الماتىنىڭ اتموسفەرالىق اۋاسىن قورعاۋ قاعيدالارىن ەنگىزۋ جونىندەگى جۇمىس توبى شىعىس ەۋروپادا تومەن شىعارىندىلار ايماعى – LEZ العاش ەنگىزىلگەن سوفيا قالاسىنىڭ تاجىريبەسىن زەردەلەدى، - دەپ حابارلايدى alnews.
دەلەگاسيا قۇرامىنا Almaty Air Initiative، «Eco Almaty» ج ش س، LEZ وپەراتورى – «الماتى پاركينگ» كمك وكىلدەرى، سونداي-اق الماتىنىڭ اتموسفەرالىق اۋاسىن قورعاۋ قاعيدالارىن ازىرلەۋ جانە ەنگىزۋ جونىندەگى جۇمىس توبىنىڭ مۇشەلەرى كىردى. سوفيادا ولار مۋنيسيپاليتەت وكىلدەرىمەن، ساراپشىلارمەن، قالالىق كەڭەس دەپۋتاتىمەن جانە دارىگەرلەر قاۋىمداستىعىنىڭ وكىلىمەن كەزدەستى.
Almaty Air Initiative مالىمەتىنشە، LEZ ىسكە قوسىلعاننان كەيىن سوفياداعى ەرەجە بۇزۋشىلىق سانى شامامەن 93% ازايعان. تومەن ەكولوگيالىق ساناتتاعى اۆتوكولىكتەر سانى تاۋلىگىنە شامامەن 20 مىڭنان 2026 جىلعى اقپاندا 1،3-1،4 مىڭعا دەيىن تومەندەدى. بۇل رەتتە ايىپپۇلداردى تولىق كولەمدە ءوندىرىپ الۋ ءالى قولدانىلعان جوق. ناتيجەگە اۆتوماتتى تىركەۋ، جۇرگىزۋشىلەردى اقپاراتتاندىرۋ جانە حاباردار ەتۋ ارقىلى قول جەتكىزىلگەن.
ساپار بارىسىندا سوفيانىڭ شەكتەۋدى كەزەڭ-كەزەڭىمەن ەنگىزۋ، اينالىپ وتەتىن باعىتتاردى ۇيىمداستىرۋ، تۇرعىندارعا الەۋمەتتىك قولداۋ كورسەتۋ، سيفرلىق اكىمشىلەندىرۋ جانە اۋا ساپاسىن باقىلاۋ تاسىلدەرى زەردەلەندى.
حالىقتى قولداۋ شارالارىنا ەرەكشە نازار اۋدارىلدى. سوفيادا كومىر مەن وتىندى پايدالانۋعا ەنگىزىلگەن شەكتەۋ جىلۋ جابدىقتارىن تەگىن اۋىستىرۋمەن قاتار جۇرگىزىلگەن. 2026 جىلدىڭ باسىنا دەيىن شامامەن 11 مىڭ ءۇي شارۋاشىلىعىندا 20 مىڭعا جۋىق قۇرىلعى اۋىستىرىلدى.
Almaty Air Initiative اتقارۋشى ديرەكتورى جۇلدىز ساۋلەبەكوۆانىڭ ايتۋىنشا، دەلەگاسيا ءۇشىن بۇل جولدان جۋىردا وتكەن قالانىڭ تاجىريبەسىن زەردەلەپ، وعان تىكەلەي قاتىسۋشىلارمەن قانداي تەتىكتەردىڭ ءتيىمدى بولعانىن، قانداي قيىندىققا تاپ بولعانىن جانە بۇگىندە نەنى باسقاشا جاسار ەدى دەگەن ماسەلەلەردى تالقىلاۋ ماڭىزدى بولدى.
«Eco Almaty» ج ش س باس ديرەكتورىنىڭ ورىنباسارى ايدانا قاسەننىڭ ايتۋىنشا، سوفيا تاجىريبەسى ەكولوگيالىق شەكتەۋدى كەزەڭ-كەزەڭىمەن ەنگىزىپ، سونىمەن قاتار حالىققا قولداۋ كورسەتكەن جاعدايدا ولاردىڭ تيىمدىلىگى جوعارى بولاتىنىن كورسەتتى.
ءقازىر الماتىدا بوگەنباي باتىر – اباي – جەلتوقسان – دوستىق كوشەلەرى اۋماعىندا LEZ تەحنيكالىق پيلوتتىق جوباسى جۇزەگە اسىرىلىپ جاتىر. 2026 جىلى 31 جەلتوقسانعا دەيىن ەشقانداي شەكتەۋ، ايىپپۇل جانە كىرۋ اقىسى قاراستىرىلماعان.
قازىرگى كەزەڭدە قالا كامەرالاردى، رادارلىق سەنسورلار مەن كولىكتى تانۋ جۇيەلەرىن سىناقتان وتكىزىپ، كولىك اعىنى تۋرالى دەرەكتەردى اۋا ساپاسىنىڭ كورسەتكىشتەرىمەن سايكەستەندىرۋدە جانە ءتيىستى قىزمەتتەردىڭ ءوزارا ءىس-قيمىلىن پىسىقتاپ جاتىر.
ساپار قورىتىندىسى بويىنشا Almaty Air Initiative الماتىعا ارنالعان ۇسىنىمدار قامتىلعان تالدامالىق ەسەپ ازىرلەدى. ولاردىڭ قاتارىندا لاستانۋ كوزدەرىن الدىن الا انىقتاۋ، ءتۇرلى باسقارمالاردىڭ دەرەگىن بىرىكتىرۋ، قوعامدىق كولىكتى دامىتۋ، تۇرعىندارعا اتاۋلى قولداۋ كورسەتۋ جانە شەكتەۋ ەنگىزىلگەنگە دەيىن سيفرلىق اكىمشىلەندىرۋ جۇيەسىن تولىق جولعا قويۋ بار.
