ۇجىمدارى ونەر كورسەتتى. ساحنا تورىندە «ابىروي» جانە «كەشYOU» توپتارى، ايدانا مەدەنوۆا، Ziruza، «الاش ۇلى» توبى، ەركە، Raim، سادراددين جانە باسقا دا تانىمال ارتيستەر ءان شىرقادى. ولار پاتريوتتىق شىعارمالارمەن قاتار كوپشىلىك ءسۇيىپ تىڭدايتىن حيتتەرىن ورىنداپ، كورەرمەندەردىڭ ىستىق ىقىلاسىنا بولەندى. ساحنادان ونەرپازدار جينالعان قاۋىمدى جاڭا كونستيتۋسيانىڭ كۇشىنە ەنگەن كۇنىمەن قۇتتىقتاپ، قازاقستانعا بەيبىتشىلىك، تۇراقتىلىق پەن وسىپ-وركەندەۋىنە ارنالعان جۇرەكجاردى لەبىز جەتكىزدى.
كەش بارىسىندا الماتى قالاسى قوعامدىق كەڭەسىنىڭ مۇشەسى ديدار دىلدابەك، الماتى قالاسىنىڭ جاستار قوزعالىستارىنىڭ جەتەكشىسى ەرمۇحاممەد پالماعانبەتوۆ، «G35» ستۋدەنتتىك ءوزىن-وزى باسقارۋ ۇيىمىنىڭ وكىلى ماريام دۋانبەك جانە «الاش ۇلى» توبىنىڭ ءسوليسى ماقسات راحمەت ءسوز سويلەپ، قازاقستان حالقىنىڭ بىرلىگى، قوعامدىق كەلىسىم مەن ءوزارا قۇرمەت مەملەكەتتىڭ تۇراقتى دامۋىنىڭ باستى نەگىزى ەكەنىن ەرەكشە اتاپ ءوتتى. سونداي-اق، كونستيتۋسيا – ەلدىڭ قۇقىقتىق نەگىزدەرىن ايقىندايتىن، ءاربىر ازاماتتىڭ قۇقىعى مەن بوستاندىعىنا كەپىلدىك بەرەتىن ءارى مەملەكەتتىڭ تۇراقتى دامۋى مەن دەموكراتيالىق قاعيداتتارىنىڭ بەرىك تىرەگى سانالاتىن باستى قۇجات ەكەنى ايتىلدى.
كونسەرت سوڭىندا مىڭداعان الماتىلىق پەن قالا قوناعى سۇيىكتى ونەرپازدارىمەن بىرگە تانىمال اندەردى قوسىلا شىرقاپ، ەرەكشە جىلى اتموسفەرانىڭ ءبىر بولىگىنە اينالدى. «ءبىز، ءبىرتۇتاس قازاقستان حالقى..!» كونسەرتى كونستيتۋسيانىڭ ەل ومىرىندەگى ايرىقشا ءرولىن ايقىنداپ قانا قويماي، تۇرعىنداردى ورتاق ماقسات پەن ۇلتتىق قۇندىلىق توڭىرەگىنە توپتاستىرعان جارقىن مادەني كەش بولدى.
