الماتىدا 500-دەن استام جاس قالاداعى بارلىق كوميۋنيتي ورتالىقتاردا وتكەن LEVEL UP زياتكەرلىك ويىندارىنىڭ سەرياسىنا قاتىستى. بۇل تۋرالى الماتى قالاسى جاستار ساياساتى باسقارماسىنىڭ وكىلدەرى ايتتى.
كۆيز ALMA LOVE 2026 قالالىق فەستيۆالى اياسىندا ۇيىمداستىرىلدى. قاتىسۋشىلار سۇراقتارعا جاۋاپ بەرىپ قانا قويماي، كۇندەلىكتى ومىردە كەزدەسەتىن ءتۇرلى جاعدايلاردى بىرگە تالقىلادى. اتاپ ايتقاندا، سەنىمدى اقپاراتتى مانيپۋلياسيادان اجىراتۋ، قارجىنى ءتيىمدى باسقارۋ، قوعامدىق باستامالارعا قاتىسۋ جانە قالا ومىرىنە ىقپال ەتەتىن شەشىم قابىلداۋ جايى قاراستىرىلدى.
سۇراق پەن كوماندالىق تاپسىرما جاستار ساياساتى، ەرىكتىلىك، سيفرلىق ساۋاتتىلىق، وتباسىلىق قۇندىلىقتار، ءبىلىم بەرۋ جانە ەكولوگيالىق جاۋاپكەرشىلىك تاقىرىپتارىن قامتىدى.
«كۆيز ويىنى ءبىلىمىمىزدى سىناپ قانا قويماي، كوپتەگەن قوعامدىق ماسەلەگە جاڭاشا كوزقاراسپەن قاراۋعا مۇمكىندىك بەردى. وسىنداي جوبالار جاستاردىڭ جەكە جاۋاپكەرشىلىكتىڭ ماڭىزىن تۇسىنۋىنە، اقپاراتتى سارالاي بىلۋىنە جانە قوعامنىڭ بولاشاعىنا اسەر ەتەتىن سانالى شەشىم قابىلداۋىنا ىقپال ەتەدى»، – دەدى جوباعا قاتىسۋشىلاردىڭ ءبىرى اياۋلىم نۇرلان قىزى.
باعدارلاما ەكى باعىتقا ءبولىندى. ءبىرىنشى باعىت – «قالدىقسىز ۇتىمدى تۇتىنۋ» – رەسۋرستاردى ۇقىپتى پايدالانۋ، قالدىق كولەمىن ازايتۋ جانە ەكولوگيالىق داعدىلاردى قالىپتاستىرۋعا ارنالدى. ەكىنشى باعىت – «سانالى تاڭداۋ» – ازاماتتىق جاۋاپكەرشىلىك، سىني ويلاۋ جانە جاستاردىڭ قوعامدىق ومىرگە قاتىسۋ ماسەلەسىن قامتىدى.
ايتا كەتەيىك، ALMA LOVE 2026 فەستيۆالى الماتى قالاسى جاستار ساياساتى باسقارماسىنىڭ قولداۋىمەن 12 تامىزعا دەيىن جالعاسادى. فەستيۆال حالىقارالىق جاستار كۇنىنە وراي ۇيىمداستىرىلىپ، مادەني، ءبىلىم بەرۋ، سپورت، ەكولوگيا جانە الەۋمەتتىك باعىتتاعى ءىس-شارالاردى بىرىكتىرەدى.
