AI Talents Almaty ءبىلىم بەرۋ جوباسىنىڭ جەڭىمپازدارى حالىقارالىق تەحنولوگيالىق الاڭدا قازاقستان اتىنان ونەر كورسەتۋ، جاساندى ينتەللەكت جونىندەگى كونفەرەنسياعا قاتىسۋ جانە وسى سالاداعى الەمدىك ازىرلەمەلەرمەن تانىسۋ ءۇشىن اقش-قا اتتاندى، - دەپ حابارلايدى alnews.
AI Talents Almaty – وقۋشىلارعا باعدارلامالاۋ مەن جاساندى ينتەللەكت نەگىزدەرىن ۇيرەتۋگە باعىتتالعان ءبىلىم بەرۋ جوباسى. باعدارلاما الماتى قالاسىنىڭ سيفرلاندىرۋ باسقارماسىنىڭ قولداۋىمەن جۇزەگە اسىرىلىپ جاتىر. وعان IT سالاسىندا بۇرىن تاجىريبەسى بولماعان بالالار دا قاتىسا الادى.
وقۋ باعدارلامالاۋ نەگىزىنەن باستالىپ، بىرتىندەپ قوسىمشا، سيفرلىق سەرۆيس پەن جاساندى ينتەللەكت اگەنتتەرىن ازىرلەۋگە ۇلاسادى. وقۋشىلار كاسىبي مەنتورلاردىڭ جەتەكشىلىگىمەن زاماناۋي قۇرالداردى مەڭگەرىپ، ۇدەرىستەردى اۆتوماتتاندىرۋدى جانە ناقتى مىندەتتەردى شەشۋگە ارنالعان تەحنولوگيالىق شەشىمدەر ازىرلەۋدى ۇيرەنەدى.
«باعدارلاما تاجىريبەلىك وقىتۋعا نەگىزدەلگەن. وقۋشىلار باعدارلامالاۋ نەگىزدەرىن مەڭگەرىپ، جاساندى ينتەللەكت قۇرالدارىن قولدانۋدى، سيفرلىق ونىمدەر ازىرلەۋدى جانە ءوزىنىڭ جاساندى ينتەللەكت اگەنتتەرىن جاساۋدى ۇيرەنەدى. قاتىسۋشىلارعا كاسىبي مەنتورلار مەن IT يندۋسترياسىنىڭ ساراپشىلارى كومەكتەسەدى. ال العان ءبىلىمىن حاكاتونداردا جانە جوبا ازىرلەۋ بارىسىندا قولدانادى»، – دەدى الماتى قالاسى سيفرلاندىرۋ باسقارماسىنىڭ باسشىسى نۇرقانات ءسابيت.
جوبا اياسىنداعى باستاپقى تەستىلەۋدەن 10 مىڭ وقۋشى ءوتتى. ولاردىڭ اراسىنان 1 500 وقۋشى تەرەڭدەتىلگەن وقۋعا ىرىكتەلدى. مىڭنان استام قاتىسۋشى كۋرستى اياقتاپ، Junior ازىرلەۋشى سەرتيفيكات الدى جانە ءوزىنىڭ سيفرلىق ونىمدەرىن تانىستىردى.
تاجىريبەلىك باعدارلاما اياسىندا ءۇش حاكاتون وفلاين فورماتتا ۇيىمداستىرىلدى. قاتىسۋشىلار وندا جوبالار ازىرلەپ، ولاردى ساراپشىلار الدىندا قورعادى. AITK Fest 2026 قورىتىندىسى بويىنشا كرەمنيي القابىنا بارۋ مۇمكىندىگىنە يە بولعان 11 جەڭىمپاز انىقتالدى.
اقش-تا وقۋشىلار NVIDIA كومپانياسىنىڭ تەحنيكالىق باعدارلامالار جونىندەگى اعا مەنەدجەرى ابحيدجيت دجوشيمەن (Abhijeet Joshi) كەزدەسىپ ۇلگەردى.
ساپاردىڭ باستى وقيعالارىنىڭ ءبىرى 3–6 قاراشا ارالىعىندا ءوتىپ جاتقان TechEquity AI Summit 2026 كونفەرەنسياسىنا قاتىسۋ. 5 قاراشادا جاساندى ينتەللەكتىنى دامىتۋعا جانە ونى ءتۇرلى سالالاردا قولدانۋعا ارنالعان كونفەرەنسياعا بارۋ جوسپارلانعان. بايانداماشىلار قاتارىندا NVIDIA، Google، Google DeepMind، Snowflake، Meta، IBM، Adobe كومپانيالارى مەن ستەنفورد ۋنيۆەرسيتەتىنىڭ ساراپشىلارى بار.
سونىمەن قاتار الماتىلىق وقۋشىلار Company Brain Hackathon حاكاتونىنا قاتىسىپ، العان ءبىلىمىن ءىس جۇزىندە قولدانۋعا جانە باسقا ازىرلەۋشىلەرمەن تاجىريبە الماسۋعا مۇمكىندىك الادى.
ساپار باعدارلاماسىنا ستەنفورد ۋنيۆەرسيتەتى مەن بەركليدەگى كاليفورنيا ۋنيۆەرسيتەتىنە (UC Berkeley) بارۋ، ولاردىڭ عىلىمي-زەرتتەۋ باعىتتارىمەن جانە ءبىلىم الۋ مۇمكىندىكتەرىمەن تانىسۋ دا ەنگىزىلگەن.
قاتىسۋشىلار California PATH زەرتتەۋ باعدارلاماسىنىڭ 40 جىلدىعىنا ارنالعان PATH@40 حالىقارالىق ءىس-شاراسىنا دا بارادى. مۇندا جاساندى ينتەللەكت، جۇرگىزۋشىسىز كولىك جانە زياتكەرلىك قالالىق ينفراقۇرىلىم سالالارىنداعى ازىرلەمەلەر تانىستىرىلادى.
بۇل ساپار وقۋشىلارعا جەتەكشى تەحنولوگيالىق كومپانيالار مەن ۋنيۆەرسيتەتتەردىڭ جۇمىسىمەن تانىسۋعا، ازىرلەمەسىن ۇسىنۋعا جانە حالىقارالىق كاسىبي ءىس-شارالارعا قاتىسۋ تاجىريبەسىن جيناقتاۋعا مۇمكىندىك بەرەدى.
