27 قىركۇيەكتە الماتىدا مەرەيتويلىق Almaty Marathon وتەدى، - دەپ حابارلايدى alnews.
بيىل حالىقارالىق جۇگىرۋ دوداسىنا 60-تان استام مەملەكەتتەن 16 مىڭ ادام قاتىسادى دەپ جوسپارلانىپ وتىر. مارافوندى الماتى اكىمدىگىنىڭ قولداۋىمەن «ءبىرىنشى بولۋ باتىلدىق» كورپوراتيۆتىك قورى ۇيىمداستىرادى. بۇل جونىندە قالالىق سپورت باسقارماسىنىڭ وكىلدەرى مالىمدەدى.
جارىسقا الەمنىڭ ءار قيىرىنان سپورتشىلار كەلەدى. ەڭ شالعاي نۇكتەلەر قاتارىندا بۋەنوس-ايرەس، سان-پاۋلۋ، وكلەند، سيدنەي، كەيپتاۋن، ۆانكۋۆەر جانە تورونتو بار. قازىرگى دەرەككە سايكەس، شەتەلدىك قاتىسۋشىلاردىڭ كوبى رەسەي، قىرعىزستان، وزبەكستان جانە قىتايدان كەلەدى. بۇدان بولەك، وڭتۇستىك كورەيا، اقش، ۇلىبريتانيا، بەلارۋس، گەرمانيا، ۋكراينا جانە وزگە مەملەكەتتەردىڭ جۇگىرۋشىلەرى تىركەلگەن.
مارافوننىڭ تانىمال شەتەلدىك قاتىسۋشىلارىنىڭ ءبىرى – 2018 جىلعى بوستون مارافونىنىڭ جەڭىمپازى يۋكي كاۆاۋچي. جاپونيالىق سپورتشى قازاقستان مەن ورتالىق ازياعا العاش رەت كەلىپ، الماتىدا 42،2 شاقىرىمدىق مارافون قاشىقتىعىن باعىندىرادى.
مەرەيتويلىق جارىسقا بايلانىستى بارلىق قاشىقتىقتىڭ باعىتى جاڭارتىلعان. 42،2 شاقىرىمدىق مارافون تراسساسى بيىل العاش رەت ءبىر اينالىمنان تۇرادى. جۇگىرۋشىلەر اباي داڭعىلىمەن مومىش ۇلى كوشەسىنە دەيىن جەتىپ، كەرى باعىتتا قوزعالادى. ودان ءارى مارشرۋت دوستىق داڭعىلى، بوگەنباي باتىر، قابانباي باتىر، شيەۆچەنكو، قۇرمانعازى، ناۋرىزباي باتىر جانە ساتبايەۆ كوشەلەرى ارقىلى وتەدى. جارىس اباي الاڭىنان باستالىپ، رەسپۋبليكا الاڭىندا مارەگە جەتەدى.
وتكەن جىلى Almaty Marathon-عا 60 مەملەكەتتەن 1 363 شەتەلدىك سپورتشى قاتىسقان. جارىستان كەيىن جۇرگىزىلگەن ساۋالنامادا ولاردىڭ 79،3%-ى الماتىعا تاعى دا كەلۋگە نيەتتى ەكەنىن بىلدىرگەن.
Almaty Marathon حالىقارالىق مارافوندار مەن جۇگىرۋلەر قاۋىمداستىعىنىڭ (AIMS) حالىقارالىق كۇنتىزبەسىنە ەنگىزىلگەن. سونداي-اق جارىس تۇركى حالىقتارىنىڭ مارافوندارىن بىرىكتىرەتىن TAN اليانسىنىڭ قۇرامىنا كىرەدى.
Almaty Marathon 2026 اياسىنداعى 42،2 جانە 21،1 شاقىرىمدىق قاشىقتىقتارعا قاتىسۋ ءۇشىن تىركەلۋ مارافوننىڭ رەسمي سايتىندا ءالى دە جالعاسىپ جاتىر.
