شىلدە ايىنىڭ العاشقى دەمالىس كۇندەرى الماتىدا ءداستۇرلى اۋىل شارۋاشىلىعى جارمەڭكەلەرى وتەدى، - دەپ حابارلايدى alnews.
وندا قالا تۇرعىندارىنا جاڭا جينالعان ونىمدەردىڭ ءتۇر-تۇرى ۇسىنىلادى. وتاندىق فەرمەرلەر مەن وندىرۋشىلەردىڭ تىكەلەي جەتكىزۋىنىڭ ارقاسىندا ونىمدەر دەلدالسىز ءارى قولجەتىمدى باعامەن ساتىلادى.
«الماتى» الەۋمەتتىك-كاسىپكەرلىك كورپوراسياسى ۇيىمداستىراتىن دەمالىس كۇندەرى جارمەڭكەلەرى وتاندىق اۋىل شارۋاشىلىعى تاۋارىن وندىرۋشىلەرگە ءوز ونىمدەرىن تىكەلەي ساتۋعا مۇمكىندىك بەرەدى. جارمەڭكەلەردە 1000-نان استام ءتۇرلى تاۋار ۇسىنىلعان. ولاردىڭ قاتارىندا جاڭا پىسكەن كوكونىستەر مەن جەمىستەر، ەت جانە ءسۇت ونىمدەرى، جۇمىرتقا، بال، نان-توقاش جانە كونديتەرلىك ونىمدەر، كەپتىرىلگەن جەمىستەر مەن ۇيدە دايىندالعان نان ونىمدەرى بار.
جارمەڭكەلەرگە الماتى قالاسى، الماتى وبلىسى جانە قازاقستاننىڭ وزگە وڭىرلەرىنەن 300-دەن استام فەرمەرلىك شارۋاشىلىق، اۋىل شارۋاشىلىعى تاۋارىن ءوندىرۋشى جانە كاسىپكەر قاتىسادى. بۇل فورمات تىكەلەي جەتكىزۋ جۇيەسىن دامىتۋعا، وتاندىق وندىرۋشىلەردى قولداۋعا جانە ازىق-تۇلىك باعاسىنىڭ قولجەتىمدى دەڭگەيدە ساقتالۋىنا ىقپال ەتەدى.
قازىرگى تاڭدا جارمەڭكەلەر اۋەزوۆ، المالى، مەدەۋ، بوستاندىق جانە جەتىسۋ سىندى قالانىڭ بەس اۋدانىندا جۇمىس ىستەيدى.
سونىمەن قاتار بوستاندىق جانە اۋەزوۆ اۋداندارىنداعى ساۋدا الاڭدارىن جاڭعىرتۋ جۇمىستارى جالعاسۋدا. بۇل جۇمىس اياسىندا اۋماقتار كورىكتەندىرىلىپ، سانيتارلىق جاعدايدى جاقسارتىلادى، ساۋدا ينفراقۇرىلىمىن جاڭارتىلىپ، ساۋدا قاتارلارى رەتكە كەلتىرىلەدى.
جوندەۋ جۇمىستارى جۇرگىزىلىپ جاتقان كەزەڭدە اۋەزوۆ اۋدانىنداعى جارمەڭكە ۋاقىتشا رىسقۇلبەكوۆ كوشەسى، 33/2 مەكەنجايىنا كوشىرىلدى. سونداي-اق، بيىلعى مامىر ايىندا جەتىسۋ اۋدانىنداعى قۇلاگەر شاعىناۋدانىندا جاڭا جارمەڭكە الاڭى جۇمىسىن باستادى.
جىل باسىنان بەرى جارمەڭكەلەردە 16،5 مىڭ توننادان استام ءونىم ساتىلىپ، كەلۋشىلەر سانى 85 مىڭ ادامنان استى. ورتا ەسەپپەن اي سايىن مۇندا شامامەن 3 مىڭ توننا ءونىم وتكىزىلەدى. بىلتىر بۇل كورسەتكىش 2،5 مىڭ توننا بولعان. وسىلايشا، ساۋدا كولەمى شامامەن 20%-عا ءوسىپ، جارمەڭكەلەردىڭ قالا تۇرعىندارى اراسىندا تانىمالدىعى ارتىپ كەلە جاتقانىن كورسەتىپ وتىر.
جارمەڭكەلەر ءار سەنبى جانە جەكسەنبى كۇندەرى ساعات 09:00-دەن 18:00-گە دەيىن مىنا مەكەنجايلاردا وتەدى:
• بوستاندىق اۋدانى — قازاقفيلم شاعىناۋدانى؛
• اۋەزوۆ اۋدانى — رىسقۇلبەكوۆ كوشەسى، 33/2؛
• مەدەۋ اۋدانى — مەڭدىقۇلوۆ جانە بەكتۇروۆ كوشەلەرىنىڭ قيىلىسى؛
• المالى اۋدانى — ماسانچي كوشەسى، ايتەكە بي مەن گوگول كوشەلەرىنىڭ ارالىعى؛
• جەتىسۋ اۋدانى — قۇلاگەر شاعىناۋدانى.
