الماتى قالاسىنداعى 11-سىنىپ وقۋشىلارى «تازا قازاقستان» رەسپۋبليكالىق ەكولوگيالىق اكسياسىنا قاتىسىپ، «تۇلەكتەردىڭ اعاش ەگۋى» ەكو-چەللەندجىن وتكىزدى. باستاما اياسىندا تۇلەكتەر مەكتەپ اۋماعىنا تۋيا مەن ۇيەڭكى كوشەتتەرىن وتىرعىزدى، - دەپ حابارلايدى alnews.
اعاش وتىرعىزۋ – مەكتەپكە دەگەن العىس پەن تۇلەكتىك جىلداردىڭ جارقىن ەستەلىگىنىڭ سيمۆولىنا اينالدى. اكسيانىڭ ماقساتى – ەكولوگيالىق مادەنيەتتى قالىپتاستىرۋ، جاستاردى قورشاعان ورتانى قورعاۋ ماسەلەلەرىنە تارتۋ جانە تابيعاتقا جاۋاپكەرشىلىكپەن قاراۋعا تاربيەلەۋ.
وقۋشىلار چەللەندجدى ەلىمىزدىڭ باسقا مەكتەپتەرىنىڭ تۇلەكتەرىنە جولداپ، باستامانى قولداۋعا جانە كوگالداندىرۋعا ۇلەس قوسۋعا شاقىردى.
«بۇل ءبىز ءۇشىن جاي عانا اكسيا ەمەس. جىلدار وتكەن سوڭ بۇل اعاشتار ءبىزدى ەسكە سالىپ، ءار ادام قالاسىنا پايدالى ءىس جاساي الاتىنىن كورسەتسە دەيمىز»، – دەدى تۇلەكتەردىڭ ءبىرى.
ءىس-شارا سونداي-اق «كەلەشەك مەكتەپتەرى» ۇلتتىق جوباسى اياسىندا ءبىلىم بەرۋ جانە تاربيەلىك مىندەتتەردى جۇزەگە اسىرۋعا باعىتتالعان، ياعني ءبىلىم مەن قۇندىلىقتاردى ناقتى ىستەر ارقىلى ۇشتاستىرۋدى كوزدەيدى.
