2026 جىلى 10 قاراشادا الماتى قالاسى مۋزەيلەر بىرلەستىگىنىڭ قۇرامىنا كىرەتىن الماتى گالەرەياسىندا تۇرىك سۋرەتشىسى، اكۆارەل كەسكىندەمەسىنىڭ شەبەرى احمەت وگرەتەننىڭ «سۋ جولى: بوسفوردان ۇلى دالاعا دەيىن» اتتى حالىقارالىق كورمەسى سالتاناتتى اشىلدى، - دەپ حابارلايدى alnews.
حالىقارالىق كورمە الماتى قالاسى اكىمدىگى مەن تۇركيا رەسپۋبليكاسىنىڭ الماتىداعى باس كونسۋلدىعىنىڭ قولداۋىمەن ۇيىمداستىرىلدى.
كورمەگە تۇركى الەمىنىڭ تاريحي بولمىسى مەن باي مادەني مۇراسىن بەينەلەيتىن سۋرەتشىنىڭ 54 اكۆارەل تۋىندىسى قويىلعان. اۆتور ەڭبەكتەرى ارقىلى بوسفور جاعالاۋىنان ۇلى دالاعا دەيىنگى كەڭىستىكتى قامتىپ، تۇركى حالىقتارىنىڭ ورتاق تاريحىن، مادەني مۇراسى مەن عاسىرلار بويى ساقتالىپ كەلە جاتقان رۋحاني بايلانىستارىن كوركەم بەينەلەيدى.
«كورمەدە بوسفوردان ۇلى دالاعا دەيىنگى ساپاردى باياندايمىن. بۇل جاي عانا كوركەم تۋىندىلار كورمەسى ەمەس، تۇركى حالىقتارىنىڭ ورتاق مادەنيەتى مەن تامىرىن تانىستىراتىن، تاريحي-مادەني بايلانىستارىمىزدى كورسەتەتىن شىعارماشىلىق جوبا. قۇندىلىقتارىمىزدى كورەرمەنگە جەتكىزۋ مەن ءۇشىن ماڭىزدى»، – دەدى كورمە اۆتورى، سۋرەتشى احمەت وگرەتەن.
حالىقارالىق كورمە 22 قاراشاعا دەيىن جالعاسادى. كىرۋ تەگىن. الماتى گالەرەياسى سەيسەنبىدەن جەكسەنبىگە دەيىن ساعات 10:00-دەن 19:00-گە دەيىن جۇمىس ىستەيدى. دۇيسەنبى – سانيتارلىق كۇن. مەكەنجايى: دوستىق داڭعىلى، 44.
