الماتىنىڭ جەتىسۋ اۋدانىندا «جەتىسۋ-2» جاستار كوميۋنيتي ورتالىعىنىڭ بازاسىندا جاڭا ەكو-حاب اشىلدى، - دەپ حابارلايدى alnews.
بۇل قالاداعى وسىنداي ءۇشىنشى ەكولوگيالىق كەڭىستىك.
ەكو-حاب «تازا قازاقستان» باستاماسى اياسىندا «Eco Almaty» ءجشس-نىڭ قولداۋىمەن قۇرىلدى. مۇندا قالدىقتاردى بولەك جيناۋ جانە قايتا وڭدەۋ مادەنيەتىن دامىتۋ، اعارتۋشىلىق ءىس-شارالار وتكىزۋ جانە جاستاردىڭ ەكولوگيالىق باستاماسىن قولداۋ جوسپارلانعان.
«تازا قازاقستان» – ءبىر رەتتىك اكسيا نەمەسە تەك سەنبىلىك وتكىزۋمەن شەكتەلەتىن باستاما ەمەس. ءبىز ءار ادامنىڭ قورشاعان ورتاعا جاۋاپكەرشىلىكپەن قاراۋدى كۇندەلىكتى ادەتكە اينالدىرعانىن قالايمىز. جاڭا ەكو-حاب جاستارعا ەكولوگيالىق باستاماسىن جۇزەگە اسىرۋعا، جاڭا يدەيا ۇسىنۋعا جانە ناقتى ىس-ارەكەت ارقىلى قالامىزدىڭ تازالىعىنا ۇلەس قوسۋعا مۇمكىندىك بەرەدى. تازا قالا ءارقايسىمىزدىڭ جۇيەلى ىس-ارەكەتىمىزدەن باستالادى»، – دەدى الماتى قالاسى جاستار ساياساتى باسقارماسىنىڭ باسشىسى ازيز كاجدەنبەك.
ەكو-حاب اۋماعىندا قالدىقتاردى بولەك جيناۋعا ارنالعان 10 ارنايى كونتەينەر ورناتىلدى. اۋدان تۇرعىندارى مەن جاستار پلاستيك، اليۋمينيي، قاعاز جانە قايتا وڭدەۋگە جارامدى باسقا دا ماتەريالداردى تاپسىرا الادى.
كەڭىستىك قايتالاما شيكىزات قابىلدايتىن پۋنكت رەتىندە عانا جۇمىس ىستەمەيدى. مۇندا شەبەردىڭ ساباقتارىن، كەزدەسۋ، ەكولوگيالىق اكسيا جانە باسقا دا ءىس-شارالار وتكىزۋ، سونداي-اق ەكوبەلسەندىلەر مەن ەرىكتىلەردى بىرىكتىرۋ جوسپارلانعان.
اشىلۋ بارىسىندا قاتىسۋشىلارعا ەكو-حابتىڭ جۇمىسى جانە ەكو-تراكتىڭ كومەگىمەن پلاستيك قالدىقتاردى قايتا وڭدەۋ ۇدەرىسى كورسەتىلدى. سونداي-اق قايتا وڭدەلگەن ماتەريالداردان جاسالعان تۇرمىستىق جانە ساندىك بۇيىمدار كورمەسى ۇسىنىلدى.
سونىمەن قاتار ECO Network جوباسىنىڭ جەتەكشىسى ەۆگەنيي مۇحامەدجانوۆتىڭ قاتىسۋىمەن «تازا قازاقستان – ءبىر كۇندىك اكسيا ەمەس» اتتى اشىق ديالوگ الاڭى ءوتتى. قاتىسۋشىلار ەكولوگيالىق جاۋاپكەرشىلىك، قالدىقتاردى سۇرىپتاۋ مادەنيەتى جانە جاستاردىڭ ەكولوگيالىق جوبالارعا قاتىسۋ ماسەلەسىن تالقىلادى.
بۇگىندە الماتىدا 18 مىڭنان استام ادامدى قامتىعان 98-دەن استام ەكولوگيالىق ءىس-شارا وتكىزىلدى. قالالىق اۋقىمدى سەنبىلىكتەرگە 3،6 مىڭنان استام الماتىلىق جاس قاتىستى.
جاڭا ەكو-حاب ەكولوگيالىق باستامالار، اعارتۋشىلىق ءىس-شارالار جانە قالدىقتاردى بولەك جيناۋ ءۇشىن تۇراقتى جۇمىس ىستەيتىن الاڭعا اينالادى.
