الماتىدا قازاقستاندىق جانە شەتەلدىك عالىمدار، فيلوسوفتار، وقىتۋشىلار مەن جاس زەرتتەۋشىلەردىڭ باسىن قوسقان «قازاقستان قوعامىنىڭ فيلوسوفياسى: قۇندىلىق باعدارلارى مەن دامۋ مۇمكىندىكتەرى» اتتى IV قازاقستاندىق فيلوسوفيالىق كونگرەسس ءوتىپ جاتىر. بۇل تۋرالى الماتى قالاسى جاستار ساياساتى باسقارماسىنىڭ وكىلدەرى حابارلادى.
كونگرەسس قاتىسۋشىلارىنىڭ باستى نازارىندا ۇلتتىق بىرەگەيلىك، رۋحاني-ادامگەرشىلىك قۇندىلىق، ءبىلىم بەرۋ سالاسىن دامىتۋ جانە سيفرلىق تەحنولوگيانىڭ قازىرگى قوعامعا اسەرى ماسەلەلەرى تۇر. ءىس-شارا باعدارلاماسى اياسىندا پلەنارلىق وتىرىستار، عىلىمي پىكىرتالاستار، دوڭگەلەك ۇستەلدەر مەن ستۋدەنتتەرمەن كەزدەسۋلەر ۇيىمداستىرىلعان.
كونگرەستە جاستار تاربيەسىنە، مادەني مۇرانى ساقتاۋعا جانە قازاقستان پرەزيدەنتى قاسىم-جومارت توقايەۆ ۇسىنعان «ادال ازامات» تۇجىرىمداماسىنىڭ قاعيداتتارىنا ەرەكشە كوڭىل ءبولىندى.
«بۇگىندە جاستار وراسان زور اقپارات اعىنىندا ءومىر ءسۇرىپ جاتىر. الايدا ولاردىڭ سيفرلىق داعدىلارىمەن قاتار سىني ويلاۋ قابىلەتىن، بولىپ جاتقان وقيعالاردى تالداي ءبىلۋ جانە ءوز بەتىنشە شەشىم قابىلداۋ داعدىسىن دامىتۋ ماڭىزدى. فيلوسوفيا جاس ادامنىڭ ءوز ىس-ارەكەتىنە وي جۇگىرتۋىنە، قوعام الدىنداعى جاۋاپكەرشىلىگىن تۇسىنۋىنە جانە ومىرلىك ۇستانىمدارىن قالىپتاستىرۋىنا كومەكتەسەدى. ءدال وسى قاسيەتتەر «ادال ازامات» قاعيداتتارىنىڭ نەگىزىن قۇرايدى»، – دەدى الماتى قالاسى جاستار ساياساتى باسقارماسىنىڭ باسشىسى ازيز كاجدەنبەك.
باعدارلامانىڭ جەكە ءبىر بولىگى جاساندى ينتەللەكت ماسەلەلەرىنە ارنالدى. عالىمدار ونىڭ ءبىلىم الۋ تاسىلدەرىنە ىقپالىن، جاڭا تەحنولوگيانى قولدانۋ بارىسىندا تۋىنداۋى مۇمكىن قاۋىپ-قاتەرلەردى جانە سيفرلاندىرۋ جاعدايىندا دەربەس ويلاۋ قابىلەتىن ساقتاۋدىڭ ماڭىزىن تالقىلادى.
كونگرەسس اياسىندا تۇركى جانە دالا فيلوسوفياسى، عىلىمي زەرتتەۋلەر، سونداي-اق ءبىلىم بەرۋ جۇيەسىندەگى فيلوسوفيالىق ويلاۋ مادەنيەتىنە ارنالعان تاقىرىپتىق الاڭدار دا جۇمىس ىستەپ جاتىر.
ازيز كاجدەنبەكتىڭ ايتۋىنشا، مۇنداي زياتكەرلىك الاڭداردى تەك عىلىمي كونفەرەنسيا شەڭبەرىندە عانا ەمەس، ودان تىس جەرلەردە دە دامىتىپ، ستۋدەنتتەر مەن جاس مامانداردى كەڭىنەن تارتۋ ماڭىزدى.
كونگرەسس 3–19 قاراشا ارالىعىندا قازاقستاننىڭ بىرنەشە قالاسىندا وتەدى. الماتىدان بولەك، ءىس-شارالار استانا، قاراعاندى، قوستاناي، وسكەمەن جانە باسقا دا قالالاردا جوسپارلانعان. باعدارلاما اياسىندا فيلوسوفيالىق ەسسەلەر بايقاۋى، جاس عالىمدارمەن كەزدەسۋلەر مەن زياتكەرلىك ويىندار دا قاراستىرىلعان.
