6-8 قاراشا الماتىداعى ناتاليا ساس اتىنداعى مەملەكەتتىك اكادەميالىق ورىس بالالار مەن جاسوسپىرىمدەر تەاترى كورەرمەندەردى قايتا قابىلدايدى، - دەپ حابارلايدى alnews.
جاڭارتىلعان كەشەننىڭ اشىلۋىنا وراي ارنايى باعدارلاما ازىرلەندى. كورەرمەندەر «ەتىك كيگەن مىسىق» مۋزىكالىق ەرتەگىسىن، «شەكسپيرگە دەگەن قۇشتارلىق» كومەدياسىن جانە «ساس. ۇيگە ورالۋ» گالا-قويىلىمىن تاماشالاي الادى.
تاريحي عيماراتتىڭ ساۋلەتتىك كەلبەتى ساقتالىپ، ىشىندەگى ينجەنەرلىك جەلىلەر، دىبىس، جارىق جانە ساحنا جابدىقتارى جاڭعىرتىلدى. رەستاۆراتورلار موزايكالىق كومپوزيسيالاردى، ءمارمار بەتتەردى جانە ينتەرەردىڭ باسقا دا قۇرىلىمدارىن قالپىنا كەلتىردى. نەگىزگى ساحنا زاماناۋي تەحنيكالىق قۇرالدارمەن جابدىقتالىپ، قويىلىم قويۋ مۇمكىندىكتەرى كەڭەيدى.
تەاتردىڭ جانىنان قازاقستان مەن رەسەيدىڭ ەڭبەك سىڭىرگەن قايراتكەرى، 1986-2005 جىلدارى تەاتردى باسقارعان بوريس پرەوبراجەنسكيي اتىنداعى شاعىن ساحناسى بار جاڭا عيمارات سالىندى.
260 كورەرمەنگە ارنالعان زال Black Box فورماتىندا جاسالعان. ونىڭ باستى ەرەكشەلىگى – قويىلىمنىڭ مازمۇنىنا قاراي ساحنا مەن كورەرمەن ورىندارىنىڭ ورنالاسۋىن وزگەرتۋگە بولادى.
جاڭا عيماراتتا ءبىر ۇلكەن جانە ەكى شاعىن دايىندىق زالى، بالەت سىنىبى مەن كوركەمدىك-وندىرىستىك شەبەرحانا جابدىقتالعان.
كىشكەنتاي كورەرمەندەر ءۇشىن Baby Hall كەڭىستىگى اشىلادى. مۇندا بالالار تەاتر الەمىمەن تانىسا الادى. سونىمەن قاتار كىتاپ وقۋعا جانە شىعارماشىلىق كەزدەسۋلەر وتكىزۋگە ارنالعان Book Hall مەن «Sats ComUnity» بالالار ستۋدياسىنىڭ وقۋ تەاترى جۇمىس ىستەيدى.
ەندى تەاتر نەگىزگى جانە شاعىن ساحنالاردا قويىلىمداردى قاتار كورسەتە الادى. ال قوسىمشا بولمەلەر دايىندىق جۇمىستارىنا، بالالار ستۋدياسىنىڭ ساباقتارىنا جانە شىعارماشىلىق كەزدەسۋلەرگە پايدالانىلادى.
اشىلۋ باعدارلاماسى:
* 6 قاراشا، ساعات 11:00 – «ەتىك كيگەن مىسىق» مۋزىكالىق ەرتەگىسى؛
* 6 قاراشا، ساعات 19:00 – «شەكسپيرگە دەگەن قۇشتارلىق» كومەدياسى؛
* 7 قاراشا – تەاتردىڭ تۋعان كۇنى مەن جاڭارتىلعان عيماراتتىڭ اشىلۋىنا ارنالعان «ساس. ۇيگە ورالۋ» گالا-قويىلىمى؛
* 7 جانە 8 قاراشا، ساعات 12:00 – «ەتىك كيگەن مىسىق» مۋزىكالىق ەرتەگىسى؛
* 7 جانە 8 قاراشا، ساعات 18:00 – «شەكسپيرگە دەگەن قۇشتارلىق» كومەدياسى.
