الماتىلىق بالۋان نۇرقوجا قايپانوۆ 24 قازان مەن 1 قاراشا ارالىعىندا استانادا وتكەن كۇرەستەن الەم چەمپيوناتىندا كۇمىس مەدال جەڭىپ الدى، - دەپ حابارلايدى alnews.
بايراقتى دوداعا الەمنىڭ 135 ەلىنەن 900-گە جۋىق سپورتشى قاتىستى. بۇل تۋرالى الماتى قالاسى سپورت باسقارماسىنىڭ وكىلدەرى حابارلادى.
نۇرقوجا قايپانوۆ ەركىن كۇرەستەن 74 كەلىگە دەيىنگى سالماق دارەجەسىندە ونەر كورسەتتى. ول ءتورت بەلدەسۋدە جەڭىسكە جەتىپ، قازاقستان قۇراماسىنان وسى چەمپيوناتتىڭ فينالىنا شىققان جالعىز سپورتشى اتاندى.
العاشقى بەلدەسۋىندە الماتىلىق بالۋان كوسوۆو وكىلى ەگزون ءدجونيدى 10:0 ەسەبىمەن جەڭسە، كەلەسى كەزدەسۋدە ءازىربايجاندىق تۋران بايراموۆتان 4:0 ەسەبىمەن باسىم ءتۇستى. شيرەك فينالدا تاجىكستان وكىلى ۆيكتور ءراسساديندى 11:0 ەسەبىمەن مەرزىمىنەن بۇرىن جەڭدى. ال جارتىلاي فينالدا جاپونيالىق وسينوسۋكە اوياگيدى 3:1 ەسەبىمەن ۇتتى.
فينالدىق بەلدەسۋدە نۇرقوجا رەسەيلىك ينالبەك شەرييەۆكە ەسە جىبەرىپ، الەم چەمپيوناتىنىڭ كۇمىس جۇلدەسىن يەلەندى.
بۇل نۇرقوجا قايپانوۆتىڭ ەرەسەكتەر اراسىنداعى الەم چەمپيوناتتارىندا جەڭىپ العان ءتورتىنشى جۇلدەسى. ول 2019 جىلى كۇمىس، 2024 جىلى التىن، ال 2025 جىلى قولا مەدال ەنشىلەگەن. سونىمەن قاتار الماتىلىق سپورتشى ازيانىڭ ءۇش دۇركىن چەمپيونى اتانعان.
