پاۆلودار وبلىسى، باياناۋىل اۋدانىندا جاسوسپىرىمدەر اراسىندا گرەك-ريم كۇرەسىنەن رەسپۋبليكالىق تۋرنير ءوتتى. اتالعان دوداعا ەلىمىزدىڭ تۇكپىر-تۇكپىرىنەن كەلگەن جاس سپورتشىلار قاتىسىپ، بوز كىلەمدە ءوزارا مىقتىنى انىقتادى. تۋرنيردە الماتى قالاسىنداعى مەدەۋ اۋدانىنداعى دەمالىس ورتالىقتارىنىڭ تاربيەلەنۋشىلەرى جوعارى ناتيجە كورسەتىپ، بىرنەشە جۇلدەلى ورىنعا يە بولدى.
باسەكەدە دارا شىققان سپورتشىلار:
· تۇرارباي زاڭعار – 33 كگ سالماقتا ءى ورىن
· سايلاۋ نۇريسلام – 38 كگ سالماقتا ءىى ورىن
· قىزايباي وسپان – 35 كگ سالماقتا ءىىى ورىن
· باۋرجان باتىرجان – 38 كگ سالماقتا ءىىى ورىن
· مۇحامجان ايبەك – 41 كگ سالماقتا ءىىى ورىن
«بۇل – ءبىزدىڭ سپورتشىلارىمىز ءۇشىن ۇلكەن تاجىريبە مەكتەبى. بالالار وسىنداي رەسپۋبليكالىق دەڭگەيدەگى تۋرنيرلەرگە قاتىسۋ ارقىلى ءوز قابىلەتتەرىن شىڭداپ، بولاشاقتا حالىقارالىق ارەنالاردا ەل نامىسىن قورعاي الاتىن مىقتى سپورتشىلارعا اينالاتىنىنا سەنەمىز»، – دەيدى جاتتىقتىرۋشىلار.
ايتا كەتەيىك، الماتى قالاسىنداعى دەمالىس ورتالىقتارىنىڭ جۇمىسى الماتى قالاسى جاستار ساياساتى باسقارماسىنىڭ قولداۋىمەن جۇزەگە اسىرىلادى. مەدەۋ اۋدانىنداعى ورتالىقتاردا تاربيەلەنىپ جاتقان جاسوسپىرىمدەرگە تۇراقتى تۇردە سپورتتىق ۇيىرمەلەر مەن جاتتىعۋلار ۇيىمداستىرىلىپ، ولاردىڭ جان-جاقتى دامۋىنا جاعداي جاسالىپ وتىر.
