2025 جىلدىڭ ماۋسىم ايىندا قوستاناي قالاسىندا 23 جاسقا دەيىنگى جاستار اراسىندا قازاق كۇرەسىنەن قازاقستان رەسپۋبليكاسى چەمپيوناتى ءوتتى. اتالعان دوداعا ەلىمىزدىڭ بارلىق وڭىرىنەن 300-گە جۋىق ۇزدىك جاس بالۋان قاتىستى.
چەمپيوناتقا الماتى قالاسىنىڭ تۇركسىب اۋدانىنداعى "قازاق كۇرەسى" دەمالىس ورتالىعىنىڭ التى سپورتشىسى قاتىسىپ، ءوز شەبەرلىكتەرىن پاش ەتتى. ناتيجەسىندە، قوس بىردەي جاس بالۋان جۇلدەلى ورىندارعا يە بولدى.
اتاپ ايتقاندا، 74 كەلى سالماق دارەجەسىندە بەلدەسكەن ەركىن ۇلى جىگەرقارسىلاستارىنان باسىم ءتۇسىپ، التىن مەدال جەڭىپ الدى. ال 70 كەلىدە سىنعا تۇسكەن ماقسات قىزى شۇعىلا قولا جۇلدەگە يە بولدى.
«بۇل – مەنىڭ العاشقى ءىرى جەڭىسىم. وسىنداي مۇمكىندىك بەرگەن جاتتىقتىرۋشىلارىما جانە دەمالىس ورتالىعىنداعى ۇستازدارىما العىسىم شەكسىز. بولاشاقتا ەل چەمپيوناتتارىندا عانا ەمەس، حالىقارالىق ارەنالاردا دا ەل نامىسىن قورعاعىم كەلەدى»، – دەيدى چەمپيون ەركىن ۇلى جىگەر.
ايتا كەتۋ كەرەك، الماتى قالاسىنداعى دەمالىس ورتالىقتارىنىڭ جۇمىسى جاستار ساياساتى باسقارماسىنىڭ قولداۋىمەن جۇزەگە اسىرىلادى. وسىنداي جۇيەلى قولداۋدىڭ ارقاسىندا جاس سپورتشىلار ءوز قابىلەتتەرىن دامىتىپ، رەسپۋبليكالىق دەڭگەيدەگى جارىستاردا ءوڭىر نامىسىن ابىرويمەن قورعاپ كەلەدى.
